14 شىلدە, 19:07 496 0 دەنساۋلىق باقىتبەك قادىر

تۇركيادان قازاقستانعا گۋمانيتارلىق كومەك كەلدى

11 توننادان استام مەديتسينالىق پرەپاراتتار تيەلگەن الىپ ۇشاق انكارادان ۇشىپ شىعىپ، وتكەن تۇندە ەلورداعا قوندى.

قازاقستان ۇكىمەتىنىڭ ارنايى جىبەرگەن ۇشاعى تۇركيا رەسپۋبليكاسىنان گۋمانيتارلىق كومەك الىپ قايتتى. «ايدىڭ نۇرى» قورى، انكارا شاھارى مۋنيتسيپاليتەتى، قوجا احمەت ياسساۋي ۋنيۆەرسيتەتى تۇركيا تۇلەكتەرى بىرلەستىگى مەن وسى ەلدەگى قازاق دياسپوراسىنىڭ جيناعان كومەگى دە وسى كولىككە تيەلدى. جۇك سالماعىنا كەلسەك، مىسالى ءبىر عانا تۇرىك ۇكىمەتىنىڭ جىبەرگەن جۇگىنىڭ قۇرامىندا 30 وكپەنى جاساندى جەلدەتۋ اپپاراتى مەن 2 دانا پتر تالداۋىنا ارنالعان جابدىقپەن قوسا، 200 مىڭنان استام مەديتسينالىق پرەپاراتتار مەن بۇيىمدار بار. بۇل كومەك ۇكىمەتارالىق ءوزارا تۇسىنىستىك مەموراندۋمى اياسىندا تەگىن تارتۋ ەتىلدى.

ياۆۋز سەليم كىران، سىرتقى ىستەر ءمينيسترىنىڭ ورىنباسارى:

- قازاقستاننىڭ COVİD-19 ىندەتىمەن كۇرەسى ناتيجە بەرەدى دەپ سەنەمىز. ماماندارعا كۇش-قۋات بەرسىن، ناۋقاستارعا شيپا بولسىن. تۇركيا ارقاشان قازاقستانمەن بىرگە. سونداي-اق بۇل كومەك وسى ۋاقىتقا دەيىن شەتەلگە جىبەرىلگەن ەڭ اۋقىمدى كومەك ەكەنىن ايتا كەتكىم كەلەدى. گۋمانيتارلىق جاردەم 6 شىلدەدە ەردوعاننىڭ ەلباسى نۇرسۇلتان نازارباەۆپەن تەلەفون ارقىلى سويلەسكەننەن كەيىن بەرگەن تاپسىرماسىنا ساي ۇيىمداستىرىلىپ وتىر. تۇركياداعى قانداستارىمىز دا اتاجۇرتتاعى جاعدايعا الاڭداپ، جاردەم بەرۋگە ۇمتىلدى. ونى ەۋروپاداعى وتانداستارىمىز دا قولداپ، ءبىر جاعادان باس، ءبىر جەڭنەن قول شىعاردى.

ەرتولقىن گايرەتۋللا، كاتەاد بىرلەستىگىنىڭ توراعاسى:

- شەت ەلدە ءومىر سۇرسەك تە، جۇرەگىمىز ارقاشان وتان دەپ سوعادى. قىسىلتاياڭ كەزەڭدە ءبىر-بىرىمىزگە دەمەۋ بولۋ – ءبىز ءۇشىن بورىش. ءبىر اپتا ىشىندە شامامەن 1 تونناعا جۋىق مەديتسينالىق كومەك جينادىق. ونى «وتانداستار» قورى، قاجەتتى ازاماتتارعا تارقاتادى.

سونداي-اق قوجا احمەت ياسساۋي ۋنيۆەرسيتەتى تۇركيا تۇلەكتەرى دە ءبىلىم العان ەلىن ۇمىتپاي، قازاقستان ەلشىلىگىنە 28 وتتەگى كونتسەنتراتىن تابىستادى.

مۇرات دەميرەز، ياسساۋي ۋنيۆەرسيتەتى تۇلەگى:

- كەنەتتەن كەلگەن كەسەلدىڭ كەرى اسەرى تورتكۇل دۇنيەگە قاتتى ءتيدى. قازاقستاننىڭ نانىن جەدىك، سۋىن ىشتىك. كومەك كەزەك بىزدە. بۇل جيھازداردان بولەك، ياسساۋي ۋنيۆەرسيتەتىن تامامداعان دارىگەرلەردى جىبەرسەك دەيمىز. بۇدان بولەك، گۋمانيتارلىق كومەكتىڭ قۇرامىندا «ايدىڭ نۇرى» قورىنىڭ 135 دانا وتتەگى كونتسەنتراتى دا بار. اپپاراتتار وسى رەيسپەن جەتكىزۋ ءۇشىن ارنايى ىستامبۇلدان انكاراعا اكەلىندى. وسى كاتەگوريا بويىنشا:

«جاڭاارقا تۇرعىندارى اۋرۋحانالارعا ءبىر تونناعا جۋىق قىمىز بەن ساۋمال تاراتتى ەلىمىزدە 36 مىڭعا جۋىق ادام كوروناۆيرۋستان جازىلىپ شىقتى »

سوڭعى جاڭالىقتار