14 شىلدە, 16:11 696 0 الەۋمەت انار لەپەسوۆا

42 500 تەڭگەنى تاعايىنداۋ جۇمىستارى قاشان باستالاتىنى بەلگىلى بولدى

سۋرەت ينتەرنەتتەن الىندى
سۋرەت ينتەرنەتتەن الىندى

قر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ 42 500 تەڭگە الەۋمەتتىك تولەمىن تاعايىنداۋ جۇمىستارى قاشان باستالاتىنىن ايتتى. 

«وسى جولى دا 42 500 تەڭگە الەۋمەتتىك تولەمىنىڭ وپەراتورى رەتىندە مەملەكەتتىك الەۋمەتتىك ساقتاندىرۋ قورى بەلگىلەندى. ويتكەنى ءبىز وسى قوردىڭ قارجىلىق جاعدايى تۋرالى «قازىر شەكتەۋى، قيىن» دەپ ايتقانبىز. دەگەنمەن، بۇگىن شەشىم قابىلداندى. سوندىقتان ۇكىمەت ۇلتتىق بانكپەن بىرلەسىپ، وسى ءبىر اپتانىڭ ىشىندە سول الەۋمەتتىك قوردىڭ قارجىلىق ماسەلەسىن شەشۋى ءتيىس»،- دەدى مينيستر.

ءبىرجان نۇرىمبەتوۆتىڭ ايتۋىنشا، قوردىڭ قارجىلىق ماسەلەسى شەشىلگەنگە دەيىن ەڭبەك مينيسترلىگى وسى تولەمگە قاتىستى ەرەجەنى پىسىقتاماق.

«وسى ۋاقىتتا ءبىز ءوزىمىزدىڭ اقپاراتتىق جۇيەمىزدى، پورتالدارىمىزدى سول ەرەجەگە سايكەستەندىرىپ، تەستىلەۋدەن وتكىزەمىز. ايانباي جۇمىس ىستەيمىز. جوسپارىمىزعا سايكەس، الداعى جۇما كۇنى پورتالدار وتىنىشتەردى قابىلداۋعا دايىن بولادى. ال دۇيسەنبى كۇننەن باستاپ، ياعني 20 شىلدەدەن تولەمدەردى تاعايىنداۋعا كىرىسپەكپىز. سوندىقتان وسى جۇماعا دەيىن ەلەكتروندى ۇكىمەتكە جانە باسقا جەرلەرگە ءوتىنىش بەرىپ اۋرە بولماڭىزدار»، - دەپ ءتۇسىندىردى ۆەدومستۆو باسشىسى.

ەسكە سالا كەتەيىك، كەشە مەملەكەت باسشىسى قاسىم-جومارت توقاەۆ مۇقتاج جاندارعا شىلدە ايىندا 42,5 مىڭ تەڭگە تولەنەتىنىن مالىمدەگەن بولاتىن.

ۇكىمەت باسشىسى اسقار مامين اتاۋلى الەۋمەتتىك كومەكتى قولدا بار دەرەكتەر نەگىزىندە الدىن الا جۇرگىزۋدى تاپسىردى. پرەمەر-ءمينيستردىڭ ايتۋىنشا، ت ولەم كارانتين شارالارىنىڭ كۇشەيتىلۋىنە بايلانىستى جۇمىسى شەكتەلگەن جۇمىس بەرۋشىلەردىڭ، جەكە كاسىپكەرلەردىڭ جانە ءوزىن-ءوزى جۇمىسپەن قامتىعانداردىڭ ءوتىنىمى نەگىزىندە جۇرگىزىلەدى.

 

سوڭعى جاڭالىقتار