30 مامىر, 16:15 533 0 تاريح انار لەپەسوۆا

«تار جول، تايعاق كەشۋدەن» سابىر مەن ءتوزىمنىڭ ارقاسىندا امان وتتىك – ماۋلەن اشىمباەۆ

وتكەن عاسىرداعى ەڭ قيلى كەزەڭنىڭ بىرىندە جازىقسىز جاپا شەككەندەردىڭ رۋحىنا تاعزىم ەتۋ – بارشامىزدىڭ پەرزەنتتىك بورىشىمىز.   بۇل تۋرالى قر پارلامەنتى سەناتىنىڭ توراعاسى ماۋلەن اشىمباەۆ Facebook-پاراقشاسىندا جازدى.

«ءبىز 31 مامىردى ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى رەتىندە اتاپ وتەمىز. بۇل – حالقىمىز باسىنان وتكەرگەن قاسىرەتتى جىلدار جاڭعىرىعى. حح عاسىردىڭ باسىنداعى توتاليتارلىق جۇيەنىڭ سالدارىنان ءداستۇرلى تۇرمىسىمىز كۇشپەن وزگەرتىلدى. ەل اشارشىلىققا تاپ بولىپ، ەكى ميلليونعا جۋىق ادام كوز جۇمدى. جۇزدەگەن مىڭ قانداسىمىز تۋعان جەرىن تاستاپ كوشۋگە ءماجبۇر بولدى. ساياسي قۋعىن-سۇرگىن جىلدارى دا قازاققا وڭاي تيگەن جوق. ۇلتتىڭ كوشىن باستاعان زيالى تۇلعالارىمىز تار قاپاستارعا قامالدى جانە اتۋ جازاسىنا كەسىلدى. ولاردىڭ جاقىندارى دا قۋدالاۋدان قۇتىلا المادى. ءبىز وسىنداي «تار جول، تايعاق كەشۋدەن» بەرەكە مەن بىرلىكتىڭ، سابىر مەن ءتوزىمنىڭ، ءۇمىت پەن سەنىمنىڭ ارقاسىندا امان ءوتىپ، اتا-بابامىز اڭساعان ازاتتىققا قول جەتكىزدىك. از ۋاقىتتىڭ ىشىندە ەلدىكتىڭ ىرگەسىن نىعايتىپ، تاۋەلسىز مەملەكەت قۇردىق. قازىرگىدەي كۇردەلى كەزەڭدەردىڭ ءوزىن ابىرويمەن ەڭسەرىپ كەلەمىز»، - دەپ جازدى سەنات سپيكەرى.

ماۋلەن اشىمباەۆ پرەزيدەنتتىڭ ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋ تۋرالى تاپسىرماسىنىڭ تاريحي ادىلدىكتى ورناتۋدا ماڭىزى زور ەكەنىن اتاپ ءوتتى.

«پرەزيدەنتىمىز اتاپ كورسەتكەندەي، وتكەن عاسىرداعى ەڭ قيلى كەزەڭنىڭ بىرىندە جازىقسىز جاپا شەككەندەردىڭ رۋحىنا تاعزىم ەتۋ – بارشامىزدىڭ پەرزەنتتىك بورىشىمىز. سوندىقتان تاريحتان تاعىلىم الىپ، ۇلت ءۇشىن باستارىن بايگەگە تىككەن ارىستارىمىزدىڭ ەسىمدەرىن ماڭگى ۇلىقتاپ وتكەنىمىز ءجون. ەندى ەشقاشان مۇنداي زۇلمات بولماسىن! تاۋەلسىز قازاق ەلى جاساي بەرسىن!»، - دەپ تۇيىندەدى پالاتا توراعاسى.

ايتا كەتەيىك، بۇگىن مەملەكەت باسشىسى قاسىم-جومارت توقاەۆ ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي ۇندەۋ جاريالادى.

پرەزيدەنت ءوز ۇندەۋىندە cاياسي قۋعىن-سۇرگىن قۇرباندارىن اقتاۋ ءۇشىن ەلىمىزدە ارنايى مەملەكەتتىك كوميسسيا قۇرىلاتىنىن مالىمدەدى.

سوڭعى جاڭالىقتار