9 شىلدە, 13:16 543 0 دەنساۋلىق انار لەپەسوۆا

دارىگەر تاپشى، ءدارى قات

كوروناۆيرۋس ءال بەرمەي بارادى. قاتەرلى ۆيرۋستىڭ كەسىرىنەن ءورشي تۇسكەن پنەۆمو­نيا دەرتى دە تالايدى قىسپاققا الدى. قابىنعان وكپەسىنە داۋا تابا الماي، كەلمەستىڭ كەمەسىنە ءمىنىپ كەتكەندەر كۇرت كوبەيدى. اۋرۋحانالاردا ورىن، ءدارىحانالاردا ءدارى قات. ۇشاقتار، قالاارا­لىق تاكسيلەر وسى كۇنى جولاۋشى ەمەس، ءدارى تا­سىمالداپ ءجۇر. جاقىنىنىڭ جانىنا اراشا بولۋ ءۇشىن ءدارى-دارمەك ىزدەپ سەندەلگەندەر شا­رىقتاعان باعاعا شامىرقانار كۇيدە ەمەس. تاپقانىنا قۋانادى. تاپپاعاندار ءدارىحا­نا­لاردى قويىپ، قويمالاردى جاعالاپ ءجۇر. ەل ءىشىن­دە ەپيدەميولوگيالىق احۋالدىڭ ۋشىق­قانىنا سىرتتاعىلار دا قانىعىپ ۇلگەردى. The New York Times سوڭعى ەكى اپتادا قازاقستان كو­رو­ناۆيرۋس ينفەكتسياسىنىڭ تارالۋى بويىنشا الەمدە كوش باستاپ تۇرعانىن حابارلادى.

 

رەسمي ءھام بەيرەسمي ستاتيستيكا

ەلىمىزدىڭ ىندەت جۇقتىرعاندار سانى­نىڭ ءوسىمى جونىنەن الەمدە الدىڭعى ورىن­عا شىعۋ سەبەبىن دەنساۋلىق ساقتاۋ مي­نيسترى الەكسەي تسوي ءتۇسىندىردى. مي­نيستر­دىڭ ايتۋىنشا، ستاتيستيكانىڭ كۇرت كو­بەيۋىنە ناۋقاستاردى تىركەۋ ءادىسىنىڭ وزگەرۋى سەبەپ.

«ءيا، مۇنداي مونيتورينگتى ءتۇرلى ۇيىم­دار جۇرگىزەدى. ءوزىم دە تانىستارىمنان قازاقستان قىزىل تاڭبامەن بەلگىلەنىپ، «ەلىمىزدە ءوسىم جوعارى» دەلىنگەن شامامەن 100 سۋرەت الدىم. مۇقيات وقىساڭىزدار، ەڭ الدىمەن اعىلشىن تىلىندە جاريالانعان بۇل اقپاراتتا سوڭعى 2 اپتاداعى ءوسىم جايىن­دا ايتىلعان. وزدەرىڭىز بىلەسىزدەر، ءبىز قازىرگى ۋاقىتتا سيمپتومى بار جانە سي­مپتومسىز ناۋقاستاردى قوسىپ، ءبارىن بىرگە سانايتىن بولدىق. ويتكەنى سيمپ­تومسىز ەكەنىنە قاراماستان، ول پاتسيەنت ۆيرۋس تاراتۋشى سانالادى جانە ولار ايرىقشا نازار اۋدارۋدى قاجەت ەتەدى. سوندىقتان اتالعان ءادىستى وزگەرتۋدىڭ ءنا­تيجەسىندە ۆيرۋس جۇقتىرعان پاتسيەنتتەردىڭ سانى ستاتيستيكاعا سالعاندا تسيفرلىق تۇر­عىدا وزگەرىسكە ۇشىرادى»، – دەدى مي­نيستر ورتالىق كوممۋنيكاتسيالار قىز­مەتىندە وتكەن بريفينگ بارىسىندا.

