13 شىلدە, 22:02 813 0 دەنساۋلىق باقىتبەك قادىر

ءولى رازى بولماي، ءتىرى بايىمايدى – كادىربەك سەگىزباي

كادىربەك سەگىزباي، جازۋشى، قازاقستاننىڭ ەڭبەك سىڭىرگەن قايراتكەرى:

– قازاق قازاق بولعالى تالاي ىندەتتى باستان وتكىزگەن. وبا، سۇزىك، شەشەك سەكىلدى نەشە ءتۇرلى جۇقپالى اۋرۋلار بولعان. باسقاسىن بىلاي قويعاندا مەنىڭ اتالارىمنىڭ تۋعان-تۋىستارى 1897 جىلى وبا اۋرۋىنان قىرىلىپ قالدى. بۇل دا سول سەكىلدى مەزگىلسىز كەلگەن دەرت.

حالقىمىزدىڭ اماندىعىن تىلەپ، ۇيدە وتىرمىز. اينالامىزدا شىعىن كوپ. نەبىر بەلگىلى اسىل ازاماتتارىمىزدان ايرىلىپ جاتىرمىز. بەلگىسىزدەرى قانشاما. ماسەلە بەلگىلى ياكي بەلگىسىزىندە ەمەس، ءاربىر ادام قۇندى. قۇنسىز ەشكىم جوق. باسىندا «الماتىدان 3 ادام قايتىپتى» دەپ شوشىپ وتىرۋشى ەدىك، قازىر جۇزدەپ كەتىپ جاتىر. وسىنىڭ ءبارى ۇلكەن وكىنىش.

سوندىقتان بەك ساقتىق كەرەك. قازاق «ساقتىقتا قورلىق جوق» دەيدى. ساقتانساق، قور بولمايمىز. تارتىپكە باعىنىپ، ءوز-ءوزىمىزدى ساقتاۋىمىز قاجەت.

پرەزيدەنتىمىز ۇندەۋ جاريالادى. قالاي بولعاندا وسى ىندەتتى توقتاتايىق دەپ جۇگىرۋدە. حالىقتى سابىرعا شاقىرىپ جاتىر. بىراق سوندا دا ەركىندىككە ۇيرەنىپ قالعان جۇرت ءتارتىپتى ءالى دۇرىس ساقتاماي جاتىر. وسىنىڭ ءبارى اينالىپ كەلگەندە ادامنىڭ ءوزىن-ءوزى سىيلاماۋى جانە اينالاسىنداعى ەلدى سىيلاماۋى عوي.

ۇندەۋدە 13 شىلدە ازا تۇتۋ كۇنى دەپ جاريالاندى. بۇل وتە دۇرىس نارسە. ءولى رازى بولماي، ءتىرى بايىمايدى دەيدى. ولار مەزگىلسىز كەلگەن دەرتتىڭ قۇرباندارى. سولارعا قازىر ءبىر كۇرەك توپىراق سالۋعا جاراماي وتىرمىز. امال جوق. سوندىقتان و دۇنيەلىك بولعان ازاماتتاردى ەسكە الۋ – كەرەك بولسا تىرىلەر ءۇشىن قاجەت نارسە. ولاردى ەسكە الىپ، ساباق الايىق دەگەن اڭگىمە.

ەل امان بولسىن! وتىرايىق، شىدامدى بولايىق، اماندىقتا جولىقايىق!

سوڭعى جاڭالىقتار