4 ماۋسىم, 21:03 346 0 ايماق انار لەپەسوۆا

ماقتاارالدىقتارعا 100 مىڭ تەڭگەلىك وتەماقى تولەنە باستادى

سۋ تاسقىنىنان زارداپ شەككەن ماقتاارالدىقتارعا ۇكىمەتتەن بولىنگەن 100 مىڭ تەڭگەلىك وتەماقى بەرىلە باستادى.

بۇگىندە وسى قاراجاتتى بەرۋ ءۇشىن جاڭاتۇرمىس، جەڭىس، فەرداۋسي، دوستىق، ورگەباس ەلدىمەكەندەرىنىڭ 6314 ازاماتىنان قۇجات قابىلداندى.

6020 قۇجات كوشى-قون پوليتسياسىنىڭ اقپاراتىمەن راستالىپ، قارجى اۋدارۋ ءۇشىن بەكىتۋگە ۇسىنىلعان. بۇگىن توپان سۋدان زارداپ شەككەن حالىقپەن ارنايى كەزدەسكەن تۇركىستان وبلىستىق قازاقستان حالىقتارى اسسامبلياسى حاتشىلىعىنىڭ مەڭگەرۋشىسى، ماقتاارال اۋدانىنداعى وبلىستىق شتابتىڭ الەۋمەتتىك ماسەلەلەر جونىندەگى جەتەكشىسى عاني رىسبەكوۆ كاسىپكەر ا.ۋسمانوۆتىڭ قورى ەسەبىنەن 5202 وتباسىنا 1000 اقش دوللارىنان بەرىلىپ جاتقانىن دا جەتكىزدى.

قازىرگى تاڭدا 13 اۋىلدان 5342 قۇجات قابىلدانىپ، ولارعا مونيتورينگ جۇرگىزىلگەن. ناتيجەسىندە 4839 ازاماتتىڭ قۇجاتى راستالىپ وتىر.

«بۇگىنگە دەيىن 3 ترانشپەن 3375 وتباسىنا بەلگىلەنگەن 1000 دوللار وتەماقى اۋدارىلدى. قالعان جانۇيالارعا دا قارجى اۋدارىلادى. بۇل قارجى نەگىزىنەن توتەنشە جاعداي جاريالانعان ەلدىمەكەندەردە توپان سۋ باسقان ساتتە تۇرىپ جاتقان ازاماتتارعا تيەسىلى. ال، ولاردىڭ اراسىندا پاتەر جالداپ تۇرىپ جاتقان جاندار دا بار. وسى ماسەلەلەردى قاراپ، ءتيىستى شەشىم قابىلداۋ ماقساتىندا اۋداندا ارنايى كوميسسيا قۇرىلىپ، جۇمىس ىستەپ جاتىر. سونىڭ ناتيجەسىندە 1438 قۇجات قايتا قارالىپ، 1319-ى وڭ قورىتىندى العان. الداعى اپتادا بۇل جۇمىس تولىعىمەن اياقتالۋى ءتيىس. وسى ماقساتتا جاڭاجول اۋىلدىق وكرۋگىنە قوسىمشا 4 بىلىكتى مامان ءبولىنىپ وتىر»، – دەدى عاني قۇرماشۇلى.

سونىمەن قاتار، ەۆاكۋاتسيالىق بەكەتتەردە وتكەن كەزدەسۋ بارىسىندا بۇزىلىپ قايتا سالىناتىن ۇيلەردىڭ قۇجاتتارى تۇگەل بولماۋىنا بايلانىستى قيىندىق تۋىنداپ وتىرعانى دا ءسوز بولدى. ماسەلەن، توپان سۋدا قالعان 870 ءۇيدىڭ 4-ىندە جەكە كۋالىك كوشىرمەسى، 19-ىندا مەنشىك يەسى تۋرالى مالىمەتتەرى، 7-ەۋىندە مەملەكەتتىك اكتىسى، 8-ءنىڭ تەحنيكالىق پاسپورتى جوق.

بۇگىندە وبلىستىق قۇرىلىس باسقارماسىنا 834 ءۇيدىڭ قۇجاتتارى تاپسىرىلسا، 832-ءسى تەكسەرۋدەن وتكەن، 2 قۇجات قايتا تۇزەتۋگە جىبەرىلگەن. سونداي-اق، عاني رىسبەكوۆ وبلىستىق توتەنشە جاعدايلار جونىندەگى شتاب جانىنان قۇرىلعان ازىق-تۇلىك قويماسىندا بولىپ، ونداعى اتقارىلىپ جاتقان شارۋالارمەن دە تانىستى.

جالپى قويماعا بۇگىنگە دەيىن ەلىمىزدىڭ تۇكپىر-تۇكپىرىنەن 740 توننادان استام تاۋار كەلىپ تۇسسە، ونىڭ 320 تونناعا جۋىعى ەۆاكۋاتسيالىق پۋنكتەردە ازاماتتارعا تاراتىلىپ بەرىلگەن.

ايتا كەتەيىك، بۇگىندە اۋدانداعى 8 ەۆاكۋاتسيالىق بەكەتتە 996 ازامات ۋاقىتشا ورنالاستىرىلعان. ولارعا كۇندەلىكتى قاجەتتى بارلىق جاعداي جاسالۋدا. ازىق-تۇلىك پەن گيگيەنالىق زاتتار دەر كەزىندە جەتكىزىلىپ بەرىلگەن.

 

سوڭعى جاڭالىقتار