29 مامىر, 20:44 694 0 جاڭالىقتار انار لەپەسوۆا

نۇر-سۇلتاندا جۇك كولىگى جولاۋشىلار اۆتوبۋسىنا سوعىلدى

ەلوردادا «كاماز» جۇك كولىگى جولاۋشىلار اۆتوبۋسىن سوقتى. بۇل تۋرالى نۇر-سۇلتان قالالىق پوليتسيا دەپارتامەنتىنىڭ ءباسپاسوز قىزمەتى حابارلادى.

ۆەدومستۆونىڭ مالىمەتىنشە، 29 مامىر كۇنى ساعات 17-49-دا «كاماز» جۇك كولىگىن باسقارىپ كەلە جاتقان 1994 جىلى دۇنيەگە كەلگەن جۇرگىزۋشى اقجول كوشەسىنىڭ بويىندا رۋلگە يە بولا الماي قالعان. سونىڭ سالدارىنا جۇك كولىگى جولدىڭ قارسى بەتىنەن شىعىپ كەتىپ، «مان» ماركالى اۆتوبۋسىمەن سوقتىعىسقان.

«جول-كولىك اپاتى سالدارىنان اۆتوبۋستىڭ 13 جولاۋشىسى زارداپ شەگىپ، مەديتسينا مەكەمەلەرىنە جەتكىزىلدى»، - دەپ اتاپ وتەدى دەپارتامەنتتەن.

قازىرگى ۋاقىتتا ەكى جولاۋشىنىڭ سۇيەگى سىنعانى انىقتالسا، قالعاندارى ءتۇرلى دەڭگەيدە جاراقات العاندىعى بەلگىلى بولدى.

«اتالعان فاكتى بويىنشا سوتقا دەيىنگى تەرگەۋ جۇرگىزىلىپ جاتىر. وقيعانىڭ ءمان-جايى انىقتالۋ ۇستىندە»، - دەلىنگەن تاراتىلعان اقپاراتتا.

 

سوڭعى جاڭالىقتار