13 شىلدە, 14:17 642 0 قوعام انار لەپەسوۆا

حالىق ءتۇرلى قيىندىقپەن بەتپە-بەت قالدى – نۇرتورە ءجۇسىپ

قاتەرلى ىندەتتەن قۇتىلۋدىڭ بارلىق شاراسىن جاساۋ قاجەت. ونسىز ات توبەلىندەي حالقىمىزدىڭ باسى قاتەرگە تىگىلەدى. قر پارلامەنتى سەناتىنىڭ دەپۋتاتى نۇرتورە ءجۇسىپ وسىنداي پىكىر ءبىلدىردى. 

"مەملەكەت باسشىسى قاسىم-جومارت توقاەۆ ءوز ۇندەۋىندە 13 شىلدە - ۇلتتىق ازا تۇتۋ كۇنى دەپ جاريالاعان بولاتىن. بۇگىن تۇندە قازاقستاننىڭ بارلىق قالاسىندا مەملەكەتتىك تۋلار ءتۇسىرىلدى. نۇر-سۇلتان ۋاقىتىمەن 12:00-دە ەلدە ءبىر مينۋتتىق ۇنسىزدىك جاريالاندى. قاتەرلى دەرتتەن قايتىس بولعان ازاماتتاردىڭ رۋحىنا تاعزىم جاسالدى. ەلىمىزدە كوروناۆيرۋس جۇقتىرعانداردىڭ سانى 59 مىڭنان اسىپ، ونىڭ ىشىندە 375 ادام قايتىس بولعانى انىقتالدى. قازاقتا «ءولى رازى بولماي، ءتىرى بايىمايدى» دەگەن ءسوز بار. قايعىدان قان جۇتىپ، قارا جامىلعان اۋلەتتەرگە قايعىسىنا ورتاقتاسىپ كوڭىل ايتامىن", - دەدى نۇرتورە ءجۇسىپ.

سەناتور مۇنىڭ الدىندا مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن جيىنىن وتكىزگەنىن، ۇكىمەتتىڭ جۇمىسىن جانە سالالىق ۆەدومستۆولاردىڭ جۇمىسىن قاتاڭ سىنعا العانىن باسا ايتتى.

"جاعدايدىڭ وتە كۇردەلى سيپات العانى بەلگىلى. پرەزيدەنت ەلدىڭ كوكەيىندە جۇرگەن سوزدەردى اشىق ايتتى. دۇرىس. جاعدايدى اشىق ايتۋ كەرەك. شىندىقتى جاسىرماۋ قاجەت. بۇل تۇرعىدان العاندا پرەزيدەنت وسىنىڭ الدىندا جاساعان تەلەۆيزيالىق ۇندەۋىندە جانە بۇگىنگى جيىندا ەشتەڭەنى جاسىرىپ، جابا توقىپ، ماسەلەدەن سىرت اينالىپ كەتكەن جوق. «قالىپتاسقان احۋال ەكى اپتادان كەيىن جاقسارادى دەپ ۇمىتتەنەمىن. ولاي بولماعان جاعدايدا، جالپى ۇكىمەتتىڭ وسى قۇرامدا جۇمىس ىستەۋ مۇمكىندىگى تۋرالى ماسەلە تۋىندايدى»، - دەپ ۇكىمەت مۇشەلەرىنە قاتاڭ ەسكەرتۋ جاسادى", - دەدى ول.

وسى ورايدا نۇرتورە ءجۇسىپ ءتورت-بەس ماسەلەنى ورتاعا سالدى.

