1 ماۋسىم, 19:57 1868 0 جاڭالىقتار اسىل تۇمار

مەكتەپ شتاتىنا ەرەكشە قاجەتتىلىگى بار بالالاردىڭ اسسيستەنتى ەنگىزىلەدى – مينيستر

سۋرەت عالامتوردان الىندى
سۋرەت عالامتوردان الىندى

جاڭا وقۋ جىلىنان باستاپ مەكتەپتەردىڭ شتاتىنا تيۋتورلار نەمەسە ەرەكشە ءبىلىم قاجەتتىلىكتەرى بار بالالاردىڭ اسسيستەنتتەرى ەنگىزىلەدى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى.

«قازاقستاندا 63 مىڭ ۇيىرمە مەن 1 200 قوسىمشا ءبىلىم بەرەتىن ۇيىم جۇمىس ىستەيدى. قازىر وقۋشىلار سارايلارى، بالالار تەحنوپاركتەرى، ۇيىرمەلەر مەن ونەر مەكتەپتەرى جانە تاعى باسقالارىنىڭ جەلىسىن ودان ءارى ۇلعايتۋ مىندەتى تۇر. قاراعاندى، كوكشەتاۋ، تۇركىستان، قىزىلوردا جانە شقو سياقتى بىرنەشە وڭىردە مۇنداي ورتالىقتاردىڭ قۇرىلىسى باستالدى، ال الماتى قالاسىندا قايتا جوندەۋ جۇمىستارى جۇرگىزىلىپ جاتىر. باسقا وڭىرلەردە دە اتالعان باعىت بويىنشا جۇمىس اتقارىلىپ جاتىر»، – دەدى اسحات ايماعامبەتوۆ.

سونىمەن قاتار مينيستر ينكليۋزيۆتى ءبىلىم بەرۋدى دامىتۋ – ماڭىزدى باعىتتاردىڭ ءبىرى ەكەندىگىن باسا ايتادى.

«پسيحولوگيالىق-مەديتسينالىق-پەداگوگيكالىق كونسۋلتاتسيا جۇمىسى مودەرنيزاتسيالانىپ، تۇزەتۋ ورتالىقتارىنىڭ (پپتك) جەلىسىن كەڭەيتۋ ماسەلەلەرى شەشىلىپ جاتىر. قازىرگى ۋاقىتتا تۇزەتۋ كومەگىنە مەملەكەتتىك تاپسىرىستى ەنگىزۋ ماسەلەسى قاراستىرىلىپ جاتىر. بۇل شارا بىزگە كومەككە مۇقتاج بالالاردى تەز ارادا قامتۋعا جانە ولارعا قاجەتتى كومەك كورسەتۋگە مۇمكىندىك بەرەرى ءسوزسىز. سەبەبى دەنساۋلىققا قاتىستى ماسەلەلەردى الدىن الا انىقتاپ، بالالارعا قولداۋ كورسەتۋ وتە ماڭىزدى»، – دەدى ول.

ونىڭ اتاپ وتۋىنشە، جاڭا وقۋ جىلىنان باستاپ تيپتىك وزگەرىستەر بويىنشا مەكتەپتەردىڭ شتاتىنا تيۋتور نەمەسە ەرەكشە ءبىلىم قاجەتتىلىگى بار بالالاردىڭ اسسيستەنتى ەنگىزىلەدى.

«ءبىلىم ۇيىمدارىندا توسقاۋىلسىز ورتا قۇرۋدان بولەك، ارنايى باعدارلامالار، ادىستەمەلەر، باعالاۋ جۇيەلەرىن ەنگىزۋ، پەداگوگتەردىڭ ەرەكشە قاجەتتىلىكتەرى بار بالالارمەن جۇمىس ىستەۋ دايىندىعى مەن قۇزىرەتتەرى بويىنشا باستى نازارعا الىنادى»، – دەدى مينيستر.

سوڭعى جاڭالىقتار