13 شىلدە, 20:43 498 0 قوعام ارايلىم بيمەنديەۆا

قىدىرالى بولمان: مەملەكەت ءار ادامدى امان الىپ قالۋعا جانىن سالۋى قاجەت

قىدىرالى بولمان، ءانشى، پروديۋسەر:

–  كەشە عانا ارامىزدا جۇرگەن، بۇگىندە ومىردەن ءوتىپ كەتكەن جاقسى ادامداردىڭ جاندارى ءجانناتتا بولعاي! ءدال قازىر، ەل مەن ۇكىمەت ءبۇتىن بولعاندا عانا، ءىسىمىز بەرەكەلى بولا الاتىنى انىق! مەملەكەتىمىز بار رەسۋرستارىن تارك ەتسە دە، قازاقستاننىڭ ءار ادامىن امان الىپ قالۋعا جانىن سالۋى قاجەت! حالىققا جەتكىلىكتى قىلىپ وتتەگى اپپاراتىن، كەرەكتى ءدارى-دارمەك، قاراپايىم شپريتستەردىڭ ءبارىن تەگىن تاراتۋ شاراسىن تەز ارادا ىسكە اسىرىپ، جەتكىلىكتى ەم ورىندارىن قامتاماسىز ەتسەك، قانشا ادامدى قۇتقارىپ قالۋعا بولار ەدى.

پرەزيدەنتىمىز قاسىم-جومارت كەمەلۇلىمەن بارشامىز بىرىگە وتىرىپ، مەملەكەت پەن بىرگە حالىق كۇش بىرىكتىرىپ، بارىمىزدىڭ ءبارىن سالىپ، ءار ادامدى امان-ەسەن الىپ قالۋعا جۇمساۋىمىز كەرەك. بۇل ەڭ وزەكتى تاقىرىپقا اينالىپ، كۇن تارتىبىنەن تۇسپەۋى قاجەت! قاراجاتتىڭ ىسىراپ بولماۋىن بىرنەشە دەڭگەيدە قاتتى قاداعالاۋ بولعانى ءلازىم. قويمادا بار ءدارى-دارمەكتەردى شۇعىل تۇردە دارىحانالارعا اربامەن تاسىساق تا، كۇن-ءتۇن دەمەي تاراتىلۋى ءتيىس. ءبىر ادامدى ساقتاپ قالۋ، بۇكىل الەمدەگى ادامداردى ساقتاپ قالۋمەن تەڭ. ءار مەملەكەتتىڭ تۇعىرى، ەڭ باستى بايلىعى – سول مەملەكەتتىڭ حالقى، ءاربىر ادامى. ءار اۋرۋحانانى كۇندە ارالايتىن، ءار دارىحاناعا بارىپ باقىلاۋ جاسايتىن، «ءدارى بار ما، جوق پا؟» دەگەن ەڭ وزەكتى ماسەلەنى سول جەردە شەشە الاتىن، مەملەكەتىنە جانى اشيتىن، ءار ادامعا جاناشىر ادال، ەڭبەكقور، پاتريوتتاردان قۇرالعان قۇزىرلى «مەحانيزم» قاجەت. ءدارىنىڭ ءبارىن تەگىن تاراتۋعا كوشۋ كەرەك، مەملەكەتىمىزدىڭ وعان شاماسى جەتەتىنىنە كۇمانىم جوق. وزدەرى قينالىپ وتىرعان حالىققا ءدارى-دارمەكتى 5 ەسە قىمبات قىلىپ ساتۋ، ونى دەفيتسيت ەتۋ دەگەن ءتىپتى ەشقانداي اقىلعا سىيمايدى.

ادامداردىڭ نەدەن قايتىس بولىپ جاتقانىنا نەگە ساراپتاما جۇرگىزىلمەيدى؟ قايتقان ادامداردىڭ بارىنە 100% ءبىر دياگنوز قويىلۋى قانشالىقتى دۇرىس؟ باسقا ەلدەر ىندەتكە قارسى تۇرىپ، ەسىن جيىپ، تىرشىلىگىنە كىرىسىپ جاتقاندا، ءبىز ونبەيتىن داۋ قۋالاپ، قالعان ادامداردى امان الىپ قالۋعا ناقتى قادامدار جاسايتىن التىن ۋاقىتتى دالاعا شاشىپ، قول قۋسىرىپ وتىرعان جوقپىز با؟

وسى كەپتەلىپ تۇرعان سۇراقتاردى شەشۋ جولدارى مەيلىنشە ايقىن، مەيلىنشە اشىق جۇرگىزىلىپ، ەل كورىپ-ءبىلىپ وتىراتىن دۇنيەگە اينالۋى كەرەك. ماسەلەنىڭ ءتۇپ-تامىرىنا ۇڭىلمەسەك، ءبارى بەكەر... ءدال قازىر ءبىزدىڭ ۇكىمەت حالىقتى، ءار اۋرۋحانانى، ءار ءدارىحانانى، ءاربىر ادامدى كۇندەلىكتى «ەستۋى» العا جىلجۋدىڭ، ەلىمىزدى قۇتقارۋدىڭ جالعىز جانە ەڭ وزەكتى تەتىگى بولماق.

سوڭعى جاڭالىقتار