8 شىلدە, 09:06 845 0 قوعام انار لەپەسوۆا

ورالدىق كاسىپكەر وبلىستىق اۋرۋحاناعا وتتەگى كونتسەنتراتورىن تارتۋ ەتتى

ورالدىق كاسىپكەر قانات جانعازيەۆ وبلىستىق كوپبەيىندى اۋرۋحاناعا وتتەگى كونتسەنتراتورىن cىيعا تارتتى. 

«داۆيد ستروي» جشس ديرەكتورى قۇنى 2 ملن استام تەڭگەنى قۇرايتىن 3 تىنىس الۋ اپپاراتىن الىپ بەردى. وبلىستىق اۋرۋحانا ديرەكتورى ارمان بايدەۋوۆ قازىرگىدەي كۇردەلى كەزەڭدە قولۇشىن سوزىپ جاتقان جاندارعا ريزاشىلىعىن ءبىلدىرىپ، وتتەگى كونتسەنتراتورلارىنىڭ ەمدەۋ مەكەمەسىنىڭ №1, №3 جانە №8 كورپۋستارىنا ورنالاستىرىلاتىنىن جەتكىزدى.

مۇندا پروۆيزورلىق ستاتسيونارعا كۇنىنە جيىرمادان استام ناۋقاس تۇسەدى. ەندى دارىگەرلەر ەمدەلۋشىلەرگە وتتەگى كونتسەنتراتورىنىڭ كومەگىمەن ۋاقتىلى جاردەم كورسەتە الادى. وبلىستىق اۋرۋحاناعا مەملەكەت تاراپىنان دا قولداۋ كورسەتىلۋدە. جۋىردا وسىندا 150 توسەك-ورىنعا ەسەپتەلگەن پروۆيزورلىق ستاتسيونار اشىلىپ، وندا 150 وتتەگى كونتسەنتراتورىن ورناتۋ كوزدەلۋدە.

«ەلىمىزدە كۇن سايىن ىندەتتىڭ بەلەڭ الىپ بارا جاتقانى بەلگىلى. وسى ورايدا اركىم قولىنان كەلگەنىن جاساپ، ىندەتپەن كۇرەسكە ۇلەس قوسۋى كەرەك دەپ ويلايمىز. ءبىزدىڭ بۇل ءىسىمىزدى باسقا دا كاسىپكەرلەر قولداسا ەكەن دەيمىز»، دەدى قانات جانعازيەۆ.

سوڭعى جاڭالىقتار