1 ماۋسىم, 18:02 3113 0 جاڭالىقتار اسىل تۇمار

قىرعىز-وزبەك قاقتىعىسى شەكاراداعى سۋعا تالاستان باستالعان

فوتو - "ازاتتىق" راديوسى
فوتو - "ازاتتىق" راديوسى

31 مامىردا قىرعىزستاننىڭ باتكەن وبلىسىندا وزبەكستانمەن شەكارالاس اۋماقتا 10 ادام اراسىندا قاقتىعىس بولدى. قىرعىزستاننىڭ چەچمە اۋىلى مەن وزبەكستاننىڭ چاشما اۋىلى تۇرعىندارىنىڭ اراسىندا داۋ شىقتى، ­– دەپ حابارلايدى اكيpress.

باسىلىمنىڭ مالىمەتىنشە، بۇل قاقتىعىسقا ەكى اۋىل تۇرعىندارى چەچمە اۋىلىنداعى سۋ كوزى سەبەپ بولعان. تاراپتاردىڭ ءبىرى سۋ كوزى وزدەرىنە تيەسىلى ەكەنىن ايتىپ، ناتيجەسىندە داۋ شىعىپ، قاقتىعىسقا ۇلاسقان.

وقيعا ورنىنا جەرگىلىكتى بيلىك وكىلدەرى كەلىپ، قاقتىعىستى توقتاتۋ ءۇشىن ءتۇسىندىرۋ جۇمىستارىن جۇرگىزگەن.

دەرەككوز مالىمەتىنشە، اۋىل تۇرعىندارى ءبىر-بىرىنە تاس لاقتىرعان. الدىن الا مالىمەت بويىنشا، جاراقات العاندار بار.

قىرعىزستاننىڭ ۆيتسە-پرەمەرى اكرام مادۋماروۆ قىرعىزستاندىقتار مەن وزبەكستاندىقتار اراسىندا قاقتىعىس بولعانىن راستادى.

Tengrinews.kz-ءتىڭ جازۋىنشا، اكرام مادۋماروۆ: «جىل سايىن ەكى اۋىلدىڭ تۇرعىندارى سۋ كوزىن تازارتۋ جۇمىستارىن جۇرگىزەدى. بۇل جولى بەلگىسىز سەبەپتەرمەن ولاردىڭ اراسىندا داۋ شىعىپ، ءبىر-بىرىنە تاس لاقتىرعان. جەرگىلىكتى بيلىكتەگىلەر ولارمەن سويلەسىپ جاتىر. بۇل سۋ كوزىن ەكى اۋىل قولدانعاندىقتان مۇنداي داۋ ءجيى بولىپ تۇرادى. جاعدايدىڭ ۋشىعۋىنا جول بەرمەيمىز»، ­– دەپ رەسمي مالىمەت بەرگەن.

وقيعا ورنىنا بارعان «ازاتتىق» ءتىلشىسىنىڭ مالىمەتىنشە، ساعات 19:30-دا تۇرعىندار ءالى دە ءبىر-بىرىنە تاس لاقتىرعان. جەدەل جاردەم كولىگى زارداپ شەككەندەرگە العاشقى كومەك كورسەتكەن.

دەرەككوزدىڭ مالىمەتىنشە، ساعات 22:00-دە عانا ەكى تاراپ كەلىسىمگە كەلە العان. قىرعىزستاننىڭ دەنساۋلىق ساقتاۋ مينيسترلىگىنىڭ وكىلدەرى شەكارادا بولعان قاقتىعىستان 15 ادامنىڭ زارداپ شەككەنىن حابارلادى.

وزبەكستاندا تۇراتىن تاجىك ءجۋرناليسى ميراسرور فارگوني «احبور» باسىلىمىنا بەرگەن سۇحباتىندا سوح اۋدانىنىڭ ورتالىق اۋرۋحاناسىنا 146 ادام جەتكىزىلگەن.

سوڭعى جاڭالىقتار