6 شىلدە, 10:05 489 0 جاڭالىقتار اسىل تۇمار

ەلباسىن شەت مەملەكەت باسشىلارى تۋعان كۇنىمەن قۇتتىقتادى

ەلباسى نۇرسۇلتان نازارباەۆتىڭ اتىنا شەتەل مەملەكەتتەرى مەن ۇكىمەتتەرى باسشىلارىنان كەلىپ جاتقان قۇتتىقتاۋ حاتتار لەگى جالعاسۋدا. بۇل تۋرالى قر تۇڭعىش پرەزيدەنتىنىڭ رەسمي سايتى حابارلادى.

قىتاي حالىق رەسپۋبليكاسىنىڭ توراعاسى سي تسزينپين ءوز جەدەلحاتىندا قازاقستاننىڭ تۇڭعىش پرەزيدەنتىنە مىقتى دەنساۋلىق پەن ۇزاق عۇمىر تىلەگەن.

«ءسىز قازاقستان رەسپۋبليكاسىنىڭ نەگىزىن قالادىڭىز جانە ءوز حالقىڭىزدىڭ ىستىق ىقىلاسى مەن قۇرمەتىنە بولەنگەن ۇلت كوشباسشىسىز. وزىڭىزبەن بىرگە قىتاي-قازاقستان قاتىناستارىنىڭ يگىلىگى جولىندا يىق تىرەسىپ جۇمىس ىستەگەن كەزدەردى ءجيى ەسكە الامىن. ەكى ەل ىنتىماقتاستىعىن دامىتۋعا قوسقان زور ۇلەسىڭىزدى جوعارى باعالايمىن. ءسىز ءاردايىم مەنىڭ جاقسى دوسىم بولىپ قالا بەرەسىز. ءارى قاراي دا قىتاي مەن قازاقستان اراسىنداعى دوستىقتى دامىتۋعا كوڭىل بولەسىز دەپ سەنەمىن. سىزگە مىقتى دەنساۋلىق، ۇزاق عۇمىر مەن بارلىق باستامالارىڭىزعا تابىس، ال دوستاس قازاقستان حالقىنا باق-بەرەكە تىلەيمىن»، – دەلىنگەن سي ءتسزينپيننىڭ جەدەلحاتىندا.

ازەربايجان پرەزيدەنتى يلحام اليەۆ ەلباسىنىڭ باسشىلىعىمەن قازاقستان رەسپۋبليكاسى دامۋدىڭ ۇلكەن جولىنان وتكەنىن اتاپ ءوتتى.

«ءسىزدىڭ كورەگەن جانە تاباندى ساياساتىڭىزدىڭ ارقاسىندا ەكونوميكا ايتارلىقتاي ىلگەرى باسىپ، حالىقتىڭ الەۋمەتتىك ءال-اۋقاتى ءوستى جانە قازاقستاننىڭ حالىقارالىق ارەناداعى بەدەلى ارتتى. قۇرمەتتى نۇرسۇلتان ءابىشۇلى، وسىناۋ ايتۋلى كۇندە ءسىزدى تاعى دا شىن جۇرەكتەن قۇتتىقتايمىن جانە باۋىرلاس قازاقستان حالقىنا تاتۋلىق پەن باق-بەرەكە تىلەيمىن»، – دەلىنگەن جەدەلحاتتا.

ارمەنيا رەسپۋبليكاسىنىڭ پرەزيدەنتى ارمەن ساركيسيان ەلباسىنىڭ الەمدىك دەڭگەيدەگى تۇلعالىعى مەن دانالىعىنا ءاردايىم تامسانىپ كەلەتىنىن ايتتى. «وسى ايتۋلى كۇن – ءسىزدىڭ قازاقستاننىڭ قارقىندى دامۋىنداعى، حالىقارالىق ارەناداعى ءرولىن نىعايتۋداعى زور جەتىستىكتەرىڭىزدى تاعى ءبىر رەت باعالاۋدىڭ مۇمكىندىگى»، – دەلىنگەن ا.ساركيسياننىڭ جەدەلحاتىندا.

