13 شىلدە, 16:41 437 0 جاھان انار لەپەسوۆا

مولدوۆادا توتەنشە جاعداي شىلدەنىڭ سوڭىنا دەيىن ۇزارتىلدى

مولدوۆا اۋماعىندا توتەنشە جاعداي 31 شىلدەگە دەيىن ۇزارتىلدى. ۇلتتىق قوعامدىق دەنساۋلىق ساقتاۋ توتەنشە كوميسسياسىنىڭ بۇگىنگى وتىرىسىندا وسىنداي شەشىم قابىلداندى، دەپ حابارلايدى مولدپرەس

كوميسسيا باسشىسى پرەمەر-مينيستر يون كيكۋدىڭ ايتۋىنشا، مۇنداي شەشىم ەلدەگى ەپيدەميولوگيالىق احۋالدى تۇراقتاندىرۋ ءۇشىن قابىلدانىپ وتىر.

قوعامدىق دەنساۋلىق ساقتاۋ سالاسىنداعى توتەنشە جاعداي ۇزارتىلىپ قانا قويماي، كەيبىر شەكتەۋلەر ساقتالادى: شەتەلدىكتەردىڭ مولدوۆا رەسپۋبليكاسىنا كەلۋىنە، شارالار وتكىزۋگە، مەكتەپكە دەيىنگى مەكەمەلەر قىزمەتىنە، دەمالىس لاگەرلەرىنە، تۇنگى كلۋبتارعا، ساياباقتارعا، دەمالىس ايماقتارىنا جانە ت.ب.

سوعان قاراماستان، 16 شىلدەدەن باستاپ وڭالتۋ ورتالىقتارى، سونىڭ ىشىندە كۋرورتتىق-شيپاجاي مەكەمەلەرىنىڭ قىزمەتى كەزەڭ-كەزەڭىمەن قايتا جاندانباق.

ەلدىڭ دەنساۋلىق ساقتاۋ مينيسترلىگىنىڭ مالىمەتىنشە، سوڭعى تاۋلىكتە مولدوۆا رەسپۋبليكاسىندا 258 ادامنان جاڭا كوروناۆيرۋس انىقتالعان. مەملەكەتتە قاتەرلى ۆيرۋس جۇقتىرعانداردىڭ جالپى سانى 18 924 ادامعا جەتتى.

ايتا كەتەيىك، بۇعان دەيىن برازيليادا ءبىر تاۋلىك ىشىندە 39 مىڭ ادامنان كوروناۆيرۋس انىقتالىپ،  ىندەت جۇقتىرعانداردىڭ جالپى سانى 1,8 ميلليونعا جەتكەنىن حابارلاعانبىز. ەلدە ىندەت قۇرباندارىنىڭ سانى 71 مىڭنان استى.

ال اقش-تا الداعى 2-3 اپتادا ءولىم-ءجىتىم كورسەتكىشى ارتا تۇسەدى دەپ بولجانۋدا. ەلدىڭ دەنساۋلىق ساقتاۋ ءمينيسترىنىڭ كومەكشىسى برەتت جيرۋاردىڭ ايتۋىنشا،  كۇزدە ىندەتتىڭ ەكىنشى تولقىنىنىڭ باستالۋ ىقتيمالدىعى جوعارى. ويتكەنى ۆيرۋس تۇرعىنداردىڭ 90 پايىزىن ءالى شارپىپ ۇلگەرمەگەن.

 

سوڭعى جاڭالىقتار