4 ماۋسىم, 12:49 417 0 تۋريزم ارايلىم بيمەنديەۆا

تارازدىڭ ءتۋريزمى داميدى

جامبىل وبلىسىنىڭ تۋريزم سالاسىنداعى كادر تاپشىلىعى، اۆتوجولدار ساپاسىنىڭ ناشارلىعى، جول بويىنداعى سەرۆيس دەڭگەيىنىڭ تومەندىگى ءتۋريزمنىڭ دامۋىنا كەدەرگى كەلتىرىپ وتىر. بۇل تۋرالى ايماق باسشىسى بەردىبەك ساپارباەۆ اتاپ ءوتتى.

تۋريزم باسقارماسى وسى ورايداعى ماسەلەلەردى شەشۋ ءۇشىن تۋريزم سالاسىن دامىتۋدىڭ 2020-2022 جىلدارعا ارنالعان ستراتەگيالىق جوسپارىن ازىرلەۋ ۇستىندە.

باسقارما باسشىسى عاني مايلىباەۆتىڭ ايتۋىنشا، بۇل باعىتتا بىرنەشە جوبانى جۇزەگە اسىرۋ جوسپارلانعان. بەس تىلدە اۋديو جانە بەينەگيدتەرى بار Taraz tour موبيلدىك قوسىمشاسىنداعى تۋريستىك نىساندار سانىن 200-گە دەيىن ارتتىرۋ كوزدەلىپ وتىر. قازىرگى تاڭدا قوسىمشاعا تەك 37 نىسان ەنگىزىلگەن. سونداي-اق جاقىندا «اۋليەاتا» اۋەجايىنا تاراز تۋرالى تولىق اقپار بەرەتىن smart-دۇڭگىرشەكتەر ورناتىلماق.

باسقارما اۋديو جانە ۆيدەو نۇسقاۋلىعى بار ەكى قاباتتى اۆتوبۋستى ىسكە قوسۋدى جوسپارلاپ وتىر ەكەن. تاراز ايگىلى 2GIS ءموبيلدى قوسىمشاسىنا (ساندىق كارتا) قوسىلادى. بۇل تۋريستەرگە وزىنە كەرەك جەردى تاۋىپ، دۇرىس باعىتتاعى اۆتوبۋسقا وتىرۋعا كومەكتەسەدى. 200 تۋريستىك نىساندا QR-كودتارى ورناتىلادى.

بيىل ايشا ءبيبى، قاراحان، بابادجا-حاتۋن كەسەنەلەرى، كەرەي مەن جانىبەك ەسكەرتكىشتەرى، اقىرتاس جانە تەكتۇرماس ەتنوتاريحي كەشەنى سياقتى بەس تاريحي-مادەني نىسانداردا قايتا جاڭعىرتۋ جۇمىستارى باستالادى. ەتنواۋىلدار سالۋ بويىنشا ينۆەستورلارمەن كەلىسسوزدەر جۇرگىزىلمەك.

وبلىس باسشىسى بەردىبەك ساپارباەۆ ءتيىستى مەملەكەتتىك ورگاندار، تۋريستىك كومپانيالار مەن قاۋىمداستىقتار بىرلەسىپ تۋريزم يندۋسترياسىنىڭ الەۋەتىن ارتتىرۋ ءۇشىن جۇيەلى نەگىزدە جۇمىس جۇرگىزۋى قاجەتتىگىن اتاپ ءوتتى.

– وبلىسىمىزدىڭ قولايلى ايماقتا ورنالاسقاندىعىن ۇتىمدى پايدالانبايمىز. «باتىس ەۋروپا – باتىس قىتاي» ءاۆتودالىزى ءبىزدىڭ ءوڭىر ارقىلى وتەدى. ول جولمەن كۇن سايىن مىڭداعان كولىك قاتىنايدى. وتاردان جۋالىعا دەيىن اۋليەاتانىڭ قاسيەتتى ورىندارى تۋرالى اقپاراتتار جازىلعان بيلبوردتار ورناتۋ كەرەك. كوروناۆيرۋستىق پاندەميا ىشكى ءتۋريزمنىڭ دامۋىنا ۇلكەن مۇمكىندىكتەر بەرەدى. بۇعان دەيىن تانىمال بولىپ كەلگەن شەتەلدىك كۋرورتتار بۇرىنعىداي اسا قىزىعۋشىلىق تۋدىرمايدى. مۇنى ىشكى ءتۋريزمنىڭ دامۋىنا سەرپىن سىيلاۋ ءۇشىن ءتيىمدى پايدالانا بىلگەن ابزال، – دەپ قورىتىندىلادى بەردىبەك ساپارباەۆ.

سوڭعى جاڭالىقتار