6 ماۋسىم, 20:05 374 0 جاڭالىقتار اسىل تۇمار

كيىك ءمۇيىزىن ساتپاق بولعاندار سوتتالدى

سۋرەت عالامتوردان الىندى
سۋرەت عالامتوردان الىندى

قازتالوۆ اۋداندىق سوتىنىڭ ۇكىمىمەن 227 دانا كيىك ءمۇيىزىن ساتپاق بولعاندار سوتتالدى.

قازتالوۆ اۋداندىق پوليتسيا ءبولىمى ءمالىم ەتكەنىندەي، جانىبەك اۋدانى كۇيگەنكول اۋىلىنىڭ تۇرعىندارى بەكبولات جۇماقاەۆ پەن باقىتجان قاجىعاليەۆ قر قك 339-بابى 2-بولىگى 2-تارماعىنا سايكەس ايىپتى دەپ تانىلىپ، مۇلىكتەرىن تاركىلەۋسىز، ارقايسىسى ءۇش جىل مەرزىمگە باس بوستاندىقتارىنان ايىرىلدى. سونىمەن قاتار ولار بەس جىلعا دەيىن اڭشىلىق قىزمەتپەن اينالىسا المايدى.

سوت تالقىسىندا بەلگىلى بولعانىنداي، اتالعان تۇرعىندار 2019 جىلدىڭ قاراشاسى مەن بيىلعى ءساۋىر ايى ارالىعىندا كۇيگەنكول مەن قازتالوۆ اۋدانى تەرەڭكول اۋىلدىق وكرۋگى شەكاراسىندا ورنالاسقان اششىوزەك وزەنى بويىنا بىرنەشە رەت بارىپ، ءولىپ جاتقان كيىكتەردىڭ ءمۇيىزىن كەسكەن. بارلىعى 227 دانا ءمۇيىزدى جيناپ، كۇيگەنكول اۋىلى ماڭىنداعى شۇڭقىردا جاسىرىن ساقتاعان. سودان كەيىن 22 ءساۋىر كۇنى كەزدەسىپ، الدىن الا ءسوز بايلاسىپ، مۇيىزدەردى قاپقا سالىپ، ساتۋ ماقساتىمەن ب.جۇماقاەۆ ايداعان «فولكسۆاگەن گولف-2» اۆتوكولىگىمەن قازتالوۆ اۋدانى قوشانكول اۋىلدىق وكرۋگىنە قاراستى قاراسۋ قىستاعىنا تاسىمالداعان. سول جەردە پوليتسيا قىزمەتكەرلەرىنىڭ قولىنا تۇسكەن.

سوت ماجىلىسىندە ب.جۇماقاەۆ پەن ب.قاجىعاليەۆ وزدەرىنە تاعىلعان ايىپتى تولىق مويىنداپ، قىلمىس جاساعاندارىنا وكىنىپ، قاتاڭ جازالاماۋدى سۇرادى. سوتتالۋشىلاردىڭ ارەكەتتەرىندە كيىكتى ناقتى جويۋ جانە تابيعاتقا زيان كەلتىرۋ دەرەگى انىقتالماعاندىقتان، جابىرلەنۋشى مەملەكەتتىك مەكەمەنىڭ 464 ملن 967,750 مىڭ تەڭگەنى ماتەريالدىق زالال رەتىندە ءوندىرۋ تۋرالى ازاماتتىق تالابى قاناعاتتاندىرىلمادى.

سوت ۇكىمى زاڭدى كۇشىنە ەنگەن جوق.

 

سوڭعى جاڭالىقتار