الەكسەي تسويدىڭ سوزىنشە، قازىرگى ۋاقىتتا ەلىمىزدە كۇن سايىن ورتا ەسەپپەن 1,5 مىڭنان استام ادامنان كوروناۆيرۋس انىقتالىپ، تۇراقتى ستاتيستيكا ساقتالىپ تۇر. ياعني، مينيستر سوڭعى ەكى اپتانىڭ ىشىندە ەلىمىزدە ىندەت جۇقتىرعاندار سانىنىڭ كۇرت ارتىپ كەتكەنىن جوققا شىعارىپ وتىر. الايدا دارىگەرلەر قاتەرلى ىندەتكە شالدىققاندار سانى رەسمي ستاتيستيكادان 4-5 ەسە كوپ دەگەن پىكىردە. مەديتسينا عىلىمدارىنىڭ كانديداتى، نەۆرولوگ-دارىگەر قايىرعالي كونەەۆ اۋرۋ­حاناعا بارماي، ءوز بەتىنشە ەمدەلىپ جات­قانداردىڭ تىم كوپ ەكەنىن العا تارتادى.

«اۋىرعاندار سانى وتە كوپ. كوبى سى­ناما جاساتپاي-اق، ۇيدە ءبىر نەمەسە ەكى اپتا جاتىپ، ءوز بەتىنشە ەمدەلدى. ولار رەسمي ستاتيستيكاعا كىرمەگەن. سوندىقتان مەن سيمپ­تومدى، سيمپتومسىز اۋىرعان ادام­داردىڭ سانىن 150-170 مىڭعا جەتتى دەپ سانايمىن. كوروناۆيرۋس ەمىن-ەركىن تاراپ كەتتى»، – دەيدى دارىگەر.

قايىرعالي كونەەۆتىڭ ايتۋىنشا، سوڭ­عى ۋاقىتتا پنەۆمونياعا شالدىققان­دار­دىڭ تەست ناتيجەسىنەن كوروناۆيرۋس انىق­تالا بەرمەيدى. مينيسترلىك رەسمي ستا­تيستيكاعا پتر-تەستىلەۋ راستاعان جاع­داي­لاردى عانا ەنگىزەتىنى بەلگىلى. الايدا دارىگەر ءدال قازىرگى ۋاقىتتا COVID-19-دان باسقا وكپەنىڭ قابىنۋىنا اپارىپ سوعاتىن ينفەكتسيا جوق دەگەن پىكىردە.  مۇنى ەلىمىزدىڭ باس مەملەكەتتىك سانيتارلىق ءدارى­گەرى ايجان ەسماعامبەتوۆا دا مويىن­دادى. «پتر-تەستىلەۋ كەزىندە پنەۆمونيامەن اۋىرعان ادامداردىڭ ناتيجەسى سوڭعى ۋاقىتتا كوروناۆيرۋس جوق دەپ كورسەتىپ ءجۇر. بۇل زاڭدى، سەبەبى كوروناۆيرۋس ينفەك­تسياسى ادامنىڭ جوعارعى تىنىس الۋ جولدارىنان تومەنگى تىنىس الۋ جولىنا ءوتىپ كەتكەن كەزدە تەست ۆيرۋستى تابا الماي­دى»، – دەيدى ا.ەسماعامبەتوۆا.

قازاقستاندا وتكەن جىلدىڭ العاشقى جارتىجىلدىعىندا پنەۆمونيادان 1 780 ادام، ال 2020 جىلدىڭ التى ايىندا 1 772 ادام قازا تاپقان. ءبىر قاراعاندا، كورونا­ۆيرۋس پاندەمياسى تىركەلمەگەن ۋاقىت پەن پاندەميا باستالعان ۋاقىتتا كوز جۇمعان ادامداردىڭ ستاتيستيكاسىندا ايتارلىق­تاي ايىرماشىلىق جوق. الايدا دارىگەرلەر­دىڭ الاڭداۋشىلىعىن تۋدىرىپ وتىرعان جايت – بيىلعى 1 772 ءولىمنىڭ 628-ءى ماۋسىم ايىندا تىركەلگەن.