سونداي-اق ۋكراينا پرەزيدەنتى ۆلاديمير زەلەنسكي ەلباسىن 80 جىلدىق مەرەيتويىمەن قۇتتىقتادى.

«ءسىزدىڭ مەملەكەتتىك قىزمەتىڭىز تاريحي كورەگەندىكتىڭ، حالىق مۇددەسىنە دەگەن ادالدىقتىڭ، تاۋەلسىزدىكتىڭ جۇيەلى قورعالۋىنىڭ جانە قازاقستان رەسپۋبليكاسىنىڭ بەلسەندى دامۋىنىڭ ۇلگىسى. ءسىزدىڭ مەملەكەتتى باسقارۋداعى قاجىرلى ەڭبەگىڭىز ءبىزدىڭ ەلدەرىمىز اراسىنداعى قارىم-قاتىناستاردىڭ تابىستى دامۋىنىڭ كەپىلىنە اينالدى جانە وسى ىنتىماقتاستىق بۇدان بىلاي دا وڭ قارقىنىن ساقتايدى دەپ سەنەمىن. مەن ءسىز سياقتى ۋكراين حالقىنىڭ ورتالىق ازياداعى شىنايى دوسى مەن سەنىمدى سەرىكتەسى بار ەكەنىن باعالايمىن»، – دەپ جازعان ۆ.زەلەنسكي.

پولشا رەسپۋبليكاسىنىڭ پرەزيدەنتى اندجەي دۋدا ەلباسىنىڭ مەملەكەتارالىق ىنتىماقتاستىقتى دامىتۋداعى كۇش-جىگەرىن اتاپ ءوتتى.

«بۇگىنگى تاڭدا قازاقستانسىز حالىقارالىق قاۋىپسىزدىك ارحيتەكتۋراسى تۋرالى ايتۋ قيىن. قازاقستاننىڭ بۇۇ قاۋىپسىزدىك كەڭەسىنە 2017-2018 جىلدارداعى العاشقى تۇراقتى ەمەس مۇشەلىگى كەزىندە كوتەرگەن باستامالارى جانە وسى الاڭداعى ءبىزدىڭ بىرلەسكەن جۇمىسىمىز سوزىمە دالەل»، – دەلىنگەن پولشا پرەزيدەنتىنىڭ جەدەلحاتىندا.

ارمەنيا رەسپۋبليكاسىنىڭ پرەمەر-ءمينيسترى نيكول پاشينيان دا نۇرسۇلتان نازارباەۆقا جانە كۇللى قازاقستان حالقىنا تاتۋلىق پەن باق-بەرەكە تىلەدى.

«قازاقستاننىڭ دامۋىنا جانە ەۋرازيالىق كەڭىستىكتەگى ءوزارا ءتيىمدى ينتەگراتسيالىق ۇدەرىستەردى كۇشەيتۋگە باعىتتالعان ءسىزدىڭ كوپجىلدىق كۇش-جىگەرىڭىزدىڭ ارقاسىندا ەلەۋلى پروگرەسكە قول جەتكىزىلدى»، – دەپ جازدى ن.پاشينيان.

سونداي-اق ليتۆا رەسپۋبليكاسىنىڭ پرەزيدەنتى گيتاناس ناۋسەدا، لاتۆيا رەسپۋبليكاسىنىڭ پرەزيدەنتى ەگيلس لەۆيتس، يوردانيا كورولى ءىى ابداللا يبن حۋسەين ءال-حاشيمي، ءۇندىستاننىڭ پرەمەر-ءمينيسترى نارەندرا مودي جانە ليۋكسەمبۋرگ پرەمەر-ءمينيسترى كساۆە بەتتەل وزدەرىنىڭ قۇتتىقتاۋ حاتتارىندا ەلباسىنىڭ قازاقستاننىڭ تاۋەلسىزدىگىن قالىپتاستىرۋداعى جانە حالىقارالىق قاتىناستاردى نىعايتۋداعى ەرەكشە ءرولىن اتاپ ءوتتى.

 

سوڭعى جاڭالىقتار