7 شىلدە, 12:21 4912 0 جاڭالىقتار اسىل تۇمار

ءدارى-دارمەكتى ون ەسە قىمباتقا ساتقان ەمحانا باسشىسى ۇستالدى

دەنساۋلىق ساقتاۋ ءمينيسترى الەكسەي تسوي وڭىرلەردە ءدارى-دارمەكتى قىمباتقا ساتاتىن الىپساتارلاردىڭ ارەكەتىنە قالاي شەكتەۋ قويىلىپ جاتقانىن ايتىپ بەردى، – دەپ جازدى قازاقپارات.

«بۇگىنگى كۇنى قازاقستاننىڭ بارلىق وڭىرىندە اكىمدىكتەر جانىنان مونيتورينگ توپتارى قۇرىلدى. قوعامدىق كەڭەستەر مەن ۇكىمەتتىك ەمەس ۇيىمدار دا ءدارى-دارمەك باعاسىن باقىلاۋ جۇمىسىنا بەلسەنە اتسالىسۋدا. ولاردىڭ ءبارى مەملەكەت بەكىتكەن شەكتى باعانى قاداعالايدى. باعا كوتەرۋ جاعدايلارى بار. سونىمەن قاتار بىزگە قۇقىق قورعاۋ ورگاندارى دا كوپ كومەك كورسەتۋدە. ءىىم قازىرگى تاڭدا قازاقستاننىڭ بارلىق وڭىرىندە اۋقىمدى تەكسەرىستى باستادى. بىرنەشە كۇنگى تەكسەرىستەردە الەۋمەتتىك جەلىلەردەگى ءدارى-دارمەك پەن ماسكالاردىڭ سپەكۋليانتتى ساۋداسىنا باسا ءمان بەرىلدى»، – دەدى مينيستر بۇگىن وكق-دا وتكەن ءباسپاسوز ءماسليحاتىندا.

ونىڭ ايتۋىنشا ءدارى-دارمەكتى قىمباتقا قايتا ساتۋدىڭ بىرنەشە جاعدايى تىركەلگەن.

«ماسەلەن، ءدارىحانالاردىڭ قىزمەتكەرلەرى مەديكامەنتتەردى سورەدەن چەكسىز ساتقان. وسىنىڭ سالدارىنان ازاماتتار نەگىزسىز قىمبات باعاعا ءدارىنى ساتىپ الۋعا ءماجبۇر بولعان. 6 شىلدەدە ەلوردادا قۇقىق قورعاۋشىلار «تويوتا» ماركالى كولىكتى ۇستادى. ونىڭ باگاجى مەديكامەنتتەرگە تولى بولعان. الگى ازامات 1 ميلليون تەڭگە پايدا تاۋىپ، ءدارى-دارمەكتى قىمباتتاتا ساتپاق بولعان. اۆتوكولىكتە 689 ءدارىنىڭ قاپتاماسى بارى انىقتالدى. شىمكەنتتە ءتىپتى، ءبىر ايەل ءدارىنى ءوز ۇيىندە وتىرىپ ساتقان. تەكسەرىس بارىسىندا ۇيدەن ءارتۇرلى مەديكامەنتتەردىڭ 229 ءتۇرى (10459 قاپتاما) انىقتالدى. وسى دارىلەردىڭ ءبارى دە جرۆي-دى ەمدەۋگە ارنالعان دارىلەر. مۇنداي پرەپاراتتار انتيسانيتاريالىق جاعدايدا ساقتالعان»، – دەدى ول.

سول سەكىلدى جەتىساي قالاسىندا تسەف ءىىى پرەپاراتىنىڭ 336 قاپتاماسىن ءبىر ادامعا ساتۋ (400 مىڭ تەڭگەگە) جاعدايى تىركەلىپ وتىر. بۇل پرەپاراتتار قالاداعى ءدارىحانالاردىڭ بىرىنە ساتىلماق بولعان.

«اتىراۋدا مەديكامەنتتەر ءتىپتى، كوسمەتولوگيالىق كلينيكادا ساتىلعان. قۇقىق قورعاۋشىلار ءدارىنىڭ وسىلايشا ليتسەنزياسىز ساتىلىپ جاتقانىن انىقتادى. زاڭسىز ساۋدانى كلينيكانىڭ باسشىسى ۇيىمداستىرعان. ونىمەن قويماي، ول ءدارى باعاسى رەسمي شەكتەن بىرنەشە ەسە كوپ بولعان. ماسەلەن 5 مىڭ تەڭگەلىك ينگاۆيرين ءۇش ەسە قىمباتقا، ال پاراتسەتامول ءتىپتى، 10 ەسە ارتىق باعامەن قىمباتقا ساتىلعان. كلينيكادان 5 مىڭ قاپتاما تاركىلەندى»، – دەدى ول.

سوڭعى جاڭالىقتار