دەنساۋلىق ساقتاۋ مينيسترلىگىنىڭ دەرەگىنشە، 2020 جىلى پنەۆمونيامەن اۋىرعاندار سانى وتكەن جىلمەن سالىس­تىرعاندا 55 پايىزعا ارتىپ، 98 646-عا جەتتى. وتكەن ايدا وكپە دەرتىنە شالدىعۋ­دىڭ 32 724 جاعدايى تىركەلگەن. وتكەن جىل­دىڭ ءدال وسى ۋاقىتىندا بۇل كورسەتكىش 7 964 ادامدى قۇراعان. پنەۆمونيامەن اۋىر­عاندار كۇرت ارتقاندىقتان، مينيستر­لىك وتكەن اپتادا ءوز حاتتاماسىنا «كورونا­ۆيرۋس بولۋى مۇمكىن» دەگەن تۇسىنىك ەنگىزدى. بۇدان بىلاي پنەۆمونياعا شالدىققان­دارعا COVID-19-عا  قارسى ەم جۇرگىزىلەدى.

ءدارى-دارمەك تاپشىلىعىن تۋدىرعان كىم؟

ەل اۋرۋحانالارىندا ورىن قات بولعان­دىقتان، ينفەكتسيالىق توسەك-ورىندارعا تەك سىرقاتى اۋىرلار عانا جاتقى­زىلا­تىن­دىقتان، كوروناۆيرۋس بەلگىسى بار نا­ۋ­قاستار وسى كۇنى تەست تاپسىرۋعا دا، ەمحانا جا­عالاۋعا دا قۇلىقسىز. ءبىرى تانىس دارىگەرىنىڭ، ەندى ءبىرى ىندەتتەن ايىققان تۋعان-تۋى­سىنىڭ اقىل-كەڭەسىنە قۇلاق ءتۇرىپ، ءوزىن-ءوزى ەمدەۋدە. الايدا سوڭعى اپتالاردا ءدارىحا­نالاردان باسقانى بىلاي قويعاندا، دەنە قىزۋىن تۇسىرەتىن دارىلەردىڭ ءوزىن تابۋ قيىن. بۇرىندارى كەز كەلگەن ءدارىحانادان تابىلاتىن پاراتسەتامول، اسپيرين سەكىلدى دارىلەر قازىر قاسقالداقتىڭ قانىنداي قات. ۆيرۋسقا قارسى پرەپاراتتار ىزدەپ سابىلعان جۇرت ساعاتتاپ ءدارىحانا الدىندا كەزەك كۇ­تۋ­دە. تابىلعان كۇننىڭ وزىندە باعاسى ادەت­تە­گىدەن 2-3, كەيبىر جەردە ءتىپتى 10 ەسە شارىق­تاپ كەتكەن. ەلىمىزدە ىندەت العاش تارالا باستاعان شاقتا جۇرتتى بەتپەر­دەنىڭ تاپشىلىعى مەن قىمباتتىعى قالاي سەندەلتسە، كەسىرلى كەسەل ورشىگەن بۇگىنگى كۇنى ءدارىنىڭ جەتىسپەۋشىلىگى ءھام باعاسىنىڭ شارىقتاۋى جىعىلعانعا جۇدىرىق بولىپ تۇر.

بۇل ماسەلە مەملەكەت باسشىسىنىڭ قۇلا­عىنا جەتىپ، وتكەن اپتانىڭ سوڭىندا قاسىم-جومارت توقاەۆ ۇكىمەتكە ءدارى-دارمەكتەردىڭ نەگىزسىز قىمباتتاۋىنا جول بەرگەندەردى جازالاۋدى تاپسىردى. «ازا­ماتتارىمىزدىڭ دارىحانالارداعى اسا قاجەتتى ءدارى-دارمەكتەردىڭ نەگىزسىز قىم­باتتاۋىنا بايلانىستى شاعىمدارى ورىن­دى. پاندەميا كەزىندە بۇعان جول بەرۋگە بول­مايدى. ۇكىمەت پەن قۇقىق قورعاۋ ور­گاندارىنا اتالعان ماسەلەنى رەتتەۋ تاپ­سى­رىلدى. كىنالىلەر جاۋاپقا تارتىلادى»، – دەدى پرەزيدەنت.

مەملەكەت باسشىسىنىڭ تاپسىرماسى­نان كەيىن ءباسپاسوز ءماسليحاتىن وتكىزگەن ۆيتسە-پرەمەر ەرالى توعجانوۆ ءدارى-دارمەك تاپشىلىعىنىڭ تۋىنا نە سەبەپ بولعانىن ءتۇسىندىردى.

