14 شىلدە, 19:34 549 0 اتاجۇرت باقىتبەك قادىر

ەۋروپاداعى قانداستار گۋمانيتارلىق كومەك جولدادى

14 شىلدە كۇنى نۇر-سۇلتان ۋاقىتىمەن ساعات 02:30-دا تۇركيا مەن ەۋروپاداعى قانداستار بىرىگىپ ۇيىمداستىرعان گۋمانيتارلىق كومەك قازاقستانعا جەتكىزىلدى. 
كەلگەن كومەكتىڭ جالپى سالماعى – 900 كيللوگرامعا جۋىق. ونىڭ ىشىندە مەديتسينالىق زاتتار (بەتپەردە، تەرمومەتر، قورعانىش كوستيۋمدەرى جانە ت.ب.) جانە وكپەنى جاساندى جەلدەتۋ قۇرىلعىلارى بار. بۇل مەديتسينالىق جابدىقتار ەلىمىزدەگى مەديتسينالىق ورتالىقتارعا ۇلەستىرىلىپ بەرىلەدى.
جۇكتىڭ ءبىر بولىگىن بۇگىن «دۇنيەجۇزى قازاقتارىنىڭ قاۋىمداستىعى»، «وتانداستار كورى» جانە ەلىمىزگە تۇركيادان ارنايى كەلگەن قازاق دياسپوراسىنىڭ وكىلدەرى نۇر-سۇلتان قالاسىنداعى جۇقپالى اۋرۋلار ورتالىعىنا تاپسىردى. گۋمانيتارلىق كومەكتىڭ قالعان بولىگى الماتى، شىمكەنت جانە شقو-داعى ەمحانالارعا جەتكىزىلەتىن بولادى.

«الەمنىڭ قاي تۇسىندا جۇرسە دە، اتاجۇرت وتانىن ۇمىتپاي، قيىن-قىستاۋ ۋاقىتتا ەلىمىزگە قول ۇشىن سوزىپ، بىردەن كومەك كورسەتكەن تۇركياداعى، ەۋروپاداعى قانداستارىمىزعا، اعايىن-باۋىرلارىمىزعا جانە وسى جۇكتى جەتكىزۋگە اتسالىسقان بارلىق مەملەكەتتىك مەكەمەلەرگە العىسىمىزدى بىلدىرەمىز. «دۇنيەجۇزى قازاقتارىنىڭ قاۋىمداستىعى» مەن «وتانداستار كورى» اتىنان ريزاشىلىعىمىزدى جەتكىزەمىز»، - دەدى جۋرناليستەرگە سۇحبات بەرگەن «وتانداستار قورى» كەاق ۆيتسە-پرەزيدەنتى ماعاۋيا سارباسوۆ.

شەتەلدە تۋىپ، ءومىر ءسۇرىپ جاتقانىمىزبەن شەتتەگى ءار قازاقتىڭ ارقا سۇيەر وتانى بار. ول – قازاقستان. اتاجۇرتىمىزعا بايلانىستى كەز كەلگەن جاڭالىقتى كۇندەلىكتى كورىپ، ءبىلىپ وتىرمىز. الەمدى شارپىعان ىندەت قازاقستاندى دا اينالىپ وتپەگەنىن كورىپ، تۇركياداعى، ەۋروپا مەن بۇكىل الەمدەگى قازاقتار بىردەن كەلىسىپ، قولدان كەلگەنشە كومەكتەسۋگە بەل بۋدى. سونىڭ ناتيجەسى، مىنە، بۇگىن ەلورداعا جەتكەن العاشقى كومەك. ەندى جۇكتى باسقا قالالارعا دا تاراتىپ، بارىنشا ۇلەس قوسۋعا تىرىسامىز»، - دەدى سەركان دجينچۋك

 

سوڭعى جاڭالىقتار