5 شىلدە, 18:42 572 0 جاڭالىقتار اسىل تۇمار

قوستانايلىق دومبىراشىلار گيننەس رەكوردتار كىتابىنا ەندى

بىلتىر قوستاناي وبلىسىنىڭ امانگەلدى اۋدانىندا وتكەن ۇلتتىق دومبىرا كۇنىنە ارنالعان مەرەكەدە 1000 دومبىراشى ءبىر مەزەتتە ەكى كۇي ورىنداعان ەدى.

بۇگىن امانگەلدىلىكتەردىڭ گيننەس رەكوردتار كىتابىنا ەنگەنى حالىقارالىق سەرتيفيكاتپەن راستالدى، – دەپ جازدى قازاقپارات.

بىلتىرعى قوستاناي وبلىسىنداعى ۇلتتىق دومبىرا كۇنىنىڭ باستى جاڭالىعى – امانگەلدى اۋدانىندا تۇڭعىش رەت 1000 دومبىراشىنىڭ قاتىسۋىمەن كۇي وينالدى. بۇل باستامانى اۋدان اكىمى ءامىرحان اسانوۆ كوتەرگەن. دومبىراشىلار ءبىر مەزەتتە قۇرمانعازىنىڭ «بالبىراۋىن» جانە «كەلىنشەك» كۇيلەرىن ورىندادى.

«دومبىراشىلار اۋداننىڭ ءار اۋىلىنان قاتىستى. ەڭ جاسى 5 سىنىپ وقۋشىسىنان باستاپ، 90 جاسقا تاياعان قاريالارعا دەيىن بولدى. بىلتىرعى شاراعا بىرنەشە اي بويى دايىندىق جۇمىستارى جۇرگىزىلدى. ءار اۋىلدارداعى كلۋب قىزمەتكەرلەرى، مەكتەپتەردەگى دومبىرا ۇيىرمەلەرىنە جەتەكشىلىك ەتەتىن مۋزىكا ءپانىنىڭ مۇعالىمدەرى بەلسەنە قاتىستى. ماقساتقا قول جەتكىزدىك، كۇيلەردى مىڭ دومبىراشى ءساتتى ورىنداپ شىقتى. 1000 دومبىراشىعا وڭىرگە بەلگىلى ونەرپاز ولجاس قىلدىباەۆ ديريجەرلىك ەتتى. نەگىزى 2019 جىلعى مامىر ايىندا اۋداندا وتكەن «قىزعالداقتار فەستيۆالىندە» دە 500 دومبىراشى كۇي تارتقان. سول كەزدە دايىندىعىمىز ءبىر پىسىقتالعان ەدى»، – دەيدى اۋداندىق مادەنيەت جانە تىلدەردى دامىتۋ ءبولىمىنىڭ باسشىسى ساعىنعالي سەيدين.

سونىمەن، اۋدان ونەرپازدارىنىڭ جەتىستىگى حالىقارالىق سەرتيفيكاتپەن راستالدى.

سەرتيفيكاتتا: «ەڭ كوپ دومبىراشىنىڭ قاتىسۋىمەن اۋىلدىق مەكەندە ورىندالعان قازاقتىڭ ءداستۇرلى اسپاپتىق پەساسى. گيننەس رەكوردىنا 1000 ورىنداۋشى تىركەلدى. رەكوردتى ۇيىمداستىرۋشى: قوستاناي وبلىسى، امانگەلدى اۋدانىنىڭ اكىمدىگى»، – دەپ جازىلعان.

اۋداندىق ىشكى ساياسات ءبولىمىنىڭ باسشىسى نۇرلىبەك ءتاجين ايتقانداي، ءىس-شارا بەينەتاسپاعا ءتۇسىرىلىپ، قۇجاتتارىن رەتتەپ حالىقارالىق ۇيىمنىڭ سوچيدەگى كەڭسەسىنە جولدانعان. رەكوردتى تەكسەرۋشىلەر قۇجاتتاردىڭ دۇرىستىعىن قاراپ، قاتىسۋشىلاردى مۇقيات ساناپ شىققان.

 

 

سوڭعى جاڭالىقتار