«بۇگىندە حالىقتى تولعاندىرعان ماڭىز­دى ماسەلە – ءدارىحانالاردى ءدار-ءدار­مەكپەن قامتاماسىز ەتۋ. قازىرگى ۋاقىتتا بىرقاتار سەبەپكە بايلانىستى ءدارىحانا­لاردا ءدارى تاپشىلىعى شىنىمەن بايقا­لىپ وتىر. بىرىنشىدەن، ادامدار ءدارى-ءدار­مەكتى جاپپاي ساتىپ الۋىنان حالىق تا­راپىنان سۇرانىس جوعارى بولىپ تۇر. كەي ازاماتتارىمىز ونداپ، ءتىپتى ودان دا كوپ وراما پاراتسەتامول مەن وزگە دە دارىلەردى بىردەن ساتىپ الادى»، – دەدى ە.توعجانوۆ.

ۇكىمەت باسشىسى ورىنباسارىنىڭ دەرەگىنشە، الماتى قالاسىندا مامىر ايىن­دا 1 ايدىڭ ىشىندە نەبارى 50 مىڭ پاراتسەتامول وراماسى ساتىلسا، قازىرگى ۋاقىتتا 1 تاۋلىكتىڭ ىشىندە عانا 100 مىڭ پاراتسەتامول وراماسى ساتىلىپ كەتكەن. ءدال وسىنداي جاعداي دەنە قىزۋىن ولشەي­تىن اسپاپقا دا قاتىستى بولىپ وتىر. ايتا­لىق، الماتىدا 1 جىلدىڭ ىشىندە 100 مىڭ قىزۋ ولشەگىش ساتىلاتىن بولسا، قازىرگى ۋاقىتتا ءدال وسىنداي كولەم ءبىر اپتانىڭ ىشىندە ساتىلعان.

«ەكىنشىدەن، الاقول باسەكەلەستىك بار. ياعني، الىپساتارلار ءدارى-دارمەكتى كوتەرمە ساتىپ العان. وسىعان بايلانىستى قۇزىرەت­تى قۇقىق قورعاۋ ورگاندارىنا ءدارى-دارمەك پرەپاراتتارىنىڭ شەكتى باعاسىنىڭ وسۋىنە جول بەرمەۋ جونىندە تاپسىرما بەرىلدى. انىق­تالعان بارلىق فاكتىلەر بويىنشا زاڭ­نامامەن بەكىتىلگەن تارتىپپەن جاۋاپ­كەرشىلىكە تارتۋ شارالارى قابىلدانادى»، – دەدى ۆيتسە-پرەمەر.

اپتا باسىندا ىشكى ىستەر مينيسترلىگى ءدارى-دارمەكتەردىڭ باعاسىن قىمباتتاتۋ فاكتىلەرىن انىقتاۋ بويىنشا رەيدتەر وتكىزدى. رەيد بارىسىندا ءدارى-دارمەكتەردى جاپپاي ساتىپ الۋدى ۇيىمداستىرعان ادام­دار انىقتالدى. ولار ءدارى-دارمەكتىڭ ج­ا­ساندى تاپشىلىعىن تۋدىرىپ، كەيىن دارىلەردى ناقتى قۇنىنان بىرنەشە ەسە قىمبات باعاعا قايتا ساتقان. مۇنداي دە­رەك­تەر ەلىمىزدىڭ بارلىق وڭىرىندە انىق­تالدى.

ماسەلەن، ءىىم مالىمەتىنشە، نۇر-سۇلتان قالا­سىندا پوليتسەيلەر قورعانىس قۇرال­دارىن زاڭسىز ساتۋدىڭ جولىن كەستى. جەر­گىلىكتى تۇرعىننان مەديتسينالىق ماسكالار، كومبينەزوندار، تەرمومەترلەر، مەديتسي­نالىق كوزىلدىرىكتەر مەن انتيسەپتيكالىق قۇرالدار تاركىلەندى.  سونداي-اق ينتەرنەت ارقىلى حابارلاندىرۋ بەرىپ، پاراتسەتامول، ينگاۆيرين»، تسەفترياكسون»، ازيتروميتسين  سياقتى اسا قاجەتتى ءدارى-دارمەكتەردى زاڭ­سىز ساتقان ايەل ادام ۇستالدى. ەلور­داداعى ساۋدا، ويىن-ساۋىق ورتالىقتارىنىڭ ءبىرى­نىڭ تۇراعىندا ونىڭ اۆتوكولىگىنەن اتالعان دارىلىك پرەپاراتتارى بار ەكى قوراپ تا­بىلدى.

