8 شىلدە, 20:58 567 0 جاڭالىقتار انار لەپەسوۆا

دارىگەرلەر باق ارقىلى ازاماتتارعا ناقتى، ءبىرىزدى مالىمەت بەرۋى كەرەك – پرەزيدەنت

دارىگەرلەر بۇقارالىق اقپارات قۇرالدارى ارقىلى ازاماتتارعا ناقتى، ءبىرىزدى مالىمەت بەرۋى كەرەك.  بۇل تۋرالى رەسپۋبليكالىق تەلەارنالار ارقىلى ەلىمىزدە قالىپتاسقان احۋالعا بايلانىستى جاساعان ۇندەۋىندە پرەزيدەنت قاسىم-جومارت توقاەۆ ايتتى.

"بۇكىل كۇش-جىگەرىمىزدى جيناپ، ىندەتپەن كۇرەسە بەرۋىمىز كەرەك. وسىنداي كۇردەلى جاعداي كەزىندە ەل اراسىندا كوپتەگەن جالعان اڭگىمەلەر تاراۋدا، تەرىس اقپارات تاراتىپ جۇرگەن ارام پيعىلدى ادامداردىڭ ارەكەتتەرى ورىن الۋدا. وكىنىشكە قاراي، كەيبىر ازاماتتار جالعان اقپاراتقا سەنەتىن بولدى.  سونىمەن قاتار، تاعى ءبىر ماڭىزدى ماسەلە. دارىگەرلەرىمىز بۇقارالىق اقپارات قۇرالدارى ارقىلى ازاماتتارعا ناقتى، ءبىرىزدى مالىمەت بەرۋى كەرەك. دەرتتى ەمدەۋدىڭ نەشە ءتۇرلى جولدارىن كورسەتىپ، ادامداردىڭ دەنساۋلىعىنا قاۋىپ توندىرۋگە بولمايدى. مۇنداي ارەكەتتەرگە توسقاۋىل قويۋ كەرەك. قىلمىستىق كودەكستىڭ 174-بابىنا سايكەس جالعان اقپارات تاراتقان ادام جاۋاپقا تارتىلادى", - دەدى پرەزيدەنت.

سونداي-اق، مەملەكەت باسشىسى ءدارى-دارمەك باعاسىن نەگىزسىز قىمباتتاتقاندار دا جازاسىن قالمايتىنىن ەسكەرتتى.

ء"دارى-دارمەكتىڭ باعاسىن بىرنەشە ەسە ءوسىرىپ، قالىپتاسقان جاعدايدى ءوز ماقساتىنا پايدالانعىسى كەلگەن الىپساتارلاردى دا قۇقىق قورعاۋ ورگاندارى مەنىڭ تاپسىرماما سايكەس جاۋاپقا تارتا باستادى. قازىر مەملەكەتتىك ورگاندار ەلدى مەكەندەردى قاجەتتى ءدارى دارمەكپەن تولىق قامتاماسىز ەتۋدە. وسىعان وراي، ءتيىستى قور جاساقتالعان. توسەك ورىندارى دا، مەديتسينالىق قىزمەت كورسەتۋ ءىسى دە  تولىعىمەن قامتاماسىز ەتىلەدى", - دەدى ق.توقاەۆ.

ايتا كەتەيىك، بۇعان دەيىن مەملەكەت باسشىسى 13 شىلدەنى ۇلتتىق ازا تۇتۋ كۇنى دەپ جاريالاعانىن حابارلاعانبىز.

سوڭعى جاڭالىقتار