30 ماۋسىم, 20:36 633 0 جاڭالىقتار اسىل تۇمار

قازاقستاندا ەلەكتر ەنەرگياسى نە سەبەپتى قىمباتتايدى

«Kazakhmys Distribution» جشس باس ديرەكتورى مىندەتىن اتقارۋشى تەمىرلان وتەگەنوۆ قازاقستاندا ەلەكتر ەنەرگياسىنىڭ قىمباتتاۋىنا قاتىستى پىكىر ءبىلدىردى.

ونىڭ ايتۋىنشا، ەنەرگيا وندىرەتىن ستانسالاردىڭ جۇمىسىن قولداۋ ءۇشىن تاريفتەردى كوتەرۋ – ۋاقتىلى قابىلدانعان شەشىم بولىپ وتىر، – دەپ جازدى قازاقپارات.

«شىنىندا دا ەنەرگەتيكا مينيسترلىگى ەنەرگيا وندىرەتىن ۇيىمداردىڭ ءتاريفتى 16 پايىزعا ءوسىرۋ تۋرالى ۇسىنىسىن قولدادى. ياعني ەگەر 2-3 بولمەلى ءۇيىڭىز بولسا، تۇپكى تۇتىنۋشى ءۇشىن ەلەكتر ەنەرگياسى 200-250 تەڭگەگە قىمباتتايدى دەگەن ءسوز. مينيسترلىك نە ءۇشىن مۇنداي قادامعا بارىپ وتىر؟ جالپى قازاندىقتار مەن ترۋبينالاردىڭ توزۋ دەڭگەيى قازىرگى ۋاقىتتا ەلدە ورتاشا ەسەپپەن 60 پايىزدى قۇرايدى. ايماقتاردا، ماسەلەن تەمىرتاۋ سەكىلدى قالالاردا بۇل كورسەتكىش ءتىپتى 80 پايىزدان اسىپ كەتكەن. دەمەك جاعداي بۇلاي كەتە بەرسە ستانتسيا مۇلدە جۇمىس ىستەمەي قالۋى مۇمكىن. وسىعان بايلانىستى قالالاردا ەلەكتر ەنەرگياسى ءوشىپ قالماۋى نەمەسە قىستىگۇنى قيىن جاعدايلار تۋىنداماۋى ءۇشىن ستانتسيا ءاردايىم جاڭعىرتىلىپ وتىرۋى كەرەك»، – دەدى تەمىرلان وتەگەنوۆ قازاقپارات تىلشىسىنە تەلەفون ارقىلى ايتقان پىكىرىندە.

ونىڭ سوزىنە قاراعاندا، قازىرگى ۋاقىتتا ەلەكتر ەنەرگياسىن وندىرەتىن قۇرىلعىلاردى ۇستاپ تۇرۋدىڭ ءوزى قىمباتتاپ بارادى. ءبىر عانا كومىر باعاسىنىڭ، لوگيستيكانىڭ جىل سايىن قىمباتتاۋى ستانتسيا جۇمىسىنا ەداۋىر اسەرىن تيگىزەدى.

«وسى قىمباتشىلىق تەندەنتسياسىنىڭ جالعاسۋى – ستانتسيانىڭ بۇرىنعى تاريفتە قالىپ، شىعىنداردى جابۋىنا مۇمكىندىك بەرمەيدى. سوندىقتان مەنىڭ ويىمشا ەنەرگەتيكا مينيسترلىگى ۋاقتىلى شەشىم قابىلداپ وتىر. قازىرگى تاڭدا ءبارىمىز ۇيرەنىپ قالدىق: ۇيگە كەلسەك، جارىق جارقىراپ تۇرادى. توقسانىنشى جىلداردى ەسكە ءتۇسىرىپ كورەلىك: ول كەزدە ءتىپتى جارىقتى ەكى-ءۇش ساعاتقا عانا بەرەتىن ەدى عوي. مۇنداي دا ۋاقىت ءوتتى. سول سەبەپتى وسى تەندەنتسيانى ساقتاپ، ستانتسيا جۇمىستارىن دا قولداپ وتىرۋ كەرەك»، – دەدى ول.

ەسكە سالا كەتسەك، بۇگىن قر ەنەرگەتيكا مينيسترلىگى ەلەكتر ەنەرگەتيكاسىن دامىتۋ دەپارتامەنتىنىڭ ديرەكتورى ايدوس دارىباەۆ 1 شىلدەدەن قازاقستاندا ەلەكتر ەنەرگياسى قىمباتتايتىنىن حابارلاعان ەدى. قازاقستان بويىنشا ەنەرگيا ءوندىرۋشى ۇيىمداردىڭ شەكتى تاريفتەرىنىڭ ورتاشا ۇلعايۋى 16 پايىز دەڭگەيىندە بولجانۋدا.

سوڭعى جاڭالىقتار