2 شىلدە, 20:11 792 0 ءبىلىم انار لەپەسوۆا

ۇبت ءتامام: بعم سىناق قورىتىندىسىن جاريالادى

قر ءبىلىم جانە عىلىم مينيسترلىگى 2020 جىلعى كەزەكتى ۇلتتىق بىرىڭعاي تەستىلەۋ قورىتىندىسىن جاريالادى. 

بيىل ۇبت ەلىمىز بويىنشا 21 ماۋسىم مەن 1 شىلدە ارالىعىندا وتكىزىلدى. وعان رەكوردتىق كولەمدە – 131 754 ءوتىنىش تىركەلسە، ونىڭ 111 113-ءى، ياعني 82 پايىزى – بيىلعى مەكتەپ تۇلەكتەرى. وتكەن جىلى بۇل كورسەتكىش 12% تومەن بولعانىن اتاپ وتكەن ءجون.

2020 جىلى ۇلتتىق بىرىڭعاي تەستىلەۋ 161 پۋنكتتە جۇرگىزىلدى. تەستىلەۋدىڭ ءادىل ءوتۋ بارىسىن قاداعالاۋ ماقساتىندا قالالار مەن وڭىرلەرگە ءبىلىم جانە عىلىم مينيسترلىگى تاراپىنان 1 983 وكىل جىبەرىلدى. سونىمەن بىرگە، ۇبت بارىسىن سىبايلاس جەمقورلىققا قارسى اگەنتتىك، ۇكىمەتتىك ەمەس ۇيىم، باق، «ادالدىق الاڭى» جوبالىق كەڭسەلەرىنىڭ وكىلدەرى مەن قوعام بەلسەندىلەرى بار ارنايى مونيتورينگتىك توپ (510 ادام) باقىلادى.

ۇبت قورىتىندىسى بويىنشا، تەستىلەۋگە تىركەلگەن ازاماتتاردىڭ 92,1% تەستىلەۋگە قاتىستى، 2019 جىلى بۇل كورسەتكىش 94% قۇراعان بولاتىن. شەكتى بالدى 82 154 تالاپكەر جينادى، بۇل وتكەن جىلعى كورسەتكىشتەرمەن سالىستىرعاندا ءبىر دەڭگەيدە قالىپ وتىر. جالپى رەسپۋبليكا بويىنشا ورتاشا كورسەتكىش 64,06 بالدى قۇرادى، مۇندا 2019 جىلعى ورتاشا كورسەتكىشپەن سالىستىرعاندا ايتارلىقتاي ايىرماشىلىق جوق (65,5 بالل).

بيىلعى تەستىلەۋدە العاش رەت ەلەكتروندىق ۇكىمەت بازاسى ارقىلى Face ID جۇيەسى پايدالانىلدى، وسىعان بايلانىستى ۇبت تاپسىرۋعا باسقا ادامنىڭ كىرۋگە ارەكەتتەنۋى ايتارلىقتاي تومەندەدى.

ماسەلەن، بيىل 7 مەكتەپ تۇلەگى ءوز ورنىنا ۇبت-عا باسقا ادامدى جىبەرمەك بولعان، وتكەن جىلى ءدال وسىنداي 34 جاعداي ورىن العان ەدى. 119 تالاپكەر دەنساۋلىعىنا بايلانىستى ۇبت تاپسىرمادى. ولار ءۇشىن باسقا كۇندەرى، ياعني 19 شىلدەگە دەيىن تەستىلەۋ ۇيىمداستىرىلاتىن بولادى. سونىمەن بىرگە، بيىل العاش رەت تالاپكەرلەرگە كالكۋلياتورلار پايدالانۋعا رۇقسات ەتىلدى. تەستىلەۋ ۋاقىتى ۇزارتىلىپ، تۇلەكتەر قورىتىندى مەكتەپ ەمتيحاندارىنان بوساتىلدى.

ۇبت جۇرگىزىلگەن ءار اۋديتوريا ارنايى بەينەباقىلاۋ كامەرالارىمەن جابدىقتالعان بولاتىن، ناتيجەسىندە 9,5 ملن-نان استام ادام ۇبت بارىسىن ونلاين رەجيمدە باقىلادى. ەندى ەرەجەگە سايكەس 2020 جىلعى 25 تامىزعا دەيىن بەينەجازبالار ءجىتى تەكسەرىلەدى. ەگەر بەينەجازبادا گرانت يەلەنگەن تالاپكەردىڭ تىيىم سالىنعان زاتتاردى پايدالانعانى انىقتالسا، تەستىلەنۋشىنىڭ ۇبت ناتيجەسى جويىلادى جانە گرانتى قايتارىلادى.

ەلىمىزدىڭ بارلىق ۇبت وتكىزۋ بەكەتتەرىندە ساقتىق شارالارى قولعا الىنىپ، مەديتسينالىق-سانيتارلىق نورمالار قاتاڭ ساقتالدى. ءاربىر ۇبت-عا قاتىسۋشى دەزينفەكتسيالاۋدىڭ 5 كەزەڭىنەن ءوتتى: دەزينفەكتسيالىق وتكەلدەردەن ءوتىپ، ارنايى كىلەمشەدە اياق كيىمدەرىن زارارسىزداندىردى، دەنە قىزۋىن ولشەتىپ، قولدارىن زارارسىزداندىرۋ سۇيىقتىعىمەن وڭدەدى جانە بىرنەشە مەديتسينالىق ماسكا الدى.

تەستىلەۋگە كىرگىزۋ جانە وتىرعىزۋ كەزىندە تالاپكەرلەر اراسىندا ەكى مەتر اراقاشىقتىق ساقتالدى. ءاربىر اۋديتوريا باكتەريتسيدتىك قۇرالدارمەن جانە اۋا رەتسيركۋلياتورلارىمەن جەلدەتىلدى جانە تازارتىلدى. اۋديتوريالار 35% دەيىن تولتىرىلدى، ارقايسىسىندا تەك 10-18 ادام وتىردى. وتكەن جىلى ءبىر اۋديتوريادا ورتا ەسەپپەن 50 تالاپكەر بولعان ەدى.

جالپى، ماۋسىم ايىنداعى ۇلتتىق بىرىڭعاي تەستىلەۋ قالىپتى رەجيمدە ءوتتى. ەسكە سالا كەتەيىك، كەلەسى ۇبت تامىز ايىندا وتەدى، وندا تالاپكەر شەكتىك بالل جيناسا، جوو-نىڭ اقىلى بولىمىنە وقۋعا تۇسە الادى. سونىمەن بىرگە، جوو اقىلى بولىمىنە ءتۇسۋ ءۇشىن قاڭتار ايىنداعى ۇبت سەرتيفيكاتتارى دا جارامدى بولىپ قالا بەرەدى.

 

سوڭعى جاڭالىقتار