4 ماۋسىم, 13:21 4518 0 ءبىلىم انار لەپەسوۆا

مەكتەپ ديرەكتورلارى اتتەستاتسيادان وتەدى – مينيستر

ەلىمىزدە مەكتەپ ديرەكتورلارى مەن ولاردىڭ ورىنباسارلارىن اتتەستاتسيادان وتكىزۋ ينستيتۋتى ەنگىزىلەدى. سىننان سۇرىنبەي وتكەن باسشىلاردىڭ جالاقىسى ارتادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ مالىمدەدى. 

«پەداگوگتاردىڭ ساپالىق قۇرامىن ارتتىرۋ جۇمىستارى جۇرگىزىلدى. قازىرگى ۋاقىتتا 150 مىڭنان استام پەداگوگ بىلىكتىلىك ساناتىن راستاپ، لاۋازىمدىق ەڭبەكاقىسىنىڭ 30-50 پايىزى كولەمىندە ۇستەمەاقى الىپ جاتىر»، - دەدى ۆەدومستۆو باسشىسى.

ءمينيستردىڭ ايتۋىنشا، مەكتەپ باسشىلارىنىڭ جالاقىسىن ارتتىرۋ ماسەلەسى دە قاراستىرىلعان.

«جالپى ول - بەلگىلى پروبلەمانىڭ ءبىرى. قازىرگى ۋاقىتتا ديرەكتورلاردىڭ جالاقىسى وتە از، جەتكىلىكسىز. ول ءۇشىن بىرنەشە شارا قابىلدادىق. بىرىنشىدەن، بيىل جانە كەلەسى 4 جىل ىشىندە جالاقىنىڭ ەكى ەسە ءوسۋى ديرەكتورلارعا دا قاتىستى بولادى. ەكىنشىدەن، ديرەكتورلار مەن ولاردىڭ ورىنباسارلارىن اتتەستاتسيادان وتكىزۋ ينستيتۋتى ەنگىزىلدى. ياعني، ەندى ديرەكتورلار مەن ولاردىڭ ورىنباسارلارى ءوز جۇمىسىنىڭ تيىمدىلىگىن كورسەتكەن جاعدايدا اي سايىنعى جالاقىسىنا 30-دان 100 پايىزعا دەيىن قوسىمشا ۇستەمەاقى الاتىن بولادى»، - دەپ ءتۇسىندىردى ا. ايماعامبەتوۆ.

ۆەدومستۆو باسشىسىنىڭ سوزىنشە، وسى ايدان باستاپ مەكتەپ ديرەكتورلارى مەن ولاردىڭ ورىنباسارلارى جاڭا جۇيە بويىنشا تەست تاپسىرا باستايدى. سىناق ناتيجەسى بويىنشا كەي ديرەكتورلاردى ورنىنان الۋ نەمەسە باسقا مەكتەپكە جىبەرۋ تۋرالى شەشىم قابىلدانۋى مۇمكىن. ال اتتەستاتسيادان سۇرىنبەي وتكەندەر ۇستەماقى الىپ، ءوز جۇمىسىن ءارى قاراي جالعاستىرماق.

ايتا كەتەيىك، بۇعان دەيىن اسحات ايماعامبەتوۆ مۇعالىمدەردىڭ شامادان تىس ەسەپ بەرۋ ماسەلەسىن تۇبەگەيلى شەشەتىن بۇيرىقتى ەگجەي-تەگجەيلى تۇسىندىرگەن.

ءمينيستردىڭ ايتۋىنشا، بۇدان بىلاي مۇعالىمدەر ەكى-اق قۇجاتتى تولتىرادى.

سوڭعى جاڭالىقتار