ال شىمكەنت قالاسىندا «لەۆوماك» مەديتسينالىق پرەپاراتىن 12 000 تەڭگەگە ساتقان جەرگىلىكتى تۇرعىن پوليتسياعا جەتكىزىلدى. ول ءدارى باعاسىن ءوز باعاسىنان 6 ەسە قىمباتقا ساتقان. ءدارىحانادا پرو­ۆي­زور بولىپ جۇمىس ىستەيتىن شىمكەنت قا­لاسىنىڭ تاعى ءبىر تۇرعىنى «دەكسامەتازون-ادجيو» پرەپاراتىنىڭ ءار امپۋلاسىن  5 000 تەڭگەدەن ساتقان، نەگىزگى باعاسى – 600 تەڭگە. ال تۇركىستان وبلىسىندا ەر ادام اس­كوربين قىشقىلىن 5 000 تەڭگەدەن سات­قان، ونىڭ نەگىزگى باعاسى – 250 تەڭگە. وسى­عان ۇقساس فاكتىلەر الماتى قالاسىندا، اقمولا، اقتوبە، اتىراۋ، شىعىس قازاقستان، جام­بىل، باتىس قازاقستان وبلىستارىندا انىقتالىپ وتىر. رەيدتىڭ العاشقى كۇنىندە پوليتسيا ۋچاسكەلەرىنە 21 ادام جەتكىزىلگەن.

بۇدان بىلاي كوتەرمە ساۋدا قويما­لارىن­داعى ءدارى-دارمەك قورى، باعاسى تەك­سەرى­لىپ، پرەپارات باعاسىنىڭ كوتەرىلۋىنە جول بەرمەۋ ءۇشىن ءدارىحانالاردى ارالاپ تەكسەرەتىن ارنايى مونيتورينگ توپتارى جۇمىس ىستەيتىن بولادى. ۇكىمەت حالىقتى قا­جەتتى ءدارى-دارمەكپەن ۋاقىتىلى قام­تاماسىز ەتۋگە ۋادە بەردى.

«قازاقستاندا 8 مىڭنان استام ءدارىحانا بار. وتاندىق ءوندىرىس ەسەبىنەن ولاردىڭ بار­­لىعىن 30 پايىز دەڭگەيىندە قامتا­ماسىز ەتىپ وتىرمىز. قالعانى سىرتتان يمپورت ەسەبىنەن اكەلىنەدى. سونىمەن قاتار مەملەكەت باسشىسىنىڭ تاپسىرماسىنا سايكەس، نارىقتى قاجەتتى ءدارى-دارمەكپەن قامتاماسىز ەتۋ ءۇشىن ۇكىمەت تاراپىنان بىرقاتار شارالار قابىلدانادى. اتاپ ايتقاندا، ءبىر تاۋلىك ىشىندە دارىلىك زات­تاردى اكەلۋگە بىرجولعى رۇقسات بەرۋگە ءوتى­نىم قارالۋدا. ءدارى-دارمەكتى سەرتي­فيكاتتاۋ جانە سەرتيفيكات بەرۋدىڭ جەدەل­دە­تىلگەن راسىمدەرى قولدانىلدى»، – دەدى ۇكىمەت باسشىسىنىڭ ورىنباسارى ەرالى توعجانوۆ.

سونداي-اق ۆيتسە-پرەمەر قازاقستان اۋرۋحانالارى كوروناۆيرۋس ينفەكتسياسىن ەمدەۋ ءۇشىن قاجەتتى ءدارى-دارمەكپەن تولىق قامتا­ماسىز ەتىلگەنىن اتاپ ءوتتى. «قازىرگى ۋاقىتتا مەكەمەلەردە 17 700 ادامنىڭ جات­قانىن ەسكەرە وتىرىپ، بولاشاقتا كەپىلدىك بولۋى ءۇشىن 27 مىڭ پاتسيەنتكە دەيىن ءدارى­لىك زاتپەن قامتاماسىز ەتىلدى. مۇنىمەن توقتالىپ وتىرعان جوقپىز. ارى قاراي دا ناقتى شارالار قابىلدانىپ وتىر. ءدارى-دارمەكتى قوسىمشا ساتىپ الۋ 59 مىڭ پاتسيەنتكە دەيىن ۇلعايتىلادى»، – دەدى ول.

