12 شىلدە, 17:44 427 0 جاڭالىقتار انار لەپەسوۆا

COVID-19: بەلگيا ىندەتتىڭ ەكىنشى تولقىنىنا دايىندالۋدا

بەلگيادا شەكتەۋ شارالارى كۇشەيتىلدى. بۇرىن ەل تۇرعىندارى ماسكانى تەك قوعامدىق كولىكتەردە كيۋگە مىندەتتەلسە، بۇدان بىلاي الەۋمەتتىك قاشىقتىقتى ساقتاۋ قيىندىق تۋدىراتىن بارلىق جابىق عيماراتتاردا تاعۋى ءتيىس.

اتاپ ايتقاندا، دۇكەندەر، كينوتەاترلار جانە  كىتاپحانالارعا بەتپەردەسىز كىرۋگە تىيىم سالىنادى.

ەل ۇكىمەتى بەكىتكەن تالاپتاردى ورىنداماعان ازاماتتارعا 250 ەۋرو، ال كاسىپورىندارعا 750 ەۋرو ايىپپۇل سالىنادى. تالاپ بۇزۋ دەرەكتەرى بىرنەشە مارتە قايتالانعان جاعدايدا دۇكەندەر جابىلۋى مۇمكىن.

بۇگىندە ءولىم-ءجىتىم سانى بويىنشا بەلگيا الەم ەلدەرى اراسىندا كوش باستاپ تۇر. قايتىس بولعانداردىڭ 40 پايىزعا جۋىعى COVID-19-عا تەست تاپسىرماعان. الايدا ماماندار ولاردى كوروناۆيرۋستان كوز جۇمدى دەگەن بولجام جاساپ وتىر.

«ءبىز اۋرۋلاردى باقىلاۋ جانە الدىن الۋ بويىنشا ەۋروپا ورتالىعىنىڭ ۇسىنىستارىن ورىندادىق. ياعني راستالعان عانا ەمەس، سونىمەن بىرگە بارلىق كۇدىكتى جاعدايلار تۋرالى دا حابارلاندى. قارتتار ۇيىندەگى كوپتەگەن ناۋقاس جاسى كەلگەندىكتەن كوز جۇمدى ما، جۇرەگى، وكپەسى اۋىردى ما، الدە COVID-19 بولدى ما؟ ول جاعى بەلگىسىز. كوروناۆيرۋستان قايتىس بولۋى دا مۇمكىن. سەبەبى ولاردىڭ دەنى تىنىس الۋ جولدارىنا شاعىمدانعان»، - دەيدى بەلگيانىڭ دەنساۋلىق ساقتاۋ ءمينيسترى مەگگي دە بلوك.

اق حالاتتىلار جەرگىلىكتى حالىق جازعى دەمالىستان ورالعان ساتتە ىندەتتىڭ ەكىنشى تولقىنى باستالا ما دەپ قاۋىپتەنەدى. سەبەبى بەلگيا شەكارالارىن اشقان كوپتەگەن ەلدە ەپيدەميولوگيالىق جاعداي كوڭىل كونشىتپەيدى. ەلگە «قىزىل ايماقتان» ورالعان بەلگيالىقتار ەكى اپتالىق كارانتيندى ساقتاۋى شارت.

ايتا كەتەيىك، بۇعان دەيىن وزبەكستاندا كارانتين كۇشەيتىلەتىنىن حابارلاعانبىز. ەلدە 18-19 شىلدە جانە 25-26 شىلدە (سەنبى جانە جەكسەنبى) كۇندەرى كولىك قۇرالدارىنىڭ، سونىڭ ىشىندە تاكسي قىزمەتتەرىنىڭ قوزعالىسى تولىعىمەن توقتايدى.

سوڭعى جاڭالىقتار