13 شىلدە, 11:51 533 0 دەنساۋلىق انار لەپەسوۆا

پاندەميانى جەڭىپ شىعۋ ءۇشىن بارلىق كۇش-جىگەرىمىزدى جۇمىلدىرامىز – الەكسەي تسوي

دەنساۋلىق ساقتاۋ ءمينيسترى جالپىۇلتتىق ازا تۇتۋ كۇنىندە كوروناۆيرۋس پاندەمياسىنىڭ قۇربانى بولعان مارقۇمداردىڭ جاقىندارىنا كوڭىل ايتتى،  دەپ حابارلايدى ۆەدومستۆونىڭ ءباسپاسوز قىزمەتى.

بۇگىن كوروناۆيرۋس ىندەتىنەن قازا تاپقانداردى ۇلتتىق ازا تۇتۋ كۇنى دەنساۋلىق ساقتاۋ ءمينيسترى الەكسەي تسوي وسى دەرتتىڭ سالدارىنان جاقىندارىنان، تۋعان-تۋىس، باۋىرلارىنان، ارىپتەستەرىنەن ايىرىلعان ەلىمىزدىڭ بارشا تۇرعىندارىنا كوڭىل ايتتى. ول COVID-19 ەلىمىزدىڭ جۇزدەگەن ازاماتىنىڭ ءومىرىن قيعانىن جاريا ەتتى.

"وسى كۇندەرى مەنىڭ ارىپتەستەرىم – دارىگەرلەر مەن مەديتسينا قىزمەتكەرلەرى ومىردەن وزدى، ماڭگىلىككە كوز جۇمدى، ولار كۇتپەگەن قاۋىپ-قاتەرمەن بەتپە-بەت كەلدى، سوڭعى دەمى قالعانشا كۇرەستى. بۇل قايعىلى جاعداي ءبىز ءۇشىن ورنى تولماس قازا. ولار ءومىرىنىڭ سوڭىنا دەيىن دارىگەرلىك بورىشىن جانقيارلىقپەن اتقاردى. ءبىزدىڭ ەسىمىزدە ولار ماڭگى ناعىز باتىر بولىپ قالادى", – دەپ اتاپ ءوتتى الەكسەي تسوي.

ول بۇل ىندەتتى توقتاتۋ ءۇشىن وعان سەبەپكەر بولىپ وتىرعان پاندەميامەن كۇرەستە سەرپىندى جانە ءتيىمدى شارالار قاجەت ەكەنىن اتاپ ءوتتى.

"وسى قاۋىپ-قاتەردى توقتاتۋ ءۇشىن مەن جانە مەنىڭ ارىپتەستەرىمىز تاۋلىك بويى جۇمىس ىستەۋدى جالعاستىرامىز",– دەپ مالىمدەدى مينيستر.

ونىڭ ايتۋىنشا، ۇكىمەت مەديتسينالىق ۇيىمدارعا جانە دارىحانالارعا قاجەتتى ءدارى-دارمەكتەردى جەتكىزۋ بويىنشا شۇعىل شارالار قابىلداپ، قوسىمشا توسەك-ورىندار سانى قاتارى تولتىرىلعان.

سونداي-اق، شەتەلدىك ساراپشىلارمەن بىرلەسىپ كوروناۆيرۋستى ەمدەۋ ادىستەرى جان جاقتى زەردەلەنىپ، جەتىلدىرىلۋدە ەكەن. مينيستر قازاقستاندىقتاردى قولدان كەلەر كومەكتەرى بولسا وسى ىندەتپەن كۇرەسۋگە اتسالىسۋعا شاقىردى جانە ەرىكتىلەر مەن بەلسەندى ازاماتتاردىڭ ماڭىزدى ءرولىن اتاپ ءوتتى.

ء"بىز بىرگەمىز، ءبىز پاندەميانى جەڭىپ شىعۋ ءۇشىن بارلىق كۇش-جىگەرىمىزدى جۇمىلدىرامىز. ءبىز بۇل قيىندىقتى جۇمىلا وتىرىپ، جەڭە الاتىنىمىزعا سەنىمدىمىن", – دەپ ەلىمىزدىڭ باس دارىگەرى الەكسەي تسوي ءسوزىن تۇيىندەدى.

سوڭعى جاڭالىقتار