10 شىلدە, 18:47 553 0 جاڭالىقتار اسىل تۇمار

ءدارى-دارمەك جەتكىزۋشىلەردى نەسيەلەندىرۋ ءۇشىن 5 ملرد تەڭگە ءبولىندى

الماتى اكىمى باقىتجان ساعىنتاەۆ بۇگىن جۇمىس كەڭەسى بارىسىندا فارميندۋستريا وكىلدەرىمەن مەگاپوليسكە ءدارى-دارمەكتەردى جەتكىزۋ ماسەلەسىن تالقىلادى.

«دارىلىك پرەپاراتتارعا سۇرانىستى قامتاماسىز ەتۋ جانە جەدەل جاعداي بويىنشا قاجەتتى شارالاردى تالقىلاۋ ءۇشىن فارميندۋستريا وكىلدەرىمەن كەزەكتى كەزدەسۋ وتكىزدىم. كەلىپ تۇسكەن ءدارى-دارمەكتەر ءدارىحانا سورەلەرىنە ءبىر تاۋلىكتىڭ ىشىندە جەتكىزىلەدى. بۇگىن رەسەيدەن پرەپاراتتاردىڭ ءىرى پارتياسى كەلەدى. شامامەن 55 توننا دارىلىك زاتتار، سونىڭ ىشىندە COVID-19-عا قارسى – ىستىقتى تۇسىرەتىن جانە انتيكواگۋليانتتار بار. شىلدە ايىنىڭ سوڭىنا دەيىن الەۋمەتتىك ماڭىزى بار ءدارى-دارمەكتەردىڭ 4,2 ملن قاپتاماسى جەتكىزىلەدى دەپ كۇتىلۋدە»، – دەدى ب.ساعىنتاەۆ.

قول قويىلعان مەموراندۋم اياسىندا قالانىڭ بارلىق اۋداندارىنداعى 105 دارىحاناعا وتە قاجەت پرەپاراتتاردىڭ 41 ءتۇرى تۇراقتى جەتكىزىلۋدە. 1 شىلدەدەن باستاپ ءدارىحانالار الەۋمەتتىك ماڭىزى بار 581 مىڭ ءدارى-دارمەك قاپتاماسىن الدى. جالپى، بۇگىنگى كۇنى 105 ءدارىحانا مەن جەتكىزۋشىلەردىڭ قويمالارىندا 1,8 ملن قاپتاماداعى قاجەتتى ءدارى-دارمەكتەر بار.

سونىمەن قاتار، قالا اكىمى دارىلىك پرەپاراتتاردىڭ تۇراقتى قورىن جاساۋ جونىندەگى جوبانى جۇزەگە اسىرۋ تۋرالى ايتتى.

«كەلەسى قادام – دارىلەردىڭ تۇراقتاندىرۋ قورىن قۇرۋ. ءدارى-دارمەك جەتكىزۋشىلەردى 6-8 اي مەرزىمگە پايىزسىز نەسيەلەندىرۋ ءۇشىن 5 ملرد تەڭگە ءبولىندى. بۇل – ءدارى-دارمەكتەردى اعىمداعى باعا بويىنشا ساتىپ الىپ، نارىقتىڭ قۇبىلمالى جاعدايىنا بايلانىستى بىرتىندەپ پايدالانۋعا بەرۋ ءۇشىن جاسالدى»، – دەدى قالا اكىمى.

سونداي-اق، اتالعان 105 دارىحاناعا كۇن سايىن مونيتورينگ جۇرگىزىلەدى.

سوڭعى جاڭالىقتار