8 شىلدە, 13:34 438 0 جاڭالىقتار انار لەپەسوۆا

460 قازاقستاندىق كاسىپورىن جۇمىسشىلارىنا ۋاقتىلى جالاقى تولەمەگەن

جىل باسىنان بەرى مەملەكەتتىك ەڭبەك ينسپەكتورلارى 17 مىڭنان استام جۇمىسشىنىڭ قۇقىعىن قورعادى. بۇل تۋرالى قر ەڭبەك جانە حالىقتى الەۋمەتتىك قورعاۋ مينيسترلىگى حابارلادى.

بيىلعى 1 شىلدەدەگى جاعداي بويىنشا، رەسپۋبليكانىڭ 460 كاسىپورنىندا 18,3 مىڭ جۇمىسكەرگە 1,9 ملرد تەڭگەدەن استام سوماعا جالاقى تولەنبەگەنى انىقتالعان. مەملەكەتتىك ەڭبەك ينسپەكتورلارى اتالعان كاسىپورىنداردىڭ باسشىلارىنا 315 ۇيعارىم بەرىپ، 41,5 ملن تەڭگەدەن استام سوماعا ايىپپۇل سالعان.

«قابىلدانعان شارالار، ونىڭ ىشىندە جالاقى بويىنشا بەرەشەكتى وتەۋدىڭ قاتاڭ كەستەلەرى مەن مەرزىمدەرىن بەلگىلەۋ ناتيجەسىندە 17 مىڭنان استام قىزمەتكەردىڭ قۇقىقتارى قورعالدى. ولارعا 1,78 ملرد تەڭگە جالاقى تولەندى. جالپى، اعىمداعى جىلعى قاڭتار-ماۋسىم ايلارىندا مەملەكەتتىك ەڭبەك ينسپەكتورلارى 1,9 مىڭ تەكسەرۋ جۇرگىزىپ، قر ەڭبەك زاڭناماسىن بۇزۋدىڭ 3 مىڭ فاكتىسىن انىقتادى جانە 91,8 ملن تەڭگە كولەمىندە ايىپپۇل سالىندى»، - دەلىنگەن مينيسترلىك حابارلاماسىندا.

 

سوڭعى جاڭالىقتار