12 شىلدە, 14:19 574 0 ايماق انار لەپەسوۆا

تۇرىك ينۆەستورلارى جامبىل وبلىسىنا گۋمانيتارلىق جۇك جىبەردى

كوروناۆيرۋس پاندەمياسىنىڭ تارالۋىنا قارسى كۇرەس شارالارى اياسىندا قازاقستاندا جۇمىس ىستەيتىن بىرقاتار تۇرىك ينۆەستورلارى جامبىل وبلىسىنا گۋمانيتارلىق كومەكتىڭ جاڭا پارتياسىن جىبەردى. 

اتاپ ايتساق، «Tek-imas» كومپانياسى جامبىل وبلىسىنا بەس وتتەگى كونتسەنتراتورىن جىبەردى. قۇرىلعىلار تاراز قالاسىنداعى كوپسالالى كلينيكالىق اۋرۋحانانىڭ پۋلمونولوگيا بولىمىنە جەتكىزىلدى. بۇل تۋرالى وبلىس اكىمىنىڭ ءباسپاسوز قىزمەتى حابارلادى.

وتتەگى تەراپياسى كەزىندە قولدانىلاتىن وتتەگى كونتسەنتراتورلارى كوروناۆيرۋس ينفەكتسياسىمەن جانە پنەۆمونيامەن اۋىرىپ جاتقان ناۋقاستارعا ۋاقتىلى كومەك كورسەتۋدە ماڭىزدى ءرول اتقارادى.

سونداي-اق، «Orhun Medical» جانە «Yildiz Holding» تۇرىك ينۆەستورلارى پاندەميامەن كۇرەستە الدىڭعى قاتارداعى جامبىلدىق مەديتسينا قىزمەتكەرلەرىنە 450 قورعانىس كيىمىن جيىنتىعىن (قورعانىس جامىلعىسى، قولعاپ، ماسكا، قالقان جانە ت.ب.) جىبەردى.

گۋمانيتارلىق كومەك پارتياسى وڭىرگە كەلەسى اپتادا جەتەدى. جۇك «Air Astana» قولداۋىمەن قازاقستانعا جەتكىزىلمەك.

شۇعىل گۋمانيتارلىق كومەگى ءۇشىن تاراز قالاسىنىڭ قالالىق كوپبەيىندى كلينيكالىق اۋرۋحاناسىنىڭ باسشىلىعى تۇرىك تاراپىنا جانە قازاقستاننىڭ تۇركياداعى ەلشىلىگىنە شىن جۇرەكتەن ريزاشىلىعىن بىلدىرەدى. بۇل كومەك تۇركيا مەن قازاقستان حالىقتارى اراسىنداعى دوستىق پەن سەنىمدىلىكتىڭ دالەلى.

«جامبىلدىق دارىگەرلەر باۋىرلاس حالىقتىڭ كومەگىن ريزاشىلىقپەن قابىلداپ، مۇنى COVID-19 اۋرىمەن كۇرەس كەزىندە ىنتىماقتاستىقتىڭ ايقىن كورىنىسى دەپ سانايدى. كومەك تەك شەتەلدەن عانا ەمەس، سونىمەن قاتار جەرگىلىكتى ۇيىمداردان دا، جاناشىر تۇلعالاردان دا كەلۋدە»، - دەدى تاراز قالالىق كوپ بەيىندى كلينيكالىق اۋرۋحانانىڭ باس دارىگەرىنىڭ ورىنباسارى ەربول وردابەكوۆ.

ازاماتتار وسىناۋ قيىن مىندەتتى اتقارىپ جاتقان دەنساۋلىق ساقتاۋ سالاسى قىزمەتكەرلەرىنە بارىنشا كومەكتەسۋگە تىرىسۋدا. دارىگەرلەر «ەسكۋلاپ» ەمدەۋ ورتالىعىنىڭ ديرەكتورى ولەگ راتنيكوۆقا NewPort HT-70 تىنىس الۋ اپپاراتىن تارتۋ ەتكەنى ءۇشىن العىس بىلدىرەدى.

سونداي-اق، تاراز قالالىق كوپبەيىندى كلينيكالىق اۋرۋحاناسىنىڭ رەانيماتسيا جانە پۋلمونولوگيا ءبولىمىنىڭ دارىگەرلەرى مەن مەديتسينالىق قىزمەتكەرلەرى كاسىپكەرلەر اقىلبەك سادىرباەۆ پەن باحروم مۋمينوۆقا ىستىق تۇسكى اس جەتكىزگەنى ءۇشىن العىس ايتادى.

ايتا كەتۋ كەرەك، وبلىس اكىمىنىڭ تاپسىرماسى بويىنشا دەنساۋلىق ساقتاۋ باسقارماسى قازىرگى تاڭدا قوسىمشا توسەك دايىنداپ، ءدارى-دارمەكتەر مەن مەديتسينالىق جابدىقتار ساتىپ الۋدا.

بۇگىندە وبلىستىڭ مەديتسينالىق مەكەمەلەرىندە 70 وتتەگى كونتسەنتراتورى بار. بىرەر كۇن بۇرىن دەمەۋشىلەر ەسەبىنەن قوسىمشا 11, ال جەرگىلىكتى بيۋدجەتتەن تاعى 4 وتتەگى كونتسەنتراتورى ساتىپ الىندى. وبلىستىڭ مەديتسينالىق مەكەمەلەرىندە بارلىعى 146 وكپەنى جاساندى جەلدەتۋ ء(وجج) اپپاراتى بار. جاقىندا جەرگىلىكتى جانە رەسپۋبليكالىق بيۋدجەت ەسەبىنەن ساتىپ الىنعان 62 ءوجج اپپاراتى جەتكىزىلەدى دەپ كۇتىلۋدە.

 

سوڭعى جاڭالىقتار