قاجىعان دارىگەر، دەمىككەن مەديتسينا

جارايدى، ءدارى ماسەلەسى شەشىلدى دەلىك. جانى قىسىلىپ، دەرتىنە داۋا ىزدەگەندەرگە سول دارىلەردى تاعايىندايتىن مامان­دار­دىڭ تاپشىلىعى قالاي شەشىلمەك؟ ونسىز دا اق حالاتتىلارعا ءزارۋ بولىپ وتىرعان ەل اۋرۋحانالارى كەسىرلى كەسەل ورشىگەلى ءتىپتى تىعىرىققا تىرەلدى. مەديتسينا ماماندارىنىڭ كوبى ىندەت جۇقتىرعان. رەس­پۋبليكا بويىنشا كوروناۆيرۋسقا شال­دىققانداردىڭ 11,5 پايىزى – مەديتسي­نا قىزمەتكەرلەرى. ولاردىڭ 492-سىنەن پنەۆ­مونيا انىقتالعان. ىندەت تارالعالى قا­زاقستاندا قاتەرلى ۆيرۋستان 18 دارىگەر كوز جۇمعان. ال قانشاما ايدان بەرى العى شەپ­تە جۇرگەندەر شامادان تىس جۇكتەمە­دەن، جاقىنى ءۇشىن جاعادان الۋعا دايار تۇراتىن تۇرعىنداردىڭ قىسىمىنان قاجىعان. وڭىرلەردە جۇمىسقا شىعۋدان باس تارتقان اق حالاتتىلاردىڭ قاتارى ارتىپ، ولاردىڭ ورنىن تولتىرۋ ءۇشىن دەنساۋلىق ساقتاۋ باسقارمالارى مەديتسينا ۋنيۆەرسي­تەت­تەرىنىڭ ستۋدەنتتەرىن دايارلىقتان وتكىزىپ، ىندەتتى ەمدەۋ ىسىنە جۇمىلدىرۋعا ءماجبۇر.

الماتىدا دا كوروناۆيرۋسپەن كۇرەسۋگە دارىگەرلەر جەتىسپەي جاتىر. بۇل تۋرالى قو­عامدىق دەنساۋلىق ساقتاۋ باسقارما­سى­نىڭ باسشىسى كامالجان نادىروۆ ءمالىم­دەدى. ول ءوزىنىڭ Facebook پاراقشاسى­نا اق حالاتى ابزال جاندارعا ۇندەۋ تاستاپ، ءىن­دەت­پەن كۇرەسۋ ءۇشىن دارىگەرلەر مەن ەرىك­تىلەردى اۋرۋحانالار مەن call-ورتالىق­تاردا جۇمىس ىستەۋگە شاقىردى.

«بۇگىندە مەديتسينا قىزمەتكەرلەرىنىڭ سانىن ارتتىرۋ، كادرلىق قۇرامدى كوبەيتۋ ماسەلەلەرى  ءبىرىنشى ورىندا تۇر. قازىرگى ۋا­قىتتا دارىگەرلەرگە، پروۆيزورلى جانە جۇق­پالى اۋرۋلار اۋرۋحاناسىندا قىزمەت ەتەتىن ورتا جانە كىشى مەديتسينا قىزمەت­كەر­لەرىنە، زەرتحانا ماماندارى مەن ەرىك­تىلەرگە ءزارۋ بولىپ وتىرمىز. بارشا اق حالاتتى ابزال جانداردى پاندەميانى جەڭىپ شىعۋعا اتسالىسۋعا، ىندەتكە قارسى تۇرۋ­عا شاقىرامىز»، – دەدى باسقارما باس­شىسى.

