1 ماۋسىم, 09:08 449 0 جاڭالىقتار اسىل تۇمار

بۇگىن – حالىقارالىق بالالاردى قورعاۋ كۇنى

سۋرەت عالامتوردان الىندى
سۋرەت عالامتوردان الىندى

بۇل مەرەكە ايەلدەردىڭ حالىقارالىق دەموكراتيالىق فەدەراتسياسىنىڭ كونگرەسىندە 1949 جىلى رەسمي تۇردە بەكىتىلدى.

1950 جىلدان باستاپ تۇراقتى تۇردە اتالىپ وتەدى. مۇنداي مەرەكەنى بەكىتۋ تۋرالى ۇسىنىس العاش رەت 1925 جىلى جەنەۆادا وتكەن دۇنيەجۇزىلىك كونفەرەنتسيادا جاسالدى.

بالالاردىڭ بۇل مەرەكەسى نەلىكتەن ءدال 1 ماۋسىم كۇنى اتاپ وتىلەتىندىگى تۋرالى ناقتى مالىمەتتەر جوق. بولجامداردىڭ ءبىر نۇسقاسى بويىنشا، 1925 جىلى 1 ماۋسىمدا قىتايدىڭ باس كونسۋلى سان-فرانسيسكودا قىتايلىق جەتىم بالالاردىڭ ءبىر توبىن جيناپ، ولارعا دۋان-ۋ تسزە فەستيۆالىن (قايىق-ايداھارلار فەستيۆالى) وتكىزدى. ءساتتى كەزدەيسوقتىقپەن بۇل كۇن جەنەۆادا «بالالار» كونفەرەنتسياسىنىڭ وتكىزىلۋىمەن سايكەس كەلدى.

بالالاردىڭ دەنساۋلىعىن ساقتاۋ جانە جاعدايىن جاقسارتۋ ماسەلەسى اناعۇرلىم وزەكتى بولعان ەكىنشى دۇنيەجۇزىلىك سوعىستان كەيىن، ناقتى ايتقاندا 1949 جىلى پاريجدە ايەلدەر كونگرەسى ءوتتى. وندا بالالار باقىتىنىڭ جالعىز كەپىلى رەتىندە ورنىقتى بەيبىتشىلىكتى قامتاماسىز ەتۋگە تالماي كۇرەسۋ انتى ايتىلدى. ءبىر جىلدان كەيىن، 1950 جىلدىڭ 1 ماۋسىمىندا حالىقارالىق بالالاردى قورعاۋ كۇنىنىڭ العاشقى مەيرامى اتاپ ءوتىلدى، وسىدان كەيىن بۇل داتا جىل سايىن مەرەكەلەنەدى.

حالىقارالىق بالالار كۇنىنىڭ ءوزىنىڭ بايراعى بار. ءوسىمدى، ۇيلەسىمدىكتى، بالعىندىق پەن شۇرايلىلىقتى بىلدىرەتىن جاسىل فوندا كورسەتىلگەن جەردىڭ اينالاسىنا قىزىل، سارى، كوك جانە اق ستيليزاتسيالانعان مۇسىندەر ورنالاستىرىلعان. ادامداردىڭ بۇل ءپىشىنى الۋاندىلىق پەن توزىمدىلىكتى بىلدىرەدى. ورتاعا ورنالاستىرىلعان جەردىڭ بەلگىسى – ورتاق ءۇيىمىزدىڭ سيمۆولى.

بۇۇ-نىڭ جۇرگىزگەن ساۋالناماسىنا جۇگىنسەك، بۇگىنگى تاڭدا الەمدە ءاربىر ونىنشى بالا ۇلكەندەر تاراپىنان جاسالاتىن زورلىق پەن زومبىلىققا ۇشىرايدى ەكەن. سونداي-اق، الەمدە ءومىرى قاتەرگە تولى بالالار دا بارشىلىق. اش-جالاڭاشتىق، سوعىس ءورتى، تەراكتىلەر بالالار ومىرىنە قاۋىپ ءتوندىرىپ قانا قويماي، ولاردى باقىتتى بالالىعىنان، الەمدەگى باسقا قاتارلاستارى سەكىلدى ءبىلىم الىپ، تاربيەلەنۋ مۇمكىندىگىنەن ايىرادى. سوندىقتان بۇل كۇنى تۇراقسىزدىق جايلاعان ەلدەردەگى بالالارعا قامقورلىق ماسەلەسى دە نازاردان تىس قالمايدى.

سونداي-اق، الەم حالىقتارى 20 قاراشا كۇنى حالىقارالىق نارەستەلەر كۇنىن، 16 ماۋسىم كۇنى افريكادا بالالاردى قورعاۋ كۇنىن مەرەكەلەيدى. قازاقستاندا 1 ماۋسىم كۇنى بالالارعا ارنالعان كوپتەگەن مادەني شارالار ۇيىمداستىرىلىپ، جالپىحالىقتىق دەڭگەيدە اتالىپ وتەدى.

سوڭعى جاڭالىقتار