13 شىلدە, 11:42 471 0 قوعام ارايلىم بيمەنديەۆا

ەسەپ ايىرىسىپ، وكپە قۋاتىن ەمەس، ءومىر ءۇشىن كۇرەسەتىن ۋاقىت – بايانعالي ءالىمجانوۆ

بايانعالي ءالىمجانوۆ، اقىن، دراماتۋرگ، قر مادەنيەت قايراتكەرى:

كەلگەن ىندەت بۇكىل حالىقتىڭ دەنساۋلىعىنا قاۋىپ-قاتەر تۋدىرىپ وتىر. پاندەميا، كەرەك دەسەڭىز، بۇكىل ادامزاتتىق قاسىرەتكە اينالدى. ءبىز نە بولىپ جاتقانىن تۇسىنبەيتىن، بەيمالىم ءبىر جاڭا زامانعا تاپ بولعان سياقتىمىز. ارعى تۇبىنەن ويلاساق، جاۋدى جەڭۋ ءۇشىن ءبىر ەل ەكىنشى ەلگە باكتەريولوگيالىق قارۋ قولدانعانىن تاريحتان بىلەمىز. ال مىنا دەرتتىڭ قايدان، قالاي كەلىپ جاتقانىن، ادەيى جاسالدى ما، جوق پا، ءتۇسىنۋ قيىن. ءبىزدىڭ ۇرپاق نەشە ءتۇرلى قيىندىقتى كورىپ ءوستى، بىراق ءدال مۇنداي سۇمدىق، ءدال مۇنداي قيىن، قاسىرەت جاعداي بولعان ەمەس. بەيبىت زاماندا وتە قاۋىپتى، قاتەرلى سوعىس جاعدايى ورىن الىپ وتىر.

دەنساۋلىق ساقتاۋ سالاسىنداعى قاتەلىكتەر الداعى كۇنىمىزگە ساباق بولۋى ءتيىس. بىراق دارىگەرلەر كۇنى-ءتۇنى مايداننىڭ شەبىندە جانكەشتىلىكپەن ەڭبەك ەتىپ، قولىنان كەلگەنىن جاساپ جاتىر. ءوزىنىڭ ەمدەلۋشىسىنەن اۋرۋ جۇقتىرىپ قايتىس بولعان ابزال جاندار قانشاما. ءبىزدىڭ دارىگەرلەر قاۋىمى باياعى ەكىنشى دۇنيەجۇزىلىك سوعىستا مايداندا گوسپيتالدا جۇرگەن سانيتارلار سەكىلدى. قاۋىپ-قاتەرمەن كۇن سايىن بەتپە-بەت كەلەدى. جارالىلاردى قۇتقارام دەپ ءجۇرىپ تالاي سانيتار بومبا تۇسكەندە اجال قۇشتى.

سوڭعى كۇندەرى بەلگىلى بولعان بار ءدارىنى قويماعا تىعىپ قويۋ نەمەسە ونى قىمبات ساتۋ دەگەن جاعدايلار ءتىپتى اقىلعا سىيمايدى، ادامدىقتان كەتكەندەردىڭ تىرلىگى دەر ەدىم. بىراق ولارعا قاراپ بۇكىل مەملەكەتتىڭ، ۇكىمەتتىڭ جاساپ جاتقان شارالارىن جوققا شىعارىپ، بۇلىنشىلىككە ۇشىراعانىمىز دۇرىس بولماس. جالپى مۇنداي جاعدايعا بىردە-ءبىر مەملەكەت دايىن بولمادى. قازاقستان دا سول سەكىلدى. اۋزىن ايعا بىلەگەن امەريكانىڭ وزىندە ىندەتتەن بىرنەشە مىڭداعان ادام قايتىس بولدى. ەمى جوق اۋرۋمەن كۇرەستە تۇگەل ءبىر وتباسى قايتىس بولعان جاعدايلار دا كەزدەسىپ جاتىر. وسى اۋرۋدىڭ قيىندىعىن كورمەگەن بىردە-ءبىر وتباسى جوق شىعار قازىر.

توتەنشە جاعدايدان كەيىن كارانتين شارالارىن ساقتاماي ەركىنسىپ كەتكەنىمىز راس. تۋىستارىمىزعا بارماساق، قول الىسپاساق، قۇشاقتاماساق، ءبىر تاباقتان اس ىشپەسەك، توي تويلاماساق بولمايتىن سياقتى كورىندى. كوزگە كورىنبەيتىن سوعىستىڭ ءجۇرىپ جاتقانىن ەلەمەدىك. ساۋمىن دەپ تۇرعان جاقىن ادامىڭنان اۋرۋ جۇقتىرا كەتۋىڭ وڭاي. ەندى قازاقتىڭ بۇرىنعىداي ارقا-جارقا وتىرىسى، الاشاپقىن جينالىسى، تويدان توي ارالاپ جۇرەتىن زامانى قايتىپ كەلە ما، جوق پا، بەلگىسىز. جيىن-تويدى ۋاقىتشا توقتاتاتىن كەز كەلدى، مىنا زامان وندايدى كوتەرمەيدى. قاۋىپ ءتونىپ تۇرعاندا توي تويلاۋ اقىلعا سىيمايدى.

بۇگىنگى ۋاقىت ەسەپ ايىرىساتىن، وكپە قۋاتىن نە ءبىرىن-ءبىرى تۇرتپەكتەيتىن كەزەڭ ەمەس. بۇل ءبارىمىز قوسىلىپ، بۇكىل حالىق بولىپ ءومىر ءۇشىن كۇرەسەتىن، ولىمگە قارسى تۇراتىن، ءبىر اتانىڭ بالاسىنداي جۇمىلىپ، مىنا دەرتتەن تەزىرەك قۇتىلۋدىڭ قامىن جاسايتىن كەزەڭ. بىرىمىزگە ءبىرىمىز سۇيەنىش، تايانىش بولۋىمىز كەرەك. بۇگىنگى قالىپتاسقان جاعدايدى كورىپ وتىرىپ جانىم اۋىرادى. بار قولىمنان كەلەتىنى سوزبەن، ولەڭ-جىرمەن حالىققا جىگەر بەرۋ. سوسىن تارتىپكە باعىنىپ، ۇيدە وتىرۋ. بۇل – ىندەتتى ارى قاراي تاراتپاۋدىڭ ءتيىمدى جولى. ەتەك-جەڭىمىزدى جيناپ، بارىنشا ساقتانۋىمىز كەرەك. اللا بالە-جالادان ساقتاسىن. جاقىنىنان ايىرىلعان بارلىق وتباسىنا كوڭىل ايتامىن. ومىردەن وزعان باۋىرلارىمىزدىڭ الدى جارىق، ارتى قايىرلى بولسىن.

سوڭعى جاڭالىقتار