13 شىلدە, 12:04 375 0 جاھان انار لەپەسوۆا

قازاقستانداعى ازا تۇتۋ كۇنى: شىۇ شتاب-پاتەرىندە تۋلار تومەن ءتۇسىرىلدى

قازاقستانداعى كوروناۆيرۋس پاندەمياسىنان قازا بولعان ازاماتتاردى ەسكە الۋعا بايلانىستى جاريالانعان ازا تۇتۋ كۇنىنە وراي قازاقستان حالقىنىڭ قايعىسىنا ورتاق ەكەندىگىنىڭ بەلگىسى رەتىندە شانحاي ىنتىماقتاستىق ۇيىمىنىڭ شتاب-پاتەرىندە ۇيىمعا مۇشە مەملەكەتتەردىڭ تۋلارى تومەن ءتۇسىرىلدى، دەپ حابارلايدى قازاقپارات. 

"شانحاي ىنتىماقتاستىق ۇيىمى حاتشىلىعىنىڭ كوپۇلتتى ۇجىمى اتىنان جانە ءوز اتىمنان ەلدەگى ۇلتتىق ازا كۇنىنە بايلانىستى قازاقستان حالقىنا شىن جۇرەكتەن كوڭىل ايتامىن.

شانحاي ىنتىماقتاستىق ۇيىمى قازاقستان حالقىمەن ىنتىماقتاستىقتا جانە "شانحاي رۋحىن" ۇستانا وتىرىپ، ىنتىماقتاستىقتى جانداندىرۋعا، جالپى قاتەردى بولدىرماۋ ماقساتىندا پاندەمياعا قارسى ءىس-قيمىلدا قازاقستانعا جاردەم كورسەتۋگە باعىتتالعان بارلىق قاجەتتى شارالاردى قابىلداۋعا دايىن.

قازاقستان وسى سىناقتى جەڭە الاتىنىنا جانە ىندەتتىڭ تارالۋى توقتايتىنىنا نىق سەنىم بىلدىرەمىز", - دەپ اتاپ ءوتتى شىۇ باس حاتشىسى ۆلاديمير نوروۆ.

شانحاي ىنتىماقتاستىق ۇيىمى - بۇل تۇراقتى ۇكىمەتارالىق حالىقارالىق ۇيىم، ونى 2001 جىلى 15 ماۋسىمدا شانحايدا قازاقستان، قىتاي، قىرعىزستان، رەسەي، تاجىكستان جانە وزبەكستان ەلدەرى قۇردى. 2017 جىلدىڭ ماۋسىمىندا ءۇندىستان مەن پاكىستانعا ۇيىمعا مۇشە مەملەكەت مارتەبەسى بەرىلدى.

سوڭعى جاڭالىقتار