3 ماۋسىم, 11:27 438 0 جاڭالىقتار اسىل تۇمار

«باقىتتى وتباسى»: قوستاناي وبلىسىندا 219 كوپبالالى وتباسىنا باسپانا بەرىلەدى

قوستاناي وبلىسىندا 219 كوپبالالى وتباسى باسپانا كىلتىنە يە بولادى. بۇل تۋرالى قوستاناي وبلىسىنىڭ قۇرىلىس، ساۋلەت جانە قالا قۇرىلىسى باسقارماسى حابارلاما تاراتتى.

وڭىردە تۇرعىن ءۇي قۇرىلىسىنا ايرىقشا ءمان بەرىلمەك. قارجىلاندىرۋ كولەمى ارتىپ، از قامتىلعان وتباسىلاردى باسپانامەن قامتاماسىز ەتۋ ءۇشىن ارنايى جوبالار قابىلداندى.

ماسەلەن، وسى جىلى قوستاناي قالاسىندا حالىقتىڭ الەۋمەتتىك وسال توپتارى ءۇشىن جالعا بەرىلەتىن 7 ءۇيدىڭ قۇرىلىسىنا 2 ملرد تەڭگە باعىتتالدى. امانگەلدى، دەنيسوۆ، جىتىقارا، مەڭدىقارا جانە ناۋرىزىم اۋداندارىنا تاعى 1,2 ملرد تەڭگە ءبولىندى. بەس اۋداندا 5 كوپپاتەرلى ءۇي قايتا جاڭارتىلادى. ولاردىڭ ءبارى كوپبالالى وتباسىنا ارنالعان.

«كوپبالالى وتباسىلاردى تۇرعىن ۇيمەن قامتاماسىز ەتۋ ءۇشىن 108 پاتەر ساتىپ الىندى. بۇل ماقساتتا 900 ملن تەڭگە قاراستىرىلدى. ونىڭ ىشىندە 840 ملن تەڭگە قوستاناي قالاسىنىڭ ەنشىسىندە. «نۇرلى جەر» جانە «باقىتتى وتباسى» باعدارلامالارى اياسىندا از قامتىلعان وتباسىلار نەسيەلىك ۇيدە تۇرۋعا مۇمكىندىك الادى. قازىردىڭ وزىندە 1,5 ملرد تەڭگەگە 219 ءوتىنىم ءتۇستى. بارلىق ءوتىنىم ماقۇلداندى»، – دەيدى قوستاناي وبلىسىنىڭ قۇرىلىس، ساۋلەت جانە قالا قۇرىلىسى باسقارماسىنىڭ باسشىسى بەرىك تاڭجارىقوۆ.

قازىرگى ۋاقىتتا 36 كوپبالالى جانە مۇگەدەك بالاسى بار 28 وتباسى پاتەر كىلتىنە يە بولدى.

 

سوڭعى جاڭالىقتار