13 شىلدە, 12:52 439 0 جاھان انار لەپەسوۆا

COVID-19: اقش-تا ءولىم-ءجىتىم كورسەتكىشى ارتادى دەپ بولجانۋدا

الداعى 2-3 اپتادا اقش-تا كوروناۆيرۋس ىندەتىنەن كوز جۇمۋ كورسەتكىشى وسەدى دەپ بولجانىپ وتىر. بۇل تۋرالى ەلدىڭ دەنساۋلىق ساقتاۋ ءمينيسترىنىڭ كومەكشىسى برەتت جيرۋار مالىمدەدى، دەپ حابارلايدى ريا نوۆوستي.

جيرۋاردىڭ ايتۋىنشا، بۇگىنگى تاڭدا اقش-تا ىندەتتى ەمدەۋ تيىمدىلىگى پاندەميانىڭ العاشقى كەزەڭىمەن سالىستىرعاندا ايتارلىقتاي ارتقان. ءتيىمدى ادىستەمە جاساقتالىپ، رەمدەسۆەدير جانە ستەرويدتار سەكىلدى پرەپاراتتار قولدانىلۋدا.

سونداي-اق، ءمينيستردىڭ كومەكشىسى كۇزدە ىندەتتىڭ ەكىنشى تولقىنىنىڭ باستالۋ ىقتيمالدىعى جوعارى ەكەنىن اتاپ ءوتتى. ويتكەنى ۆيرۋس تۇرعىنداردىڭ 90 پايىزىن ءالى شارپىپ ۇلگەرمەگەن. جيرۋاردىڭ سوزىنشە، ەل بيلىگى كوروناۆيرۋستىڭ ماۋسىمدىق تۇماۋمەن قاباتتاسىپ، كۇردەلەنە تۇسپەۋى ءۇشىن قولدان كەلگەننىڭ ءبارىن جاساپ جاتقان كورىنەدى.

سوڭعى ايدا اقش-تىڭ ءىرى شتاتتارىندا كوروناۆيرۋس جۇقتىرۋ كورسەتكىشى ايتارلىقتاي ءوستى. پاندەميا باستالعالى ەلدە 3,2 ميلليوننان استام ادام ىندەتكە شالدىققان. ناۋقاستاردىڭ 135 مىڭعا جۋىعى كوز جۇمدى.

ايتا كەتەيىك، سوڭعى تاۋلىكتە الەمدە كوروناۆيرۋس جۇقتىرۋدىڭ رەكوردتىق كورسەتكىشى تىركەلدى. ددسۇ دەرەگىنشە، 12 شىلدە كۇنى جاھاندا 230 370 ادامنان قاتەرلى ۆيرۋس انىقتالدى. ءبىر تاۋلىكتە ىندەتتەن 5 285 ادام قايتىس بولدى.

سوڭعى جاڭالىقتار