3 شىلدە, 17:06 462 0 جاڭالىقتار انار لەپەسوۆا

استانا كۇنى: ەلوردالىق دارىگەرلەرگە مەملەكەتتىك ناگرادالار تابىستالدى

نۇر-سۇلتاندا استانا كۇنىنە وراي مەديتسينالىق قىزمەتكەرلەرگە مەملەكەتتىك ناگرادالار، ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆتىڭ اتىنان العىس حاتتار تابىس ەتىلدى.

سونىمەن قاتار ەلوردانىڭ دامۋىنا ۇلەس قوسقان تۇرعىندار استانانىڭ قۇرمەتتى تۇرعىنى اتاعىنا يە بولدى، دەپ حابارلادى قالا اكىمدىگىنىڭ رەسمي سايتى.

III دارەجەلى «بارىس» وردەنىمەن كوپبەيىندى مەديتسينا ورتالىعىنىڭ باس دارىگەرىنىڭ ورىنباسارى ساۋلە اتىعاەۆا، «پاراسات» وردەنىمەن جۇقپالى اۋرۋلار گوسپيتالىنىڭ باس دارىگەرى اننا تسەپكە، «قۇرمەت» وردەنىمەن دارىگەر-رەانيماتولوگ يليا لوگۆينەنكو، جەدەل جاردەم ستانتسياسىنىڭ ديرەكتورى مۇرات ورازباەۆ، «ەرەن ەڭبەگى ءۇشىن» مەدالدارىمەن انەستەزيولوگ-رەانيماتولوگ يۆان ۆاحرۋشەۆ، سونداي-اق دارىگەر-ينفەكتسيونيست «نۇر-سۇلتان قالاسىنىڭ ورتالىق جول اۋرۋحاناسى» جشس بولىمشەسىنىڭ مەڭگەرۋشىسى ماراپاتتالدى.

كوروناۆيرۋس ىندەتىمەن كۇرەستە الدىڭعى شەپتە كەلە جاتقان 20-دان استام مەديتسينا قىزمەتكەرى مەملەكەتتىك ناگرادالارمەن ماراپاتتالدى. پاندەميا كەزىندە قالا تۇرعىندارىنا ازىق-تۇلىك سەبەتتەرىن، ءدارى-دارمەكتەردى جەتكىزىپ، بلوك-پوستتاردىڭ جۇمىسىن رەتتەۋگە ات سالىسقان ەرىكتىلەر ەل باسشىلىعىنىڭ اتىنان العىس حاتتارمەن ماراپاتتالدى.

سونىمەن بىرگە ەلوردا اكىمى التاي كولگىنوۆ استانانىڭ قۇرمەتتى تۇرعىندارى اتاعىن ەكى ارداگەرگە تابىس ەتتى. كانديداتۋرالاردى دەپۋتاتتار قالالىق ءماسليحات سەسسياسىندا قولدادى.

وتىزباي سۇيىندىكوۆ 1953 جىلدان باستاپ مۇعالىم بولىپ قىزمەت اتقاردى. ول 30 جىلدان استام ۋاقىت پەداگوگيكالىق ۋچيليششەدە جۇمىس ىستەدى جانە بولاشاق پەداگوگتاردى تاربيەلەدى. ەلوردانىڭ قۇرمەتتى تۇرعىنى اتاعى حيرۋرگ ۆلاديمير باۋمەيستەرگە بەرىلدى. ول 15 مىڭنان استام وپەراتسيا، 13 مىڭنان استام زەرتتەۋ جۇمىستارىن جۇرگىزدى.

«بۇگىندە ماراپاتتالۋشىلاردىڭ باسىم بولىگى ونلاين-رەجيمدە قاتىسىپ جاتىر. ارقايسىڭىز كوروناۆيرۋسقا قارسى كۇرەسكە ۇلكەن ۇلەس قوسىپ جاتىرسىز. مەن ءۇشىن سىزدەرگە مەملەكەت باسشىسىنىڭ اتىنان ناگرادالار تاپسىرۋ ۇلكەن قۇرمەت. قالا قاۋىپسىزدىگىن قامتاماسىز ەتەتىن پوليتسيا قىزمەتكەرلەرى، كۇن سايىن مەديتسينالىق قىزمەتكەرلەردى جۇمىسقا الىپ كەلەتىن اۆتوبۋس جۇرگىزۋشىلەرى دە العىس حاتتارمەن ماراپاتتالدى. ءار ادامنىڭ ىندەتپەن كۇرەسكە قوسىپ جاتقان ۇلەسىن باعالايمىز. كەلە جاتقان استانا كۇنى قۇتتى بولسىن»، - دەدى قالا اكىمى التاي كولگىنوۆ.

سوڭعى جاڭالىقتار