2 ماۋسىم, 12:10 1458 0 جاڭالىقتار اسىل تۇمار

ۇبت: پەداگوگ ماماندىعىنا ۇمىتكەر تۇلەكتەرگە تالاپ كۇشەيدى

سۋرەت عالامتوردان الىندى
سۋرەت عالامتوردان الىندى

بيىل پەداگوگ ماماندىعىنا ۇمىتكەر تۇلەكتەرگە شەكتى بالل كوتەرىلدى. بۇل تۋرالى ۇكىمەت وتىرىسىندا قر ءبىلىم جانە عىلىم ءمينيسترى اسحات ايماعامبەتوۆ ايتتى، – دەپ جازدى قازاقپارات.

«ۇبت بەلگىلەنگەن مەرزىمدە، ياعني، 25 ماۋسىمنان 5 شىلدەگە دەيىن سانيتارلىق تالاپتاردى قاتاڭ ساقتاۋ ارقىلى 161 پۋنكتتە وتكىزىلەدى. بيىل ۇبت قاعيدالارىنا بىرنەشە جاڭاشىلدىق دا ەنگىزىلدى. اتاپ ايتقاندا، ۇبت-عا قاتىسۋ ءۇشىن كىرۋ كەزىندە بەت-الپەتىن تانۋ Face ID كومەگىمەن تۇلعانى سايكەستەندىرۋ العاش رەت قولدانىلادى. جىلدا بەرىلگەن قاعاز سەرتيفيكاتتىڭ ورنىنا ۇبت ەلەكتروندى سەرتيفيكاتى جانە ءبىلىم بەرۋ گرانتىن تاعايىنداۋ كەزىندەگى ەلەكتروندى كۋالىكتى ەنگىزدىك»، – دەدى مينيستر.

ونىڭ اتاپ وتۋىنشە، حالىقارالىق تەستىلەردىڭ بالىن ۇبت ۇپايىنا اۋدارۋ شكالاسى ەنگىزىلگەن. سوندىقتان مۇنداي حالىقارالىق سەرتيفيكاتتارى بار تۇلعالار ۇبت-دان بوساتىلادى جانە ءبىلىم بەرۋ گرانتىن تاعايىنداۋ كونكۋرسىنا وسى اۋىسقان بالدارى ارقىلى قاتىسا الادى.

«اكادەميالىق كەزەڭ اياقتالعانعا دەيىن قابىلدانعان ۇبت شەكتى بالىن جيناماعان تۇلعالار ەندى جىل بويى ۇبت تاپسىرۋ مۇمكىندىگىنە يە. پەداگوگيكالىق ماماندىقتارعا ءتۇسۋ ءۇشىن تالاپ كۇشەيتىلۋدە. بۇل تۋرالى پرەزيدەنتتىڭ تاپسىرماسى دا بار. ماسەلەن، پەداگوگ بولۋ ءۇشىن شەكتى بالل الدىڭعى جىلى 50-دەن 60-قا كوتەرسەك، بيىل ونى 70 بالعا دەيىن كوتەرىپ وتىرمىز»، – دەدى اسحات ايماعامبەتوۆ.

سوڭعى جاڭالىقتار