15 شىلدە, 11:27 454 0 جاڭالىقتار اسىل تۇمار

ەلىمىزدەگى بانكتەرگە 47 ميلليون تەڭگە ايىپپۇل سالىندى

ەلدەگى سەگىز بانككە اكىمشىلىك ايىپپۇلدار سالىندى، – دەپ حابارلادى finprom.kz.

بيىل مامىر ايىنىڭ سوڭىنداعى مالىمەت بويىنشا، قر بانك سەكتورىندا 27 ەكىنشى دەڭگەيلى بانك بولدى، ولاردىڭ 14-ءى شەتەلدىكتەردىڭ قاتىسۋمەن جۇمىس ىستەيدى. قازاقستان رەسپۋبليكاسىنىڭ ەكىنشى دەڭگەيلى بانكتەرىنىڭ جيىنتىق اكتيۆتەرى جىلىنا 13 پايىزعا ارتىپ، 28,2 ترلن تەڭگەنى قۇرادى. بۇل رەتتە، اكتيۆتەردىڭ جانە باسقا دا كوپتەگەن قارجىلىق كورسەتكىشتەردىڭ وسۋىنە قاراماستان، وسى جىلدىڭ ءبىرىنشى جارتىجىلدىعىندا بانكتەرگە قاتىستى قارجىلىق قىزمەتتەردى تۇتىنۋشىلاردىڭ قۇقىعىن قورعاۋ اياسىندا 87 ىقپال ەتۋ شارالارى قولدانىلدى. ولاردىڭ ىشىندە اكىمشىلىك ايىپپۇلدار، قاداعالاۋدىڭ ۇسىنىمدىق شارالارى، جازباشا ۇيعارىمدار بار. بانكتەر كوپ جاعدايدا قازاقستان رەسپۋبليكاسىنىڭ بانك زاڭناماسىندا، سونداي-اق قازاقستان ۇلتتىق بانكىنىڭ نورماتيۆتىك قۇقىقتىق اكتىلەرىندە بەلگىلەنگەن نورمالاردى ساقتامايدى:

- بانكتىك قارىزدارعا قىزمەت كورسەتۋ;

- تولەمدەر مەن اقشا اۋدارىمدارى;

- بانكتىك شوتتارعا قىزمەت كورسەتۋ.

قازاقستان رەسپۋبليكاسىنىڭ ەكىنشى دەڭگەيلى 8 بانكىنە تىكەلەي اكىمشىلىك ايىپپۇل سالىندى. بانكتەرگە سالىنعان اكىمشىلىك ايىپپۇلداردىڭ جالپى سوماسى 2020 جىلدىڭ ءبىرىنشى جارتىجىلدىعىندا – 47,6 ملن تەڭگە.

اكىمشىلىك جاۋاپكەرشىلىك قاراستىرىلعان بانكتەر جاساعان نەگىزگى زاڭبۇزۋشىلىقتار:

- «تولەمدەر جانە تولەم جۇيەلەرى تۋرالى» قازاقستان رەسپۋبليكاسىنىڭ زاڭىندا بەلگىلەنگەن تولەمدەر جانە (نەمەسە) اقشا اۋدارىمدارى بويىنشا نۇسقاۋلىقتاردى ورىنداۋ مەرزىمدەرىن بۇزۋ;

- قارجى مونيتورينگى سۋبەكتىلەرىنىڭ قازاقستان رەسپۋبليكاسىنىڭ قىلمىستىق جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى زاڭناماسىن قارجى مونيتورينگىنە جاتاتىن وپەراتسيالار تۋرالى اقپاراتتى قۇجاتتىق تىركەۋ، ساقتاۋ جانە ۇسىنۋ بولىگىندە زاڭ بۇزۋ;

- باسقا دا زاڭبۇزۋشىلىقتار.

اكىمشىلىك ايىپپۇلدىڭ ەڭ كوپ مولشەرى ازياكرەديت بانكىنە سالىندى. وعان بارلىعى 21,9 ملن تەڭگە ايىپپۇل سالىنعان. سونداي-اق، رەسەيدىڭ سبەربانكى (11,1 ملن تەڭگە) جانە Capital Bank Kazakhstan (7,8 ملن تەڭگە) انتيكوشباسشىلار قاتارىندا. Tengri Bankكە 4,2 ميلليون تەڭگە، الفا-بانككە 1,1 ميلليون تەڭگە ايىپپۇل سالىندى.

 

سوڭعى جاڭالىقتار