13 شىلدە, 09:21 705 0 قوعام انار لەپەسوۆا

ءبارىمىز ۇلى مۇرات جولىندا جۇمىلۋىمىز قاجەت – ديماش قۇدايبەرگەن

قازاقتىڭ الەمدى مويىنداتقان ءانشىسى ديماش قۇدايبەرگەن جالپىۇلتتىق ازا تۇتۋ كۇنىنە وراي الەۋمەتتىك جەلىدە پىكىر ءبىلدىرىپ، قازاقستاندىقتاردى ۇلى مۇرات جولىندا جۇمىلۋعا ۇندەدى. 

«وكىنىشكە قاراي، كۇللى الەمدى شارپىعان پاندەميا قازاقستاندى دا اينالىپ وتپەدى. قانشاما وتباسى قارا جامىلدى. كۇن سايىن مەن تانيتىن، تانىمايتىن قانشاما ادام ومىردەن ءوتىپ جاتىر. بۇل نەتكەن قاسىرەت ەدى... قازىر جۇرەگى بار ادامنىڭ تىنىش ۇيىقتاۋى مۇمكىن ەمەس...» - دەپ جازدى ءانشى.

ديماش ءاربىر ادامنىڭ ءومىرى ءۇشىن كۇرەسۋ ماڭىزدى ەكەنىن ايتتى.

«بۇگىن - ازا تۇتۋ كۇنى! وسى ىندەتتىڭ كەسىرىنەن قايتىس بولعان بارلىق ادامدى جاراتۋشى يەمىز پاناسىنا العاي! مارقۇمداردىڭ تۋعان-تۋىستارىنا سابىر تىلەيمىن. ءبىز ولاردى، مىنا قارالى كۇندەردى ەشقاشان ۇمىتپايمىز. قازىرگى مىندەت – اۋىرىپ جاتقانداردى امان الىپ قالۋ. ءاربىر ادام ءۇشىن كۇرەسۋىمىز كەرەك. ءبارىمىز وسى ۇلى مۇرات جولىندا جۇمىلۋىمىز قاجەت. تەزىرەك ىندەت اياقتالىپ، مامىراجاي كۇندەرىمىز قايتا كەلەدى دەپ سەنەمىن. ەندىگى جەردە كوك بايراعىمىز ەڭكەيمەگەي!» - دەيدى ءانشى.

ەسكە سالا كەتەيىك، بۇگىن ەلىمىزدە كوروناۆيرۋس پاندەمياسىنىڭ قۇربانى بولعان ازاماتتاردى ەسكە الۋعا بايلانىستى  جالپىۇلتتىق ازا تۇتۋ كۇنى. نۇر-سۇلتان ۋاقىتىمەن ساعات 12:00-دە بۇكىل ەل بويىنشا ءبىر مينۋتتىق ۇنسىزدىك جاريالانادى.

بۇعان دەيىن ەلباسى نۇرسۇلتان نازارباەۆ ىندەتتەن كوز جۇمعانداردىڭ تۋىستارى مەن جاقىندارىنا كوڭىل ايتقانىن حابارلاعانبىز.

 

سوڭعى جاڭالىقتار