9 شىلدە, 15:02 342 0 قوعام انار لەپەسوۆا

جۇيەلى جۇمىستار قولعا الىنۋى كەرەك

پرەزيدەنت كەشەگى تەلەۆيزيالىق ۇندەۋىندە كوروناۆيرۋس ىندەتىنە قارسى قولعا الىنعان شارالارعا جان-جاقتى توقتالىپ، ءتۇسىندىردى، حالىققا دەمەۋ ءسوزىن ايتتى.

ق.ك. توقاەۆ سوزىندە «مەملەكەتتىك كوميسسيانىڭ شەشىمىمەن 5 شىلدەدەن باستاپ ەلىمىزدە ەكى اپتالىق مەرزىمگە كارانتين شارالارى ەنگىزىلدى. بۇل اسا قاجەتتى شەشىم بولدى» دەدى.

تاجىريبە كورسەتكەندەي، كارانتين ىندەتپەن كۇرەستىڭ ەڭ ءتيىمدى ءتاسىلى ەكەنىن تولىق دالەلدەدى. سول سەبەپتى ىندەت تاراعان مەملەكەتتەردىڭ باسىم بولىگى وسى تاسىلگە جۇگىندى جانە ولاردىڭ ىشىندە قازاقستان دا بار.

قازىرگى تاڭدا دەنساۋلىق ساقتاۋ جۇيەسىنىڭ ىندەتپەن كۇرەستە كەيبىر قاتەلىكتەرگە بوي الدىرعانى انىقتالىپ وتىر. اسىرەسە، جەدەل جاردەم شاقىرتۋدىڭ قيىندىعى، سىرقاتتاردى اۋرۋحانالارعا جاتقىزۋدىڭ وتە قيىن پروتسەسكە اينالۋى، ءدارى-دارمەكتەردىڭ، قورعانۋ قۇرالدارىنىڭ تاپشىلىعى حالىقتى قاتتى كۇيزەلتۋدە. اقپاراتتىق جۇمىستاردىڭ، اسىرەسە مەديتسينا ماماندارىنىڭ كەڭ كولەمدە اقپاراتتىق كەڭىستىككە شىعۋى قامتاماسىز ەتىلمەگەنىن كورە الامىز. وسى باعىتتا جۇيەلى جۇمىستار قولعا الىنۋى كەرەك دەپ سانايمىن. بۇل تۋرالى پرەزيدەنتىمىز دە ايتىپ ءوتتى. دەگەنمەن، ءبىزدىڭ دارىگەرلەرىمىز ىندەتپەن كۇرەستە بار ءبىلىمى مەن بىلىكتىلىگىن پايدالانىپ، جان اياماي ەڭبەك ەتىپ جاتىر، سول ءۇشىن ءبىز ولارعا شەكسىز العىس ايتامىز.

مەديتسينا جۇمىسىن ۇيىمداستىرۋدا وڭىرلەرگە، اسىرەسە اۋىلدىق جەرلەرگە نازار اۋدارىلۋى اسا ماڭىزدى. مەملەكەت باسشىسى حالىقتى تەستىلەۋ شارالارىن ارتتىرۋ ماقساتىندا قوسىمشا 20 پتر-اناليزاتور ساتىپ الىنىپ جاتقانىن جانە اۋىلدىق ەلدىمەكەندەردى قوسا العاندا پتر تەستىلەۋ ءۇشىن 8 ءموبيلدى ورتالىق قۇرىلىپ جاتقانىن ايتتى. قازىرگى تاڭدا حالقىمىزدىڭ 40 %-دان استامى اۋىلدىق جەرلەردە تۇرادى، سوندىقتان بۇل ماڭىزدى قادام دەپ ەسەپتەيمىن.

سونىمەن قاتار ءتۇرلى جەلىلەر ارقىلى كوپتەگەن جالعان اقپاراتتاردىڭ تارالۋى توقتاماي تۇر. بۇعان «ينفودەميا» دەگەن اتاۋ دا بەرىپ ۇلگەردىك. بۇل ىندەتپەن كۇرەستە قوسىمشا كەدەرگىلەر تۋىنداتىپ وتىر. سوندىقتان، حالقىمىزدى تەك رەسمي اقپاراتقا سەنىپ، سابىرلى بولۋعا شاقىرعىم كەلەدى.

دينار نوكەتاەۆا، 

پارلامەنت سەناتىنىڭ دەپۋتاتى

 

سوڭعى جاڭالىقتار