14 شىلدە, 14:37 445 0 جاڭالىقتار اسىل تۇمار

ستۋدەنتتەر دە قاشىقتان وقيتىن بولادى – مينيستر

كوللەدج، جوعارى وقۋ ورىندارىنىڭ ستۋدەنتتەرى كوبىنەسە قاشىقتان وقۋ فورماتىندا وقيتىن بولادى. بۇل تۋرالى ورتالىق كوممۋنيكاتسيالار قىزمەتىندە ونلاين وتكەن بريفينگتە قر ءبىلىم جانە عىلىم ءمينيسترى اسحات ايماعامبەتوۆ ايتتى.

«كوللەدج، جوعارى وقۋ ورنى ستۋدەنتتەرى كوبىنەسە قاشىقتان وقۋ فورماتىندا وقيتىن بولادى. كەيبىر ماماندىق بويىنشا تاجىريبە، لابوراتوريالىق جۇمىس جانە باسقا دا وسىنداي ءداستۇرلى وقۋ رەجيمى بويىنشا ۇسىنىستاردى قابىلداپ، ونداي مۇمكىندىكتى بەرەمىز. سونداي-اق، شالعايداعى اۋىل-ايماقتاردا دا كوللەدجەر بار. ەپيدەميولوگيالىق جاعداي جاقسى بولسا ولارعا ءداستۇرلى تۇردە ساباق بەرۋگە رۇقسات ەتەمىز»، – دەدى مينيستر.

ونىڭ ايتۋىنشا، ماگيستراتۋراعا تەست تاپسىرۋ بويىنشا ايتارلىقتاي وزگەرىستەر جوق.

«بيىل تەستىلەۋ تامىز ايىندا ۇيىمداستىرىلادى. اعىلشىن ءتىلىن يگەرۋ بويىنشا تالاپتاردى ءسال كۇشەيتتىك. وسىنى قوسپاعاندا ۇلكەن وزگەرىستەر جوق. قازىرگى ۋاقىتتا باكالاۆريات جانە دوكتارانتۋرا بويىنشا جۇمىستار ءجۇرىپ جاتىر. باكالاۆريات بويىنشا ۇبت اياقتالدى. ەندى ۇبت نەگىزىندە سەرتيفيكاتتارمەن كۇنى كەشە قۇجاتتاردى قابىلداۋ ءراسىمى باستالدى. وسى ءراسىمدى 25 شىلدەگە دەيىن سوزدىق»، – دەيدى ول.

سوڭعى جاڭالىقتار