ء"بىرىنشى، ەلدى قاجەتتى ءدارى-دارمەكپەن قامتاماسىز ەتۋ. «ءدارىحانالاردا ءدارى-دارمەك تولىپ تۇر» دەگەن اقپارات بار. ول نەگە ەلگە جەتپەيدى؟ ءار وبلىس حالقىنا قاجەت ءدارى-دارمەكتى دەرەۋ جەتكىزۋدىڭ نە قيىندىعى بار؟ ءدارى-دارمەك تاپشىلىعىن قولدان تۋعىزىپ وتىرعاندار بولسا، دەرەۋ انىقتاپ، جازالاۋ قاجەت. ەكىنشى، جەكەلەگەن ازاماتتار ءوز قارجىسىنا دەم الدىراتىن اپپارات الدىرتىپ جاتىر. وسى جابدىقتاردى كەدەندىك راسىمدەۋ، جەدەل قاجەتتى ايماقتارعا جەتكىزۋ ىسىندە ۇيلەسىمدى ارەكەت جوق. قازىر ءار مينۋت قىمبات. شاباندىق جىبەرگەن سايىن ادام شىعىنى كوبەيە بەرمەك. ءۇشىنشى، پرەزيدەنت «ءبىز جۇمىستىڭ تاسىلدەرىن ۇنەمى وزگەرتە بەرەمىز. بۇرىنعى باسشىلىق اياق استىنان ناۋقاستاردى سيمپتومدى جانە سيمپتومسىز دەپ ءبولۋ كەرەك دەپ شەشتى. قازىر بۇل ادىستەمەدەن باس تارتتىق. مىنە وسىنداي ارەكەتتەر حالىق اراسىندا كۇمان تۋعىزادى»، - دەدى. جۇمىس تاسىلدەرىن وزگەرتە بەرۋدەن وپا تاپپايمىز. باردى بار، جوقتى جوق دەپ ايتۋدىڭ قانشالىق قيىندىعى بار ەكەنىن تۇسىنبەيمىن. وسى رەتتە قاشىقتان جۇمىس ىستەۋگە جىبەرىلگەن، شاعىن جانە ورتا بيزنەسى توقتاپ قالعان، كۇنكورىس جاعدايى قيىنداعان ازاماتتاردى ەسەپكە الىپ، مەملەكەت تاراپىنان ءتيىستى قولداۋ شارالارىن جاساۋ قاجەت دەپ بىلەمىن", - دەدى سەناتور.

ول تورتىنشىدەن بالالاردىڭ ءبىلىم الۋ ماسەلەسىنە توقتالدى.

"وقۋ قانداي جاعدايدا جۇرەدى؟ مينيسترلىك ۇسىنىپ وتىرعان ءۇش نۇسقانىڭ ەڭ ءتيىمدىسى قايسى؟ وسى ماسەلەدە دە انىق اقپارات قاجەت. اتا-انالار بالالارىن مەكتەپكە دايىنداۋ ىسىندە مەملەكەت تاراپىنان ناقتى جاۋاپتار كۇتەدى. وقۋلىقپەن قامتۋ ءىسى دە نازاردا بولۋى ءتيىس. بەسىنشى، جاز ىلەزدە وتەدى. كۇز كەلەدى. قىس كەلەدى. قىسقا دايىندىقتى قازىردەن باستاۋ قاجەت. جاز مەزگىلىندە پىسكەن جەمىس-جيدەكتەن توساپ قايناتۋ، دارىلىك شوپتەردى جيناۋ، قۇرامىندا دارۋمەن مول ازىق-تۇلىك قورىن جاساۋ دا كەزەك كۇتتىرمەيتىن شارۋالار. اشىعىن ايتۋ كەرەك، حالىق ءتۇرلى قيىندىقپەن بەتپە-بەت قالدى. ءار ازامات، ءار وتباسى، ءار اۋلەت اماندىقتىڭ قامىن جاساماسا بولمايدى. ءوز دەنساۋلىعىمىزدى، جاقىندارىمىزدىڭ دەنساۋلىعىن ويلاساق، قامسىز، قارەكەتسىز وتىرماۋعا ءتيىسپىز. قاتەرلى ىندەتتەن قۇتىلۋدىڭ بارلىق شاراسىن جاساۋ قاجەت. ونسىز ات توبەلىندەي حالقىمىزدىڭ باسى قاتەرگە تىگىلەدى. ەلىمىز امان، جۇرتىمىز تىنىش بولعاي!", - دەدى نۇرتورە ءجۇسىپ.

 

سوڭعى جاڭالىقتار