12 شىلدە, 11:29 1317 0 جاھان انار لەپەسوۆا

COVID-19: رەسەيلىك ۆاكتسينانىڭ كلينيكالىق سىناعى ءساتتى اياقتالدى

كوروناۆيرۋسقا قارسى رەسەيلىك ۆاكتسينانىڭ كلينيكالىق سىناعى ءساتتى اياقتالدى. بۇل تۋرالى سەچەنوۆ ۋنيۆەرسيتەتىنىڭ ترانسلياتسيالىق مەديتسينا جانە بيوتەحنولوگيالار ينستيتۋتىنىڭ ديرەكتورى ۆاديم تاراسوۆ مالىمدەدى، دەپ حابارلايدى ريا نوۆوستي

– سەچەنوۆ ۋنيۆەرسيتەتى كوروناۆيرۋسقا قارسى الەمدەگى ەڭ العاشقى ۆاكتسينانىڭ ەرىكتىلەرگە جاسالعان سىناعىن ءساتتى اياقتادى، – دەدى تاراسوۆ.

ونىڭ ايتۋىنشا، 15 شىلدەدە ەرىكتىلەردىڭ العاشقى توبى، 20 شىلدەدە ەكىنشى توپ اۋرۋحانادان شىعارىلادى.

سەچەنوۆ ۋنيۆەرسيتەتىنىڭ مەديتسينالىق پارازيتولوگيا، تروپيكالىق جانە ءترانسميسسيۆتى اۋرۋلار ينستيتۋتىنىڭ ديرەكتورى الەكساندر لۋكاشەۆتىڭ ايتۋىنشا، بۇل كەزەڭنىڭ نەگىزگى مىندەتى پرەپاراتتىڭ ادام دەنساۋلىعىنا قاۋىپسىزدىگىن دالەلدەۋ بولدى.

سىناقتىڭ كەيبىر قاتىسۋشىلارىندا العاشقى كۇندەرى دەنە قىزۋى كوتەرىلگەن، ەكپەنىڭ باسقا كەرى اسەرى بايقالماعان. دارىگەرلەردىڭ ايتۋىنشا، بارلىق ەرىكتىلەر وزدەرىن جاقسى سەزىنەدى.

الايدا ۇزاققا سوزىلعان وقشاۋلانۋدىڭ سالدارىنان قاتىسۋشىلاردىڭ كەيبىرىنىڭ پسيحولوگيالىق جاعدايى وزگەرىپتى. تاراسوۆتىڭ سوزىنشە، ەرىكتىلەردىڭ اراسىندا كيكىلجىڭدەر تۋا باستاعاندىقتان، ولارمەن پسيحولوگ جۇمىس ىستەگەن.

اۋرۋحانادان شىققاننان كەيىن دارىگەرلەر سىناققا قاتىسۋشىلاردى باقىلاۋدى جالعاستىرا بەرمەك. ونداعى ماقسات – ولاردىڭ يممۋنيتەتىندەگى وزگەرىستەردى قاداعالاۋ.

سوڭعى جاڭالىقتار