9 شىلدە, 20:17 1295 0 ايماق انار لەپەسوۆا

وسكەمەن پوليتسياسىنىڭ باستىعى كوز جۇمدى

وسكەمەن پوليتسيا باسقارماسىنىڭ باستىعى ءداۋىر ىبىراەۆ قايتىس بولدى. بۇل تۋرالى شىعىس قازاقستان وبلىسى پوليتسيا دەپارتامەنتىنىڭ ءباسپاسوز قىزمەتى حابارلادى. 

ۆەدومستۆونىڭ مالىمەتىنشە، قالانىڭ باس پوليتسەيى دەنساۋلىعىنا بايلانىستى ەڭبەك دەمالىسىندا بولعان. ول بۇگىن ومىردەن وتكەن.

"وسكەمەن قالاسى پوليتسيا باسقارماسىنىڭ باستىعى ىبىراەۆ ءداۋىر بولاتۇلىنىڭ قايتىس بولعانى تۋرالى ۇلكەن وكىنىشپەن حابارلايمىز", – دەلىنگەن وبلىستىق پد ءباسپاسوز قىزمەتىنىڭ حابارلاماسىندا.

پوليتسيا پولكوۆنيگى ءداۋىر ىبىراەۆ – سەمەي قالاسىنىڭ تۋماسى. ۆەدومستۆولىق جوعارى وقۋ ورنىن بىتىرگەن سوڭ 2000 جىلدان بەرى شىعىس قازاقستان وبلىسى جەدەل-تەرگەۋ بولىمشەلەرىندە قىزمەت ەتكەن.

سونىمەن قاتار بورودۋليحا جانە شەمونايحا اۋداندارىنىڭ ىشكى ىستەر بولىمدەرىن باسقارعان. 2016 جىلدان بەرى وسكەمەن قالاسى پوليتسيا باسقارماسىنىڭ باستىعى بولىپ قىزمەت اتقاردى.

قىزمەت بارىسىندا ءوزىن جوعارى ءتارتىپتى جانە بىلىكتى وفيتسەر رەتىندە كورسەتتى، قىلمىستىڭ الدىن الۋعا، قوعامدىق ءتارتىپتى قورعاۋعا، قىلمىستىق قۇقىق بۇزۋشىلىقتاردىڭ الدىن-الۋعا جانە جولىن كەسۋگە ەلەۋلى ۇلەس قوسقان. ءوزىنىڭ كاسىبي بىلىكتىلىگىمەن، ۇيىمداستىرۋشىلىق قابىلەتىمەن ارىپتەستەرى مەن ازاماتتار اراسىندا لايىقتى بەدەلگە جانە قۇرمەتكە يە بولدى.

سوڭعى جاڭالىقتار