3 ماۋسىم, 09:59 704 0 جاڭالىقتار اسىل تۇمار

مەكتەپ وقۋشىلارىن زاڭسىز جۇمىسقا سالعاندار جاۋاپقا تارتىلدى

اقتوبەدە مەكتەپ وقۋشىلارى ءدامحانادا داياشى، كولىك جۋ ورىندا تازالىقشى بولىپ جۇمىس ىستەپ ءجۇر.

قازاقپاراتتىڭ جازۋىنشا، «بالا ەڭبەگىن پايدالانۋعا قارسى 12 كۇن كۇرەس» رەسپۋبليكالىق شاراسى اياسىندا وبلىستىق پوليتسيا دەپارتامەنتىنىڭ «ءجاسوسپىرىم» جەدەل الدىن الۋ اكتسياسى باستالدى.

يۋۆەنالدى پوليتسيا ينسپەكتورلارى اۋلالاردا، ساياباقتاردا جانە جاستار كوپ جينالاتىن ورىندارىندا، ويىن-ساۋىق ورىندارىندا رەيد جۇرگىزدى. ءبىرىنشى كۇنى قالالىق جانە اۋداندىق پوليتسيا بولىمدەرىنە بارلىعى 74 ءجاسوسپىرىم جەتكىزىلدى. ونى ەكەۋى بەيىمدەۋ ورتالىعىنا ورنالاستىرىلدى.

«150-دەن استام كاسىپكەرلىك وبەكتىسى تەكسەرىلدى. ونىڭ ىشىندە قۇرىلىس، تەحنيكالىق قىزمەت ورتالىعى، كولىك جۋ، ءدامحانا، بازار بار. ناتيجەسىندە بالا ەڭبەگىن پايدالانۋدىڭ 3 فاكتىسى انىقتالدى. كامەلەت جاسىنا تولماعان 19 بالا جانە 15 قولايسىز وتباسى ارنايى تىركەۋگە الىندى. اقتوبە قالاسىندا ورنالاسقان كولىك جۋ ورنىندا كامەلەتكە تولماعان ءۇش ءجاسوسپىرىم انىقتالدى. ونىڭ ءبىرى - 9-سىنىپ، ەكەۋى -11-سىنىپ وقۋشىسى. حرومتاۋ قالاسىندا اقجار ورتا مەكتەبىنىڭ وقۋشىسى داياشى بولىپ جۇمىس ىستەپ ءجۇر. زاڭدى وكىلىنە اكىمشىلىك حاتتاما تولتىرىلدى. جەكە كاسىپكەرىگە دە ەسكەرتۋ بەرىلدى»، – دەيدى وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.

انىقتالعان فاكتىلەر بويىنشا ەڭبەك ينسپەكتسياسىنا ءوتىنىش جولدانعان.

سوڭعى جاڭالىقتار