4 ماۋسىم, 09:16 357 0 جاڭالىقتار انار لەپەسوۆا

بۇگىن ‒ قازاقستاننىڭ مەملەكەتتىك رامىزدەرى كۇنى

وسىدان تۋرا 28 جىل بۇرىن، 1992 جىلدىڭ 4 ماۋسىمىندا قر تۇڭعىش پرەزيدەنتى - ەلباسى نۇرسۇلتان نازارباەۆ «قازاقستان رەسپۋبليكاسىنىڭ مەملەكەتتىك تۋى تۋرالى»، «قازاقستان رەسپۋبليكاسىنىڭ مەملەكەتتىك ەلتاڭباسى تۋرالى» جانە «قازاقستان رەسپۋبليكاسى مەملەكەتتىك ءانۇرانىنىڭ مۋزىكالىق رەداكتسياسى تۋرالى» زاڭدارعا قول قويدى. 

ال «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 2007 جىلى 4 ماۋسىمدا قابىلداندى. وسى زاڭعا سايكەس جىل سايىن 4 ماۋسىم قازاقستان رەسپۋبليكاسىندا مەملەكەتتىك رامىزدەر كۇنى رەتىندە مەرەكەلەنەدى.

مەملەكەتتىك رامىزدەر – بۇل كەز كەلگەن مەملەكەتتىڭ ەگەمەندىگى مەن بىرتۇتاستىعىن بەينەلەيتىن، ونىڭ اجىراعىسىز اتريبۋتتارىنىڭ ءبىرى. قازاقستان رەسپۋبليكاسىندا مەملەكەتتىك تۋ، مەملەكەتتىك ەلتاڭبا جانە مەملەكەتتىك گيمن مەملەكەتتىك رامىزدەر بولىپ سانالادى.

وسىناۋ مەملەكەتتىك ءۇش نىشاندى تاڭداۋ ءۇشىن 1992 جىلدىڭ باسىندا جوعارعى كەڭەس پرەزيديۋمى جۇمىس توبىن قۇرىپ، ارنايى شىعارماشىلىق كوميسسيا تاعايىندادى. ونىڭ قۇرامىنا سالىق زيمانوۆ، ەربول شايمەردەنوۆ، سەرىكبولسىن ءابدىلدين، سەرىك ءابدراحمانوۆ سىندى قايراتكەرلەر كىردى.

وسىدان كەيىن بۇكىل قازاقستان كولەمىندە ەلتاڭبا، تۋ، ءانۇران نۇسقالارىنا كونكۋرس جاريالاندى. ءبىر عانا تۋدىڭ وزىنە 600 ادامنان 1 200 نۇسقا تۇسسە، ەلتاڭبانىڭ 245 جوباسى، ءانۇراننىڭ 750 ۇلگىسى بايقاۋعا قاتىستى. ەستەتيكالىق سيپاتىمەن دە، تاريحي، ساياسي، ەكونوميكالىق سيمۆوليزمگە سايكەس كەلۋى بويىنشا دا ۇزدىك تۋىندى ۇسىنعان بايقاۋ جەڭىمپازدارىن قازىر حالىق مەملەكەتتىك نىشان اۆتورلارى رەتىندە تانيدى.

اتاپ ايتقاندا، قازاقستان رەسپۋبليكاسىنىڭ مەملەكەتتىك تۋى. تۋدىڭ اۆتورى - قازاقستاننىڭ ەڭبەك سىڭىرگەن ونەر قايراتكەرى شاكەن نيازبەكوۆ. ەلىمىزدىڭ مەملەكەتتىك تۋى – ورتاسىندا شۇعىلالى كۇن، ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن، ونىڭ شۇعىلاسى، قىران جانە ۇلتتىق ورنەك بەينەسى التىن تۇستەس. تۋدىڭ ەنى مەن ۇزىندىعىنىڭ اراقاتىناسى - 1:2.

قازاقستان رەسپۋبليكاسى مەملەكەتتىك ەلتاڭباسىنىڭ اۆتورلارى – بەلگىلى ساۋلەتشىلەر جانداربەك مالىبەكوۆ پەن شوت-امان ءۋاليحانوۆ. قازاقستان رەسپۋبليكاسىنىڭ مەملەكەتتىك ەلتاڭباسى – دوڭگەلەك نىساندى جانە كوگىلدىر ءتۇس اياسىنداعى شاڭىراق تۇرىندە بەينەلەنگەن، شاڭىراقتى اينالا كۇن ساۋلەسىندەي تاراپ ۋىقتار شانشىلعان. شاڭىراقتىڭ وڭ جاعى مەن سول جاعىندا اڭىزدارداعى قاناتتى پىراقتار بەينەسى ورنالاستىرىلعان. جوعارعى بولىگىندە – بەس بۇرىشتى كولەمدى جۇلدىز، ال تومەنگى بولىگىندە «QAZAQSTAN» دەگەن جازۋ بار. جۇلدىزدىڭ، شاڭىراقتىڭ، ۋىقتاردىڭ، اڭىزدارداعى قاناتتى پىراقتاردىڭ بەينەسى، سونداي-اق «QAZAQSTAN» دەگەن جازۋ – التىن تۇستەس. قازاقستان رەسپۋبليكاسىنىڭ مەملەكەتتىك تۋى مەن مەملەكەتتىك ەلتاڭباسىنىڭ ەتالوندارى قازاقستان رەسپۋبليكاسى پرەزيدەنتىنىڭ رەزيدەنتسياسىندا ساقتالادى.

تاۋەلسىز قازاقستاننىڭ تۇڭعىش ءانۇراننىڭ اۆتورلارى رەتىندە - اۋەنىن جازعان مۇقان تولەباەۆ، ەۆگەني برۋسيلوۆسكي مەن لاتيف ءحاميديدىڭ ەسىمى تاريحتا قالدى. ۇزدىك ماتىنگە جاريالانعان بايقاۋدى مۇزافار الىمباەۆ، قادىر مىرزاليەۆ، تۇمانباي مولداعاليەۆ جانە جادىرا دارىباەۆا جەڭىپ شىقتى.

2006 جىلى «مەنىڭ قازاقستانىم» ءانى رەتىندە تانىمال بولعان قازاقستاننىڭ گيمنى پرەزيدەنت نۇرسۇلتان نازارباەۆتىڭ باستاماسىمەن 2006 جىلى 6 قاڭتاردا ەلىمىزدىڭ پارلامەنتىندە بەكىتىلدى. ءبىرىنشى رەت ول 2006 جىلى 11 قاڭتاردا تۇڭعىش پرەزيدەنت، ەلباسىنىڭ سالتاناتتى ۇلىقتاۋ راسىمىندە ورىندالدى. ءاننىڭ اۆتورى ءشامشى قالداياقوۆ، ءسوزىن جازعاندار: جۇمەكەن ناجىمەدەنوۆ، نۇرسۇلتان نازارباەۆ.

 

سوڭعى جاڭالىقتار