4 شىلدە, 17:03 1085 0 جاڭالىقتار اسىل تۇمار

گۇلشارا ابدىقالىقوۆا قىزىلوردا وبلىسى تۇرعىندارىنا ۇندەۋ جولدادى

قىزىلوردا وبلىسىنىڭ اكىمى گۇلشارا ابدىقالىقوۆا ءوڭىر جۇرتشىلىعىنا كوروناۆيرۋسقا قارسى كۇرەس شارالارىنا بايلانىستى ۇندەۋ جولدادى.

ءوڭىر باسشىسى ۆيرۋستىڭ ايماق ەكونوميكاسىنا اسەر ەتىپ، دەنساۋلىق ساقتاۋ سالاسىنىڭ قالىپتى جۇيەسىن وزگەرتكەنىن ايتتى.

«ينفەكتسيالىق اۋرۋلاردىڭ اعىمىن الدىن الا ءدال بولجاپ ءبىلۋ مۇمكىن ەمەس. دەگەنمەن، العاشقى كۇندەردەن ۆيرۋسقا قارسى ارنايى شارالار قابىلداندى. قاتاڭ بىرلەسكەن ءتارتىپتىڭ ارقاسىندا ىندەتتىڭ العاشقى لەگىن تەجەي الدىق. الايدا، ەكونوميكالىق – الەۋمەتتىك قاجەتتىلىكتەن قاتاڭ شەكتەۋلەردى جەڭىلدەتتىك. سونىڭ نەگىزىندە تۇرعىندار اراسىندا سانيتارلىق تالاپتاردى ەسكەرمەۋ بەلەڭ الدى. ۆيرۋستىڭ بارىنا سەنبەۋشىلىك كوبەيىپ، وقشاۋلانۋدان شىعىپ، كوپشىلىك باس قوسۋلار جيىلەدى. ىندەتتى جۇقتىرعانداردىڭ سانى بۇگىنگى كۇنى 1379 جەتتى. ونىڭ ىشىندە 897 ادام دەرتتەن ايىقتى. كورونوۆيرۋس ينفەكتسياسى انىقتالعان ازاماتتارمەن قارىم-قاتىناستا بولعان 7929 ادام ءبىزدىڭ باقىلاۋىمىزدا بولدى. 56 277 سىناما تەست الىندى. وكىنىشكە قاراي، دەنساۋلىق ساقتاۋ مينيسترلىگى جانىنداعى ارنايى كوميسسيانىڭ شەشىمىمەن ەكى ناۋقاستىڭ كورونوۆيرۋستان قايتىس بولعانى انىقتالدى. سوندىقتان بارلىق مۇمكىندىكتەر جۇمىلدىرىلىپ ىندەتتىڭ ودان ءارى تاراۋىن شەكتەۋ جۇمىستارى اتقارىلۋدا»، – دەدى وبلىس اكىمى گۇلشارا ابدىقالىقوۆا.

وڭىرىمىزدە ينفەكتسيالىق ستاتسيوناردا – 515, پروۆيزورلىق ستاتسيوناردا – 1670 توسەك ورىن دايىندالعان. سونداي-اق، ينفەكتسيالىق ستاتسيوناردا – 200, پروۆيزوردا – 1257 ناۋقاستار ەمدەلۋدە.

وبلىستا بارلىعى 76 جاساندى وكپەنى جەلدەتۋ اپپاراتى بار. ماۋسىم ايىندا قوسىمشا 20 ءپورتاتيۆتى وكپەنى جەلدەتۋ اپپاراتى الىنىپ، ءدال وسىنداي قۇرىلعىنىڭ 63-نە قازاقستان رەسپۋبليكاسى دەنساۋلىق ساقتاۋ مينيسترلىگىنە ساتىپ الۋ تۋرالى ءوتىنىم جولدانعان.

سونداي-اق، بۇگىنگى كۇنى وبلىستىق مەديتسينالىق مەكەمەلەردە 5 كومپيۋتەرلىك توموگرافيا جۇمىس ىستەيدى. قاجەتتىلىككە بايلانىستى تاعىدا وسىنداي 2 اپپارات الۋ جوسپارلانۋدا.

وڭىردە ماۋسىم ايىندا پنەۆمونيا دەرتىنىڭ اسقىنۋىنا بايلانىستى ۇيدە ەم الۋشىلارعا قوسىمشا كومەك بەرۋ ماقساتىندا دارىگەرلىك موبيلدىك توپتار قۇرىلىپ، اكىمدىكتىڭ قىزمەتتىك اۆتوكولىكتەرى بەرىلگەن.

وبلىس اكىمى گۇلشارا ابدىقالىقوۆا مەملەكەتتىك باس سانيتارلىق دارىگەردىڭ قاۋلىسىنا سايكەس وڭىردە جاڭا شەكتەۋلەر ەنگىزىلەتىنىنە توقتالىپ ءوتتى.

«ءتيىستى شارالار بۇقارالىق اقپارات قۇرالدارى، الەۋمەتتىك جەلىلەر ارقىلى سىزدەرگە حابارلانادى. بۇل پروفيلاكتيكالىق شارالار كورونوۆيرۋستىڭ كەڭ تارالۋىن بارىنشا ازايتۋعا، تۇرعىنداردىڭ ءومىرى مەن دەنساۋلىعىن ساقتاۋعا مۇمكىندىك بەرەدى. وڭىرىمىزدە ەنگىزىلەتىن شەكتەۋلەرگە تۇسىنىستىكپەن قاراپ، قولداۋعا شاقىرامىن. ءبىز «ءبىر جەڭنەن قول، ءبىر جاعادان باس شىعارىپ« ساقتىق شارالارىن قولدانساق قانا بۇل جۇمىستار ناتيجەلى بولادى. ارقايسىمىز جاقىندارىمىزعا جاناشىر بولىپ، ىنتىماق پەن بىرلىكتىڭ ارقاسىندا ىندەتتىڭ بەتىن قايتارامىز»، – دەدى وبلىس اكىمى.

سوڭعى جاڭالىقتار