31 مامىر, 20:17 2303 0 جاڭالىقتار اسىل تۇمار

شىمكەنتتە ەرتەڭنەن باستاپ 2 مىڭنان استام نىسان جۇمىسىن باستايدى

سۋرەت عالامتوردان الىندى
سۋرەت عالامتوردان الىندى

شىمكەنتتە 1 ماۋسىمنان باستاپ 2 مىڭنان اسا شاعىن جانە ورتا بيزنەس نىساندارى جۇمىسىن باستايدى. قالانىڭ باس سانيتارى كارانتيندىك شەكتەۋلەرگە قاتىستى قاۋلىعا وزگەرىستەر ەنگىزدى، – دەپ جازدى قازاقپارات.

بۇگىن اقپاراتتىق-كوممۋنيكاتسيالىق ورتالىعىندا وتكەن بريفينگتە ءسوز العان قالا اكىمىنىڭ ورىنباسارى ماقسۇت يساحوۆ ەرتەڭنەن باستاپ ىسكە قوسىلاتىن نىساندار مەن شەكتەۋلەردىڭ الىنۋى بويىنشا باياندادى.

«شىمكەنتتە بيىلعى جىلدىڭ 1, 4 جانە 11 مامىر كۇندەرى 3 كەزەڭ بويىنشا 6 912 نىسان ىسكە قوسىلىپ، 166 مىڭنان استام ادام جۇمىسىنا قايتا كىرىسكەن بولاتىن. ال، ءتورتىنشى كەزەڭ بويىنشا 1 ماۋسىمنان باستاپ 2 095 ورتا جانە شاعىن بيزنەس نىساندارى قايتا ىسكە قوسىلادى. ياعني، 33 مىڭنان استام جۇمىسشى ءوز ىسىنە كىرىسەدى دەگەن ءسوز»، – دەدى قالا اكىمىنىڭ ورىنباسارى.

قاۋلىعا سايكەس، ماۋسىم ايىنان باستاپ ازىق-تۇلىك پەن قاجەتتى تاۋارلاردى ساتاتىن سۋپەرماركەتتەر، گيپەرماركەتتەر جانە ساۋدا جەلىلەرى جۇمىسىن باستايدى.

سونداي-اق، قوعامدىق تاماقتانۋ ورىندارى جانە جازعى الاڭدار 50 ادامعا دەيىن قابىلداي الادى. جالپى سانى 1 320 نىسانعا ساعات 06:00-21:00 ارالىعىندا قىزمەت كورسەتۋگە رۇقسات بەرىلدى. تەك قوعامدىق تاماقتانۋ ورىندارىنا قۇدالىق، تۋعان كۇن، مەرەي تويلار سياقتى مەرەكەلىك شارالاردى وتكىزۋگە تيىم سالىنعان.

جاتتىعۋ زالى مەن فيتنەس-ورتالىقتارى، ساۋنالار مەن SPA-سالوندارى، جەكە كابينالارى بار مونشالار دا اشىلىپ، جۇمىس ىستەيتىن بولدى. اۆتوكولىك جانە مال ساتاتىن بازارلار، سپورتتىق جانە مادەني نىساندار (كورەرمەندەردىڭ قاتىسۋىنسىز), ءبىلىم بەرۋ ورتالىقتارى مەن ۇيىرمەلەر، دايىندىق توپتارى، حالىققا قىزمەت كورسەتۋ جانە جۇمىسپەن قامتۋ ورتالىقتارى قالىپتى جۇمىس رەجيمىنە كوشەدى.

مەكتەپكە دەيىنگى ۇيىمدارداعى كەزەكشى توپتار دا 20 بالاعا دەيىن قابىلداپ، تەمىرجول قاتىناستارى قالپىنا كەلتىرىلەدى دەپ كۇتىلۋدە. تەك بالاباقشاعا بالانى اپارار كەزدە اتا-اناسى دارىگەردەن رۇقسات قاعاز الىپ، جۇمىس ورنىنان انىقتاما الىپ كەلۋى تالاپ ەتىلەدى.

سونداي-اق، 2 ماۋسىمنان باستاپ قالاداعى اۆتوۆوكزالدار مەن اۆتوبەكەتتەر جۇمىسىن قايتا باستاماق. ال، كينوتەاترلار 15 ماۋسىمنان باستاپ جۇمىستارىنا كىرىسەدى دەپ جوسپارلانعان. بۇدان بولەك، بريفينگتە قالا اۋماعىنداعى بارلىق توپتاعى نىساندار جۇمىسىن تاڭەرتەڭگى ساعات 6:00-21:00 ارالىعىنداعى رەجيمدە جالعاستىرا الاتىنى بەلگىلى بولدى.

«ساياباقتار مەن سكۆەرلەر، الاڭدار مەن جاعالاۋلاردا بەتپەردەلىك رەجيم ساقتالا وتىرىپ، شەكتەۋسىز رەجيمگە كوشىرىلەدى. وسى رەتتە بارلىق ىسكە قوسىلاتىن كاسىپكەرلىك نىساندار كۇشەيتىلگەن سانيتاريالىق-دەزينفەكتسيالىق تارتىپپەن جۇمىس ىستەيدى»، – دەدى م.يساحوۆ.

سوڭعى جاڭالىقتار