2 شىلدە, 16:40 638 0 ونەر ارايلىم بيمەنديەۆا

«دومبىرا» وقۋ قۇرالى تانىستىرىلادى

ەرتەڭ حالىقارالىق تۇركى اكادەمياسىنىڭ ۇيىمداستىرۋىمەن ۇلتتىق دومبىرا كۇنىنە ارنالعان «دومبىرا مادەنيەتى: ءداستۇر ساباقتاستىعى جانە ءبىلىم بەرۋدەگى ماسەلەلەر» اتتى كونفەرەنتسيا وتەدى.

ونلاين ۆيدەو فورماتىندا وتەتىن كونفەرەنتسياعا مەملەكەتتىك سىيلىقتىڭ لاۋرەاتى، قازاقستاننىڭ حالىق ءارتىسى، پروفەسسور قايرات بايبوسىنوۆ، قازاقستاننىڭ ەڭبەك سىڭىرگەن قايراتكەرى، تانىمال كۇيشى جانعالي جۇزباەۆ جانە بەلگىلى عالىمدار، بىرقاتار سالالىق وقۋ ورىندارى مەن ونەر سالاسىنداعى ۇيىمداردىڭ باسشىلارى مەن وكىلدەرى قاتىسادى.

القالى جيىن اياسىندا حالىقارالىق تۇركى اكادەمياسى مەملەكەت باسشىسىنىڭ تىكەلەي تاپسىرماسى بويىنشا دايىنداپ شىعارعان «دومبىرا» وقۋ قۇرالىنىڭ تۇساۋكەسەر ءراسىمى وتەدى. وسكەلەڭ ۇرپاققا ارنالعان وقۋلىقتىڭ اۆتورى بەلگىلى كۇيشى، قازاق ۇلتتىق ونەر ۋنيۆەرسيتەتىنىڭ پروفەسسورى – جانعالي جۇزباەۆ.

ايتا كەتۋ كەرەك، وتكەن جىلدىڭ قاراشا ايىندا حالىقارالىق تۇركى اكادەمياسىنىڭ باسشىسى دارحان قىدىرالى پرەزيدەنت قاسىم-جومارت توقاەۆتىڭ قابىلداۋىندا «دومبىرا» وقۋ قۇرالىنىڭ جوباسىن تانىستىرعان ەدى.

سوڭعى جاڭالىقتار