5 ماۋسىم, 18:41 364 0 جاڭالىقتار اسىل تۇمار

BizBirgemiz اكتسياسى: 52 مىڭنان استام مۇقتاج وتباسىعا كومەك كورسەتىلدى

ەلباسى، «Nur Otan» پارتياسىنىڭ توراعاسى ن.نازارباەۆتىڭ باستامىسىمەن ءجۇرىپ جاتقان #BizBirgemiz اكتسياسى اياسىندا پوستپاندەميالىق كەزەڭدە جەرگىلىكتى اتقارۋشى ورگاندار جانە كاسىپكەرلەردىڭ قولداۋىمەن مۇقتاج تۇرعىندارعا كومەك كورسەتۋ بويىنشا بىرقاتار شارالار ۇيىمداستىرىلۋدا.

«Nur Otan» پارتياسىنىڭ الاتاۋ اۋداندىق فيليالىنا از قامتىلعان وتباسىلاردان ازىق-تۇلىكپەن قامتاماسىز ەتۋ جونىندە كوپتەگەن ءوتىنىش ءتۇسىپ جاتىر. «بۇگىن «Jas Otan» جاستار قاناتىنىڭ ەرىكتىلەرىمەن بىرلەسىپ، الاتاۋ اۋدانىنىڭ 30 از قامتىلعان وتباسىنا كومەك كورسەتىلدى، ازىق-تۇلىك جيىنتىقتارى تابىس ەتىلدى. ءار وتباسىنا تابىستالعان 30 كەلىلىك جيىنتىقتا ۇن، ماكارون، سۇيىق ماي، كۇرىش، قاراقۇمىق پەن قانت بار. بۇل جۇمىس جالعاسىن تابادى. اتاۋلى كومەك كورسەتۋ كەزىندە كوپبالالى انالارعا، مۇمكىندىگى شەكتەۋلى جاندارعا، ارداگەرلەر مەن جالعىزباستى قارت ادامدارعا باسا نازار اۋدارىلاتىن بولادى»، – دەدى Nur Otan پارتياسى الاتاۋ اۋداندىق فيليالىنىڭ كونسۋلتانتى سۇلتان شادمان.

كارانتين كەزەڭىندە قالالىق جانە اۋداندىق اكىمدىكتەردىڭ، كاسىپكەرلەر مەن ەرىكتىلەردىڭ قولداۋىمەن 52 مىڭنان استام وتباسىعا ازىق-تۇلىكپەن كومەك كورسەتىلگەنىن اتاپ وتكەن ءجون.

ءوز كەزەگىندە وسىنداي قولداۋعا يە بولعان، 2 بالا تاربيەلەپ وتىرعان 3 توپتاعى مۇگەدەك گۇلنار سابيروۆا  #BizBirgemiz باستاماسىنا، Nur Otan پارتياسى مەن ەرىكتىلەرگە العىسىن ءبىلدىرىپ، 50 مىڭ تەڭگە كولەمىندەگى قارجىلاي كومەككە قوسىمشا ازىق-تۇلىك جيىنتىعىن بىرنەشە رەت العانىن ايتتى.

ازىق-تۇلىك جيىنتىقتارىن دايىنداۋ جانە تاراتۋ بارىسىندا قاجەت سانيتارلىق نورمالار ساقتالعان.

سوڭعى جاڭالىقتار