5 ماۋسىم, 15:45 404 0 جاڭالىقتار اسىل تۇمار

ساباقتان تىس سپورت جاتتىعۋىن جۇرگىزگەن مۇعالىمگە قوسىمشا اقى تولەنەدى

سۋرەت عالامتوردان الىندى
سۋرەت عالامتوردان الىندى

مادەنيەت جانە سپورت ءمينيسترى اقتوتى رايىمقۇلوۆا مەملەكەتتىك ءبىلىم بەرۋ ۇيىمدارىنىڭ پەداگوگتەرىنە ساباقتان تىس سپورت جاتتىعۋىن جۇرگىزگەنى ءۇشىن قوسىمشا اقى بەرىلەتىنىن مالىمدەدى.

ونلاين رەجيمدە وتكەن حالىق الدىندا ەسەپ بەرۋ كەزدەسۋىندە مينيستر: «سپورت سالاسىنداعى جاتتىقتىرۋشى-وقىتۋشىلاردىڭ، مۇعالىمدەردىڭ، 4 مەكتەپ-ينتەرنات-كوللەدجى مەن سپورت كوللەدجى تاربيەشىلەرىنىڭ، بالالار-جاسوسپىرىمدەر سپورت مەكتەبىنىڭ جاتتىقتىرۋشى-وقىتۋشىلارىنىڭ جالاقىسى كوتەرىلەدى. مەملەكەتتىك ءبىلىم بەرۋ ۇيىمدارىنىڭ پەداگوگتەرىنە ساباقتان تىس سپورت جاتتىعۋلارىن جۇرگىزگەنى ءۇشىن بازالىق لاۋازىمدىق جالاقىنىڭ (17 697 تەڭگە) 100% مولشەرىندە قوسىمشا اقى بەرىلەدى»، – دەدى.

ونىڭ ايتۋىنشا سپورتشىلاردىڭ دوپينگىگە قارسى زەرتحاناسىنىڭ، ۇلتتىق دوپينگىگە قارسى ورتالىقتىڭ قىزمەتكەرلەرىنە، دەنە شىنىقتىرۋ جانە سپورت جونىندەگى رەسپۋبليكالىق وقۋ-ادىستەمەلىك جانە تالداۋ ورتالىعىنىڭ، سپورتتى دامىتۋ ديرەكتسياسىنىڭ قىزمەتكەرلەرى مەن جاتتىقتىرۋشىلارىنا لاۋازىمدىق جالاقىنىڭ 100% مولشەرىندە جاڭا قوسىمشا اقى بەلگىلەنگەن. وسىلايشا، ولاردىڭ جالاقىسى 2 ەسە ارتقان.

«بۇل باعىتتا جۇمىس جالعاسادى. سالا قىزمەتكەرلەرىن الەۋمەتتىك قولداۋ ماسەلەلەرى ءبىز ءۇشىن ارقاشان دا وزەكتى. وسىعان بايلانىستى سالا قىزمەتكەرلەرىن الەۋمەتتىك قولداۋ جۇيەسىن ودان ءارى دامىتۋدى، جۇمىسىنىڭ ەرەكشەلىگى بار ماماندار ءۇشىن تولەم ماسەلەسىن پىسىقتاۋدى جوسپارلاپ وتىرمىز. بۇل ماماندىقتىڭ بەدەلىن ارتترىىپ عانا قويماي مۋلتيپليكاتيۆتى اسەر بەرەدى»، – دەدى اقتوتى رايىمقۇلوۆا.

سوڭعى جاڭالىقتار