31 مامىر, 14:45 593 0 جاڭالىقتار اسىل تۇمار

مۇناي وندىرەتىن كومپانيالاردا جۇمىسشىلار قىسقارتىلمايدى

سۋرەت عالامتوردان الىندى
سۋرەت عالامتوردان الىندى

ماڭعىستاۋ وبلىسىنىڭ اكىمى سەرىكباي ترۇموۆ «قازمۇنايگاز» ۇك» اق باسقارما توراعاسى اليك ايدارباەۆپەن كەزدەستى.

قازاقپاراتتىڭ جازۋىنشا، ۇلتتىق كومپانيانىڭ ەنشىلەس كاسىپورىندارى باسشىلارىنىڭ قاتىسۋىمەن وتكەن جيىندا كوروناۆيرۋسقا قارسى ءىس-شارالار مەن ايماقتاعى كاسىپورىندارداعى جۇمىس ورىندارىنىڭ ساقتالۋ ماسەلەسى ءسوز بولدى.

اليك ايدارباەۆتىڭ ايتۋىنشا، الەمدە مۇناي باعاسى قۇلدىرادى. مۇناي ءوندىرۋشى كومپانيالاردىڭ بارلىعى ونىڭ زاردابىن تارتىپ جاتىر. سوعان قاراماستان «قازمۇنايگاز» ۇك» اكتسيونەرلىك قوعامىنىڭ وكىلدەرى داعدارىسپەن كۇرەس ماقساتىندا ارنايى باعدارلاما ازىرلەدى. اتالمىش قۇجات كومپانيانىڭ وسىنداي داعدارىس كەزىندەگى شىعىندارىن ازايتىپ، ودان كەيىن دە دامۋعا جول سالادى.

«قازمۇنايگاز» كومپانياسىنىڭ باستى ماقساتى – قازىر قىزمەتكەرلەر سانىن قىسقارتپاۋ. جاعداي كۇردەلى، سوعان قاراماستان كومپانيا ۇجىمدى جۇمىسسىز قالدىرماۋعا تىرىسىپ وتىر.

اليك ايدارباەۆتىڭ ايتۋىنشا، قازىرگىدەي قيىن شاقتا جۇمىستى قايتا ۇيىمداستىرۋ ماڭىزدى. شىعىنداردى دا قىسقارتپاسا بلمايدى. «سول سەبەپتى ءبىز وسى باعىتتاعى جۇمىستاردى باستاپ كەتتىك. ياعني كومپانيا قىسقارتقان شىعىن كولەمى 146 ملرد تەڭگەنى قۇرادى. سونىڭ ىشىندە كۇردەلى شىعىنداردى 103 ملرد تەڭگەگە، وپەراتسيالىق شىعىنداردى – 26 ملرد تەڭگەگە، اكىمشىلىك شىعىنداردى – 17 ملرد تەڭگەگە ازايتتىق، ءالى دە قىسقارتامىز. «قازمۇنايگازدىڭ» ورتالىق اپپاراتىندا كوپتەگەن وزگەرىستەر جاسادىق. ۇيىمداستىرۋ قۇرىلىمىن 34 پايىزعا قىسقارتتىق. وزدەرىڭىز بىلەسىزدەر، بۇرىن بىزدە 22 باسقارۋشى (ۋپراۆليايۋششي) ديرەكتور بولاتىن. قازىر ولاردىڭ بىرەۋى دە جوق. 60 دەپارتامەنت بولاتىن، ولاردى دا قىسقارتىپ، 20-سىن عانا قالدىردىق. كومپانيا باسشىلارىنىڭ جالاقىسى 30 پايىزعا قىسقاردى. ورتا دەڭگەيدەگى باسشىلاردىڭ جالاقىسى 20 پايىزعا ازايدى. ال قالعان قىزمەتكەرلەردىڭ جالاقىسى وزگەرىسسىز قالدى. ودان بولەك، ءبىز سىياقىمىزدان باس تارتتىق. جىل سوڭىنا دەيىن ەشقانداي سىياقى، بونۋس دەگەن بولمايدى»، – دەدى باسقارما توراعاسى.

بۇل رەتتە ول وسىنداي شارالاردىڭ ناتيجەسىندە باسشىلاردىڭ تابىسى 50 پايىزعا قىسقارعاندىعىن ايتتى.

«ءبىز 50 ملرد تەڭگە ۇنەمدەدىك. بىراق وندىرىستىك پەرسونالدىق قىسقارتپايمىز»، – دەپ اتاپ ءوتتى اليك ايدارباەۆ.

سونداي-اق ونىڭ سوزىنشە، الەمدەگى ەپيدەميولوگيالىق جاعداي كۇردەلەنە باستاعاندا-اق كومپانيا داعدارىسپەن بايلانىستى جاعدايدى باسقارۋ بويىنشا كوماندا جاساقتاپ، قالىپتاسقان جاعدايعا تۇراقتى مونيتورينگى جۇرگىزىپ وتىرۋ ءۇشىن جەدەل شتاب قۇردى.

بارلىق كاسىپورىنداردا كۇشەيتىلگەن سانيتارلىق رەجيم قولعا الىندى، قىزمەتكەرلەر قاشىقتان جۇمىس ىستەپ جاتىر، ۆاحتا مەرزىمىن ۇزارتۋ مەن باسقا دا ءىس-شارالاردى قامتيتىن قاتاڭ پروفيلاكتيكالىق ءىس-شارالار جۇزەگە اسىرىلىپ جاتىر. سونداي اق، جيىندا مۇناي كومپانياسىنىڭ باسشىلارى ۆاحتاشىلاردىڭ بۇرىنعى 15/15 جۇمىس كەستەسىنە قايتا ورالعىسى كەلەتىنىن العا تارتتى. ءوڭىر باسشىسى ۆاحتا كەستەسىنىڭ بۇرىنعى قالپىنا كەلتىرۋ ۇسىنىسىن قاراستىراتىن ايتتى.

سوڭعى جاڭالىقتار