6 شىلدە, 13:01 396 0 جاڭالىقتار اسىل تۇمار

ينتەرنەت ارقىلى دارىلىك پرەپاراتتاردى زاڭسىز ساتقان ازامات ۇستالدى

قاراعاندى وبلىسىنىڭ ءتارتىپ ساقشىلارى ينتەرنەت ارقىلى دارىلىك پرەپاراتتاردى زاڭسىز ساتۋ فاكتىسىن انىقتادى. تەرگەۋ بارىسىندا جەدەل ۋاكىلدەر بالقاش قالاسىنىڭ تۇرعىنىن ۇستادى، – دەپ جازدى قازاقپارات.

5 شىلدە كۇنى بالقاش قالالىق پوليتسيا ءبولىمى ەسىرتكى قىلمىسىنا قارسى كۇرەس بولىمشەسىنىڭ قىزمەتكەرلەرى الەۋمەتتىك جەلىلەرگە مونيتورينگ جۇرگىزۋ بارىسىندا ءدارى-دارمەكتەردى زاڭسىز ساتۋ فاكتىسىن انىقتاعان.

حابارلاندىرۋلارعا سايكەس، پاراقشانىڭ اۆتورى «انتاريس» دارىلىك پرەپاراتىن ساتۋمەن اينالىسقان. بۇل پرەپارات قانت ديابەتىمەن اۋىراتىن ادامداردى ەمدەۋگە ارنالعان. بەلگىلى بولعانداي، ءدارى-دارمەكتەرگە ليتسەنزيا بولماعان جانە ولار دارىگەردىڭ رەتسەپتىسىز ساتىلىپ كەلگەن.

«ساتۋشى بالقاش قالاسىنىڭ 49 جاستاعى تۇرعىنى بولىپ شىقتى. پوليتسيا قىزمەتكەرلەرى ونىڭ ينتەرنەت ارقىلى «انتاريستىڭ» 6 قاپتاماسىن (180 تابلەتكاسىن) ساتىپ ۇلگەرگەنىن انىقتادى»، – دەپ حابارلادى قاراعاندى وبلىسى پوليتسيا دەپارتامەنتىنىڭ ءباسپاسوز قىزمەتىنەن.

اتالعان فاكتى بويىنشا اكىمشىلىك حاتتاما تولتىرىلدى. ماتەريال قر اقبك 424-بابى «زاڭسىز مەديتسينالىق جانە (نەمەسە) فارماتسەۆتيكالىق قىزمەت» بويىنشا اكىمشىلىك سوتقا قاراۋعا جىبەرىلدى.

سوڭعى جاڭالىقتار