1,5 مىڭ تۇرعىنى ىندەت جۇقتىرعان اقمولا وبلىسىندا دا مەديتسينا مامان­دارى­نىڭ تاپشىلىعى ەڭ وزەكتى ماسەلەگە اينالدى. وبلىستا قاۋىپتى ىندەت تاراعانعا دەيىن دە 500-گە جۋىق دارىگەر تاپشى بول­عان. ال ەمدەۋ مەكەمەلەرىندەگى دارىگەر­لەر­دىڭ بىرىنەن سوڭ ءبىرى كوروناۆيرۋس ينفەك­تسياسىن جۇقتىرۋى تاعى 120 مەديتسينا قىزمەتكەرىنىڭ جەتىسپەۋشىلىگىن تۋىنداتىپ وتىر. اقمولا وبلىستىق دەنساۋلىق ساقتاۋ باسقارماسى وسىلاي دەپ مالىمدەمە جاسادى. ۆەدومستۆونىڭ مالىمەتىنشە، سوڭعى ۋا­قىتتا قوس وكپەسى بىردەي قابىنعان اق حا­لات­­تىلاردىڭ قاتارى ارتقان. دارىگەر تاپ­شىلىعى سەزىلگەنى سونشالىق، وتكەن اپتادا Whatsاpp الەۋمەتتىك جەلىسىندە «كوكشەتاۋ قالالىق كوپسالالى اۋرۋحا­نا­سىنا دارىگەرلەر قاجەت» دەگەن ماتىندە حا­بارلاما تاراعان.

«كوروناۆيرۋس ينفەكتسياسىمەن با­رىن­شا كۇرەسەتىن ۋاقىت جەتتى. ءبىزدىڭ اۋرۋ­حا­ناعا دارىگەرلەر شۇعىل تۇردە قاجەت بولىپ جاتىر. اسىرەسە ەپيدەميولوگ، انەستەزيولوگ، رەا­نيماتولوگ جانە جۇقپالى اۋرۋلار ءدارى­گەرلەرىنە اسا مۇقتاجبىز. بىزگە كەز كەلگەن ماماندىقتاعى دارىگەرلەر قاجەت»، – دەيدى كوكشەتاۋ قالالىق كوپسالالى اۋرۋحانا­سىنىڭ باس دارىگەرى ناريمان سىزدىقوۆ.

ازىرگە كوڭىلگە مەدەۋ قىلارىمىز – ەلى­مىز­دەگى كوروناۆيرۋسپەن كۇرەس جۇمىس­تارى­نا كومەكتەسۋ ءۇشىن رەسەيدەن ارنايى كەلگەن 32 مامان. ولاردىڭ اراسىندا ۆيرۋسو­لوگ­تار، ەپيدەميولوگتار، انەستەزيولوگتار، رەۆماتولوگتار مەن پۋلمونولوگ جانە باسقا دا بەيىندى باعىتتارداعى دارىگەرلەر بار. رسەيلىك ماماندار قازاقستاندىق ءدا­رىگەرلەرگە ىندەتپەن كۇرەسۋدە كونسۋل­تاتسيالىق جانە پراكتيكالىق كومەك كور­سەتپەك. الايدا ولاردىڭ شەكتەۋلى عانا ۋا­قىت­قا كەلگەنى تۇسىنىكتى. وزدەرىنە جۇك­تەلگەن مىندەتتى اتقارىپ، جوندەرىنە كەتەدى. كەسىرلى كەسەلدەن تىنىسى تارىلىپ، دىڭكەسى قۇرىعان وتاندىق مەديتسينانى اياقتان تىك تۇرعىزۋ، ۇلتتى ساۋىقتىرۋ وزگە ەمەس، ءوز ماماندارىمىزدىڭ ەرىك-جىگەرىنە، كۇش-قۋا­تىنا، ءبىلىم-بىلىگىنە تاۋەلدى ەكەنى تا­لاسسىز. جاھاننىڭ جارتى ميلليوننان استام تۇرعىنىن قىناداي قىرعان ىندەت قازاققا اۋىز سالعاندا عانا قاۋىپتى سەزىندىك. ەتەك-جەڭىمىزدى ەرتەرەك جيناپ، بار-جوعىمىزدى مەز­گىلىندە تۇگەندەسەك، بۇگىنگىدەي سەرگەلدەڭ­گە تۇسپەس پە ەدىك، كىم ءبىلسىن؟!.

سوڭعى جاڭالىقتار